Read MMA SHIYYA Mariko 6 Bible Online

Mariko 6 - MMA SHIYYA bible

Mariko 6

¹Kauka ifo kafika urukeń lwa kwawo kulya aṅinia. Na vanalosho vamwi vakansoṛa.

²Ili nkonu wa Sabato undefika, kabooka ilosha ifo numba ya iterevia. Na vandu vandemwaranya vveengi vakaṛiika veenumbuaa: A nndu uu nkwi andeuta ifi? Na uṛango lu aniingyo̱ luukie kwi? A nkiki iki kya maṛiikiso va manini akee yatana na maako amwi?

³A uu ni ulya se eevashaa firi, nae mmwana wa Maria na mwanamae wa Yakobo na Yese na Yuda na Simon? Na vefuvamae wwo iva se vakee kweru? Vakava na ilomi kwamwi.

⁴Yesu kavaia: Mwauya kisuku atuṛaa tikisi ndi kita ifo muṛiń wamwi muni na ifo ufwariń lwamwi na kyeń kwamwi.

⁵Nae nta akimakii itana kindo kya finya nta kimwi ndi kita vandu vatanyari vaangu andevaekeṛia maako kavakiṛa.

⁶Nae kaṛiika, fulya vandelemwa inkusura. Kava mulengetialengetia ifo miṛiń miri eeloshaa.

⁷Kavaanga valya ikumi na vavili vashe kwamwi. Kabooka ivaruma vavili vavili. Kavaniinga finya ya yumbuta mimuyo mikasha.

⁸Kavavavasa vatakurike nta kindo kya ifo shia kita mbiiri sheni da, nta kishawu, nta mboloko, nta pesa ifo kiroshoń.

⁹Kake endeń muṛee faaru, manya mutaṛaa miseto ivili.

¹⁰Kavaia: Numba yoose mwakaa kundo koose kaań-fo kumande muukaa-fo.

¹¹Na kundo koose vatamuwariaa ana vatamuaranyaa, ili muukaa-fo vaangatyeń funga ya marende anu, ive mirambuye kwawo.

¹²Vakaenda vakandekwanisya vandu vailashike mirimiń.

¹³Vakaumbuta mimuyo mikasha miingi vakaamba vandu veengi valole mafura vakavakiṛa.

¹⁴Na mangi Herode kaita mboni ta Yesu, fulya irina lyamwi lyeemiiraa nsendo. Kanumbua: Yohane mbatisa anduka kwa vafu. Nkyo kiimba finya to ta iṛiikisa tikaṛunda mashoṛa kari kamwi.

¹⁵Na vengi vakanumbua: Ni Elia. Na vengi vakanumbua: Uu ni nndu mwauya kisuku avakani na vaauya fisuku valya va mbele.

¹⁶Ili Herode andeita, kanumbua: Ni Yohane ulya nndenrumbua nrwe, yye anduka lingi.

¹⁷Amu Herode ye muni eenrumaa vandu vandewara Yohane. Vakanṛwaa kifingyoń kiimba kya Herodia ulya eekee nka wa mwanamae Filipo. Nae eemwalikiee.

¹⁸Amu Yohane eemiiaa Herode: Kisumani kurwaa nka wa mwanamaa ndi.

¹⁹Na Herodia ulya kanduiya ntambwe wa iwwaa katuṛa.

²⁰Amu Herode eeṛee Yohane, fulya eeishii sheeli ni nndu nsumani, akee na nsongori. Kawwara na inringa. Neeli andemaa imwaranya, kataṛaaka nnu keengi. Kava mumwaranya na ifura.

²¹Ukafika nkonu uwore mwaanya nsha ukava na kisuku kya nkonu wa iwonika lya Herode. Kasongosia imutu kaniinga ngyama yamwi na vashili vamwi va fira na vandu vanini va nrwe va kulya Galilaya.

²²Llyo mwana ulya wa sambuṛa wa Herodia kasha na-wo kaara. Kasenya Herode andu emwi na valya veekee rembo nae imutuń. Mangi kaia mwana ulya wa sambuṛa: Shitereva kindo kyoose kukundie, nań nkikuniingaa.

²³Kalliya na ikite kamwia: Kyoose kushiterevaa nkikuniingaa na akwaa nkyeenga kya umangi lwakwa.

²⁴Nae kasomuka kandeuṛa mae: A natereva kiki? Nae kamwia: Ni nrwe wa Yohane mbatisa.

²⁵Lia eni kasha byań kwa mangi kantereva eemwiaa: Mfurie kushiniinge nrwe wa Yohane mbatisa alli kuri, ushe ukee mwashoń.

²⁶Mangi kanaria nnu, kake kiimba kya ikite eemmuliyaa na kiimba kya vandu valya eekee nawo imutuń andemakii illea ndi.

