Read MMA SHIYYA Mariko 12 Bible Online

Mariko 12 - MMA SHIYYA bible

Mariko 12

¹Kabooka irera nawo eevakabiaa sumu kanumbua: Nndu umwi aroonga nrema yamwi ya misabibu. Kailengetia na uvarile. Karema-fo andu a ikamia sabibu. Katania-fo na nganga ya iringa. Kaana varemi nrema ilya kaenda kyaaṛo.

²Ili kyeeri kyayo kindefika, karuma isinga kulya kwa varemi valya, amu awarie wavi lwamwi lwa nunda ta misabibu kwa varemi valya.

³Nawo vakawwara vakankaba vakamwumbuta neefo atarie nta kindo.

⁴Kavarumia isinga lingi. Nae da vakankaba mavaṛa a nrwe vakanteenda.

⁵Kavanimia ungi. Ito vakawwaa. Na vengi veengi kiindi vakavakaba na kiindi vakavawaa.

⁶Kyasia kakooya akiseere umwi, nae mmwana wamwi nkunde. Uu kanruma kwawo lya ifurumia eenumbuaa: Avva mwanakwa, ye vamweṛeaa.

⁷Kake varemi valya vakakurera: Uu yye muyadiṅu. Ndefoń tiwwaa, na diṅu yo ive yeru.

⁸Vakawwara vakawwaa vakankumba neefo kwa mbele ya nrema ilya ya misabibu.

⁹A muni nrema yo ya misabibu atanaa ki? Ashaa na ireta varemi valya. Na nrema ilya ya misabibu ainiingie vengi.

¹⁰Nta mwansoma mitisiṛie ii ndi?: ”Iwe lyo lindelewa watana numba llyo lyawa iwe inini lya wembe.

¹¹Iki kyukie kwa Nndumi, nakyo kyawa iṛiikisa misoń eru“.

¹²Nawo vakaraya shia ya iwwara. Vakaeṛea syamu ilya. Amu vamanya, sheeli sumu yo avarera nayo. Vakantia-wo vakaenda.

¹³Vakanrumia kiindi kya Vafarisayo na vandu va Herode, amu vashenreya na firero famwi.

¹⁴Vakasha na-wo vakamwia: Llosha, tiishi sheeli iwe kukee nndu wa dede. Ana nta kullaa tikisi ya nndu ndi. Ana kwafo kuwore wa mungo ana wa kivari ndi. Kake kuloshaa shia ya Iṛuva na udede. Tiień kisumani iniinga mangi kyaalo ana wode? Tikanniinga ana tikamwima?

¹⁵Nae kamanya ukavili lwawo kavaia: Nki ili mukee isheelelia? Sheendień shilingi niille!

¹⁶Vakamwendie. Kavauṛa: A fwana ii iifo yya i na mitisiṛie yo yya i? Vakamwia: Yya mangi.

¹⁷Yesu kavaia: Kyasia niingeń mangi kilya kikee kya mangi. Na filya fikee fa Iṛuva niingeń Iṛuva. Vakandiikia koṛoń.

¹⁸Kyasia Vasadukayo vakanshea. Nawo vvandu vanumbuaa: Liifo iṛuka lya vafu ndi. Vakamwuṛa veenumbuaa:

¹⁹Llosha, Mose atisiṛia: Mwanamae wa nndu kamfwa karea-wo nka wamwi ataare mwana, mwanamae wamwi kyawara aore nka to, amu akooiye mwanamae wamwi ufwari.

²⁰Kyasia veeifoo vaseṛo mfungare vakee vana va nka umwi. Ulya wa mbele karwaa nka kafwa nta itia-wo mwana.

²¹Na ulya wa kavili kanrwaa kafwa nta itia-wo mwana. Na wa kararu nkuro da.

²²Nawo woose mfungare nta umwi andetia-wo ufwari. Ifurumia lya woose nka ulya nae kafwa.

²³Kyasia ifo iṛukioń lya vafu andevaań nka wa ungau kari ka iwo woose? Amu iwo woose mfungare veemmurwaa.

