Read MMA SHIYYA Mariko 15 Bible Online

Mariko 15 - MMA SHIYYA bible

Mariko 15

¹Kwankya ngama vakohani vanini vakafukya kikwena andu emwi na masiingo a vandu na vaana va mitisiṛie na vayakyama woose. Vakafinga Yesu vakankurika vakandenrambikia kulya kwa Pilato.

²Pilato kamwuṛa: Iwe ni iwe mangi ya Vayuda? Nae kaaṛua kamwia: Ni iwe kwanumbua.

³Na vakohani vanini vakamfingia findo fiingi.

⁴Pilato kamwuṛa lingi: Kwaṛuaa nta kirero se? Lla te findo fo fiingi vakee ikufingia!

⁵Ana nta yaṛua kirero lingi. Kikaṛiikisa Pilato.

⁶Neeli kisuku kinini kiifikaa, eevaboṛomuyaa mfungwa umwi, ulya vankundie wo veni.

⁷Eeifoo nndu eevaangwaa Baraba, eefingiee andu emwi na vaṛiingi. Na kari ka uṛiingi lo vakava vawaa.

⁸Syamu ilya ikarwa nafo ikabooka intereva avatanie sheeli eeishiviee.

⁹Llyo Pilato avaaṛua eevauṛaa: Naare? Mufurie mmuboṛomuye mangi ii ya Vayuda?

¹⁰Fulya eeishii sheeli vakohani vanini vandiinga kiimba kya imwiria iriso.

¹¹Kake vakohani vanini vakakuria syamu ilya, sheeli llyo ṅwana avaboṛomuye Baraba.

¹²Pilato kaaṛua lingi kavaia: Ntaniaa ki uu mukee ivvaanga mangi ya Vayuda?

¹³Vakaṛoṛongya lingi: Nkabie nsalabeń!

¹⁴Kyasia Pilato kavaia: A ni ukasha lungalu atanie? Nawo vakaengeṛia nnu iṛoṛongya: Nkabie nsalabeń da!

¹⁵Kyasia Pilato eefuriee ikushiisa na syamu ilya kavaboṛomuya Baraba. Kavavasa Yesu akabwa na ngova. Numa kanrambikia andekabio̱ nsalabeń.

¹⁶Na vasikari vakankurika vakamwata ifo wooṛo ya numba ya mwitoṛo. Vakavaanga ikamba lyoose lya vasikari vakusandie-wo.

¹⁷Vakawika nseto utondoṛie vakaoka uṛeto lwa miinga vakawika nrweń.

¹⁸Vakabooka imwisana: Mangi ya Vayuda kia!

¹⁹Vakankaba ireko lya nrwe vakammishia manyiiri. Vakafwiṛia nri vakawwoya si na kisangu.

²⁰Neeli vandemaa imweetia kuri, vakamwambua nseto ulya utondoṛie vakawika miseto yamwi meni. Vakansomuta wooṛo vandenkabia nsalabeń.

²¹Vakakooya nndu eekee iira auka nremiń, nae nSimon wa kulya Kirene, nae nndee wa Alekisandiro na Rufo. Vakankabiṛia antaṛe nsalaba wamwi.

²²Vakamunnde kumande andu eevaangwaa Goligota, nkimwi na Kiboṛoń kya nrwe.

²³Vakafura inniinga mfinyo usaandi na nri wa inanga, nta iwaria.

²⁴Vakankabia nsalabeń. Vakaava na miseto yamwi veekabiaa wuuku sheeli nndu woose arwaa ki.

²⁵Kyasia kyeeri kya saa isaru llyo vankabia nsalabeń.

²⁶Iifoo na mitisiṛie ya indiinga ye iitisiṛio̱o̱ kwa ule: Mmangi ya Vayuda.

²⁷Vakansanda na fisoki fivili vakankabia nsalabeń andu emwi nawo, umwi taari ya uko usha na ungi taari ya uko lwamwi umuso.

²⁸Kyasia llyo kindefika kirero kilya kiirerio̱o̱: Antalio̱ andu emwi na varekwa.

²⁹Na valya veekee iira vakanruma veesenisasenisaa mirwe yawo veereraa: A ba! Iwe muburua numba ya Iṛuva na iitana lingi kari ka mikonu iraru!

³⁰Kukiṛe ku muni kwaoloka nsalabeń!

³¹Mfo kuro na vakohani vanini vakanredia wo veni na veni andu emwi na vaaṛia va mitisiṛie. Vakanumbuaa: Andekiṛa vengi, nta imakii ikukira muni.

³²Yye Kristo, yye mangi ya Isiraeli! Kyasia aolokeń nsalabeń alli kuri. Neese tilolie na imwirikia. Na akwaa vvalya veekabiee nsalabeń andu emwi nae vakamweetia.

³³Ili indefika saa isasaru, ukawa llema urukefi loose kumande saa kyeenda.

³⁴Na kyeeri kya saa kyeenda Yesu karosa ununga lwamwi na finya: Eli, Eli lama sabaktani? misendie yayo nkimwi na: Wui Iṛuva wakwa, wui Iṛuva wakwa, nki ili kwanshirea?

³⁵Na kiindi kya valya veeselelee-wo vakaita kuri vakanumbua: Akee ivaanga Elia.

³⁶Na umwi kaenda eerishaa kandennde kimiminda mura kakiishuṛa mura udooka. Kafingia irekoń kafura inrita eereraa: Shitień! Tille akwaa Elia ashaa imwolota-fo.

³⁷Kyasia Yesu kaṛoṛo-ngya lingi na ununga unini kanutuka.

³⁸Na isulia lia inini lyavanisie ifo numba ya Iṛuva likaranduka kuuka ule kumande si likava feenga fivili.

³⁹Na nshili ulya wa vasikari eeselelee io andesumana nae ili andelolia anutuka kuro, kanumbua: Nkue nndu uu eekee Mwana wa Iṛuva dede.

⁴⁰Veeyoo na vaka veeselelee-wo veellaa vakee kwaasha. Kari kawo eeyoo Maria Magidalena na Maria mae wa Yakobo mwanawo wa Yose na Salome.

⁴¹Iwo wwo veerianii nae lia akee kulya Galilaya na indundia. Veeyoo na vengi veengi varwe nae kumande Yerusalemu.

⁴²Neeli kuve ukwawuń, na nkonu ulya ni nkonu wa ikusongosia, nto nkonu usoṛwa nSabato,

⁴³kasha na-wo Yosefu wa kulya Arimatia, eekee nnini awore tikisi. Nae ni nndu averea umangi lwa Iṛuva. Kakaṛia kaaka kulya kwa Pilato kantereva vvili wa Yesu.

⁴⁴Pilato kaṛiika ili andeita amfwa. Kavaanga nnini ulya wa vasikari kamwuṛa, akwaa amfwa kyaambo kyaasha.

⁴⁵Neeli andemaa isunundio̱ ni nsikari ulya, kaniingia Yosefu nnyiṅa ulya.

⁴⁶Nae kandeuṛa nseto wa bafuta kamwolota-fo. Kamwiṛina na nseto ulya kamwaṛa mbangeń ivashie iweń. Kabiṛingitia-wo iwe lya iraya mwaango wa mbanga ilya.

⁴⁷Na Maria Magidalena na Maria mae wa Yose vakalla alya aṛikwa.