Read MMA SHIYYA Mariko 2 Bible Online

Mariko 2 - MMA SHIYYA bible

Mariko 2

¹Neeli indesia mikonu myaangu, kafika lingi Kaperinaumu. Vandu vakaita sheeli akee kyeń.

²Lia eni vakakusandia-wo vandu veengi nta ilolika mwaanya kumande io mwaangoń. Nae kavaongoya firero fa Iṛuva.

³Vakasha vandu vakamwendee nndu atoṛokombye meengo ariwa vvandu vaani.

⁴Neeli vandelemwa imfita io akai kiimba kya wiingi lwa vandu, vakatota kai ka numba na alya eekee nawo. Neeli vandemaa itota vakaolota na-wo kiraa kilya kileeyo̱ ni nndu ulya atoṛokombye.

⁵Ili Yesu andelolia ikusura lyawo, kaia nndu ulya atoṛokombye meengo: Mwanakwa kwammaa itio̱ mareko afo.

⁶Na vaaṛia valya va mitisiṛie kiindi veeyoo rembo vakakusaṛa mirimiń yawo:

⁷Nki ili uu arera kuri? Anruma Iṛuva. Ni i amakii yuta nndu mareko kitaare ni Iṛuva muni?

⁸Lia eni Yesu kamanya ngooń yamwi sheeli vakee ikusaṛa kuro ifo mirimiń yawo kavaia: Naamu ki ili mukee ikusaṛa kuro ifo mirimiń yanu?

⁹Nkingaki kyaangu naań? Ni iia uu atoṛokombye meengo: Kwammaa yutwa mareko afo ana ni inumbua: Kwimboo kurike kiraa kyafo kwende?

¹⁰Kake manyiń Mwana wa nndu awore finya kunu isangeń ya yuta vandu mareko. Llyo aia nndu ulya atoṛokombye meengo:

¹¹Nakwia: Kwimboo kukurike kiraa kyafo kwende kyeń kwafo!

¹²Lia eni kakwimboo kakurika kiraa kyamwi kasomuka-fo mbele yawo woose. Na woose vakaṛiika koṛoń. Vakaitikisa Iṛuva veenumbuaa: Tallolia kindo sha iki kutu ndi.

¹³Nae kakwimboo lingi kaenda mbaai ya nruva ilya. Isyamu lyoose likanshea, nae kavalosha.

¹⁴Kaira na mbele kalolia Levi mwana wa Alufayo akee rembo numba ya isaṅiṛia kyaalo. Kamwia: Shilatia! Nae kakwimboo kansoṛa.

¹⁵Neeli eekee shoongeń numba kwa nndu ulya, llyo vasaṅiṛia kyaalo na varekwa veengi vandekaa shoongeń andu emwi na Yesu na vanalosho vamwi. Amu vveengi vandelatia.

¹⁶Vaaṛia va mitisiṛie veekee vaaroe va Vafarisayo ili vandelolia eelyaa shoonga na vasaṅiṛia kyaalo valya na varekwa, vakaia vanalosho vamwi: Nkiki ili akee ilya shoonga na inwa andu emwi na vasaṅiṛia kyaalo wo na varekwa?

¹⁷Na Yesu kaita kavaia: Valya vatalole vaṛuyaa mwaanga ndi kita valya valole. Nansha ivaanga iwo vasumani ndi kita iwo varekwa.

¹⁸Vanalosho va Yohane na valya va Vafarisayo veekootoyaa. Vakasha vakamwia: Naamu ki ili vanalosho va Yohane na va Vafarisayo vakootoyaa, kake vanalosho vafo vatakootoyaa-wo?

¹⁹Yesu kavaia: A valya vaaṛie nrumi ya wali vamakii ikootoya are neekai nndumi wa wali akee andu emwi nawo? Kyeeri kyoose vakee na nndumi wa wali vamakii ikootoya ndi.

²⁰Kake mikonu ishaa ili valakaniswaa na nndumi wa wali, nkonu to llyo vakootoyaa.

²¹Nta eefo nndu afumiaa kirami kya nseto mwiya nsetoń nkuu ndi. Kwakooya adonyaa-wo kilya kiiya kyarawa-wo kikasheesa isaṛa lia ikuu. Na alya anderanduka eendeaa kita.

²²Ana nta nndu akundaa yengia mfinyo mbolokoń shikuu. Amu kaengia-fo mfinyo, urandaa mboloko. Na mfinyo wirikaa na mboloko tikashaa. Kake mfinyo mwiya wengio̱o̱ mbolokoń shiiya.

²³Ili eekee iira manremiń a ngano nkonu wa Sabato, vanalosho vamwi vakabooka ifukya fyaa, ili veendaa na shia.

²⁴Vafarisayo vakamwia: Lla te, naamu ki ili vakee itana kindo kitaare muumu nkonu wa Sabato?

²⁵Nae kavaia: A nta mwansoma se, sheeli Davidi andetana lia andekooya antuṛa kindo kya ilya kawarwa nsoto andu emwi na valya eerianii nawo?

²⁶Sheeli andeaka neefo numba ya Iṛuva kyeeri kya nkohani ulya nnini Abiatari kalya mikate ilya ya kyorusyo. Nayo itawore muumu wa iliwa ni nndu kita vakohani veni. Nae kaavia na valya ariani nawo.

²⁷Nae kavaia: Nkonu wa Sabato underawa-fo kiimba kya nndu, ni nndu anderawa-fo kiimba kya nkonu wa Sabato ndi.

²⁸Kyasia Mwana wa nndu yye Nndumi na wa nkonu wa Sabato.