²⁴Yesu kaaṛua kavaia: A le mukee ireka se kiimba kya ikyo, fulya muteeshi mitisiṛie ana finya ya Iṛuva?

²⁵Amu ili vafu vakaa vaṛuke, vakialikaa ndi ana vakialikwaa ndi, kake vavaa sha vamalaika vakee ifo iṛuvewu.

²⁶Neefo mboniń ya vafu sheeli vaṛutwaa nta mwansoma se ifo kitabuń kya Mose, sheeli Iṛuva amwia alya ngumiń kanumbua: Nniń Iṛuva wa Abraamu na Iṛuva wa Isaki na Iṛuva wa Yakobo?

²⁷Kyasia ye ni Iṛuva wa vafu ndi, kake wwa vakee na muu. Kwa ikyo mwanreka deń.

²⁸Kasha umwi wa vaaṛia va mitisiṛie. Kaita veererianaa nae. Kamanya sheeli avaaṛua kisha. Kamwuṛa: A kari ka mavavaso woose llingali likee iroo kita engi?

²⁹Yesu kamwaṛua: Lya mbele llyo ili: Iwe Isiraeli aranya! Nndumi Iṛuva weru ni Nndumi umwi.

³⁰Nawe kunda Nndumi Iṛuva wafo na ngoo yafo yoose na nrima wafo woose na finya yafo yoose.

³¹Na lya kavili llyo ili: Kunda ungi sheeli kukukundie ku muni. Nta likiifo ivavaso likee inini kita iva ndi.

³²Mwaṛia ulya wa mitisiṛie kamwia: Nkisha, llosha, kwarera dede sheeli Iṛuva ni umwi nsi ana nta eefo ungi kitaare yye ndi.

³³Na inkunda na ngoo yoose na kwa imanya lyoose na kwa finya toose na ikunda ungi sheeli nndu akukundie ye muni, ikyo kikilie misimbika ya firasio foose fa misikye na fa ikoṛa na muro fikarongora.

³⁴Ili Yesu alolia amwaṛua na uṛango, kamwia: Iwe nta kukee kwaasha na umangi lwa Iṛuva ndi. Ana nta nndu akikaṛia imwuṛa kirero lingi kuuka io.

³⁵Numa Yesu andelosha ifo numba ya Iṛuva kaaṛua kanumbua: Nki ili vaaṛia va mitisiṛie vanumbuaa: Kristo mmwana wa Davidi?

³⁶Davidi ye muni anumbua kwa finya ya Mumuyo Nsongori: Nndumi aia Nndumi wakwa: Kaa rembo uko usha lwakwa, kumande nrwaa fituva fafo kwa si ya marende afo.

³⁷Davidi muni awaanga Nndumi. Kyasia avaań are mwana wamwi? Na syamu ilya iikusandiee-wo veelangiee nnu imwaranya.

³⁸Neeli eeloshaa ifo miloshień yamwi kavaia: Kusembekeń vaaṛia va mitisiṛie! Wo vakundaa iṛuaṛua vaṛee miseto myaasha na iisanwa vvandu singiṛeń,

³⁹na ikaa rembo fifumbiń fa mbele ifo numba ta iterevia na ivingia fifumbi fa mbele ili vakee imutuń.

⁴⁰Ni iwo vakee ilya numba ta misikeeti na kwa ukavili vakee itereva fiterewo faasha. Nawo vakooyaa uumisio lukee unini kita.

⁴¹Yesu kakaa rembo asumani na isanduku lyo lya isaṅiṛia misimbika ya numba ya Iṛuva. Kalla vandu kasa vakee irwaa-fo fesa tawo. Na masimba meengi akarwaa-fo shiingi.

⁴²Kasha nka umwi nkiva nae ni nsikeeti. Karwaa-fo senti ivili.

⁴³Nae kavaanga vanalosho vamwi kavaia: Nkya dede namuia: Nsikeeti uu nkiva arwaa-fo fiingi kita iva woose vanrwaa kunu isandukuń ilyo.

⁴⁴Amu iva woose vanrwaa-fo mafyaa a masaa awo, kake uu kwa ukiva lwamwi anningia foose awore, nafo mfo fikee fa ilela muu wamwi.