Read MMA SHIYYA Mariko 16 Bible Online

Mariko 16 - MMA SHIYYA bible

Mariko 16

¹Kyasia ili nkonu wa Sabato undemaa iira, llyo Maria wa kulya Magidala na Maria mae wa Yakobo na Salome vakandeuṛa mafura a kisaamu a indemwamba.

²Na nkonu wa mbele ngama kio vakakwimboo vakafika mbangeń ili kundetaṛakana.

³Vakakurera wo veni na veni vakanumbua: Ni i andetibiṛingitiaa-wo iwe lia liraye mbanga?

⁴Ili vandella, vakakooya iwe ni ibiṛingite-wo, amu likee inini nnu.

⁵Ili vandeaka mbangeń, vakalolia mwana nkoo akee rembo io taari ya uko usha aṛee miseto myelwa fyu. Vakaawukwa mmuu.

⁶Nae kavaia: Manya mutaawukwa mmuu! Mukee iṛuya Yesu wa Nasareti ulya andekabio̱ nsalabeń. Akiifo ia ndi, anduka. Lleń te alya veemwaṛiee.

⁷Neeni endeń mundeia vanalosho vamwi na Petiro, sheeli amwiriaa mbele yenda Galilaya. Ifo mfo mundelloliaa sha lia amuia.

⁸Vakasomuka mbangeń veenshaa, fulya veeworwaa wweṛei na utaṛawu, nta iia nndu kindo, fulya veeṛee nnu.

⁹Ili Yesu andemaa iṛuka ngama kio ya nkonu wa mbele usoṛie Sabato, kakworusa lya mbele Maria Magidalena, ni ulya amwuta mimuyo ilya mikasha mfungare iiwworee.

¹⁰Nae kaenda kandeongoya valya veekee andu emwi na Yesu veeishiṛaa na iiya.

¹¹Neeli vandeita sheeli eefo na muu na ilolio̱ yye, nta imwirikia.

¹²Numa yayo kakworusa vaaroe vengi vavili kwa fwana ingi. Nawo vairiee shia ya yenda nremiń.

¹³Nawo vakaenda vakandeongoya vaaroe valya vengi, nta nawo ivairikia.

¹⁴Lya ifurumia Yesu kakworusa vaseṛo vamwi valya ikumi na umwi ili veelyaa shoonga. Kavakandara, fulya ikusura lyawo likee yaangu na ngoo tawo tikee shuumu, fulya valea iirikia valya vallolia, ili aṛuka kwa vafu.

¹⁵Kavaia: Endeń masangeń woose mundelosha vandu woose mboni shinuru ta ivakiṛa.

¹⁶Na ulya woose akusuraa Iṛuva na ibatiswa, ito akiṛwaa, na ulya atankusuraa aumisio̱o̱ amamie.

¹⁷Na myorusie ilya ya finya ilunganaa na valya vakusuraa yyo ii: Na irina lyakwa vaumbutaa mimuyo mikasha, vareraa na mirerie miiya.

¹⁸Vaimboo shoka na maako. Na kwakooya vanwaa kindo kifisie kya ivawaa, kivakasheesaa ndi. Vaekeṛiaa vandu valole maako nawo vakiaa.

¹⁹Kyasia ili Nndumi andemaa irera nawo kuri, kasaamiswa iṛuvewu kakaa rembo taari ya uko usha lwa Iṛuva.

²⁰Na vaseṛo vamwi vakaenda vakakwanisa mboni shinuru ta Iṛuva koose. Na Nndumi katana mashoṛa andu emwi nawo kakaarisa firero filya fawo na myorusie ilya ya finya iilunganii nawo.