²⁷Lia eni mangi karuma nringi wamwi kavvavasa andennde nrwe wamwi.

²⁸Nae kaenda kandenrumbua nrwe wamwi kulya kifingyoń kaunnde ukee mwashoń. Kaniingia mwana ulya wa sambuṛa. Na mwana ulya wa sambuṛa kaurwaya mae.

²⁹Ili vanalosho vamwi vandeita, vakaenda vakandeimboo nnyińa wamwi vakandeuṛika mbangeń.

³⁰Na vanalosho valya vakakusandia alya Yesu akai. Vakamwongoya mboni ta filya vandetana na filya foose vandelosha.

³¹Nae kavaia: Oṛeshoń ini mu veni kyaanya kyanu andu vatayo vandu mwimuye kinnya. Fulya veeifoo vandu veengi veeshaa na yenda, nawo nta ilolia mwaanya wa ilya shoonga ndi.

³²Vakaenda variwa nngalava vakafika kundo kwaasha na vandu vakaa-fo kyaanya kyawo.

³³Vandu veengi vakavalolia veendaa vakamanya sheeli wwo. Nawo vakaenda na marende veerishaa vauka miṛiń yoose. Vakabooka-wo ifika.

³⁴Ili andeoloka ngalaveń, kalolia isyamu iingi nnu kavalilia, fulya veekee sha mburu titawore mwisi. Kabooka ivalosha fiingi.

³⁵Kyasia ili nkonu wankwinika, vanalosho vamwi vakanshea vakamwia: Ia tikai mbateń, na alli kukee iila.

³⁶Otoṛa vandu va vakwendie nndeń na fimiṛiń, neefo vakuuṛie-fo shoonga.

³⁷Nae kava-aṛua kavaia: Vaniingeń ini shoonga! Vakamwia: Kulla tikandeuṛa mikate ya shilingi mayana avili tivaniinge valye?

³⁸Kavaia: Moore mikate inga? Endeń mundella! Ili vandemaa imanya, vakanumbua: Ni iraanu na makunga avili.

³⁹Kavavavasa vakaarise woose rembo matorototoroto ifo maṛeń mashu.

⁴⁰Vakakaa rembo makamba makamba, ia iyana na ia makumi araanu.

⁴¹Kawaria mikate ilya iraanu na makunga alya avili. Kalla iṛuvewu kaana Iṛuva. Kafukyafukya mikate ilya vavaavie. Na makunga alya avili kavaavia woose.

⁴²Nawo vakalya woose vakawuura.

⁴³Vakasańiṛya na fibeṛeshu filya fasaa fikaishua mikusha ikumi na ivili na fa makunga alya da.

⁴⁴Na valya valye mikate ilya veekee womi fiku firaanu.

⁴⁵Lia eni kaitika vanalosho vamwi vasaame ngalaveń vaire mbele vaṛuke kwa kulya kumande Betisaida, nae alakane na isyamu lia.

⁴⁶Ili andemaa ilakana nawo, kaenda uroń indeterevya-fo.

⁴⁷Ili kundeila, ngalava ikee karikari ka nruva. Nae muni eekee mbaai ya nruva kundo kuumu ye muni.

⁴⁸Kalolia veeatarwaa mmburaato, amu isumani nawo vakalemwa irwaa ngalava na mbele. Kyasia ili indefika kala ya kaani ya iringa kio, kavalatia eendaa kwa ule ya nruva kafura ivairia mbele.

⁴⁹Nawo ili vandellolia eeṛuaa kwa ule ya nruva, vakakusaṛa nkiṛishwe vakaishiṛa.

⁵⁰Ili woose vallolia, vakataṛaaka. Lia eni karera nawo kavaia: Uywań mmuu, nniń tee! Manya muteeṛee!

⁵¹Kasaama ngalaveń kulya vakai. Na mburaato ikamanda. Nawo vakakyangika na iṛiika nnu mirimiń yawo.

⁵²Amu veemaaṛukyoo mmisendie ya mikate ilya ndi, fulya mirima yawo ikee myumu.

⁵³Vakaṛuka kwa kulya vakafika urukefi lwa Genesareti vakafingya-wo ngalava.

⁵⁴Ili vandeuka ngalaveń, lia eni vandu vakammanya.

⁵⁵Vakaenda ree veelengetyaa uruka lua loose. Vakabooka iimboo valya valole na firaa na yenda andu woose vandeita sheeli mfo akai.

⁵⁶Na andu oose eekee yenda kamaaka fimiṛiń ana miṛiń ana manremiń, vakarwaa valole singiṛeń. Vakantereva vabaani na akwaa ni nkyendu wa nseto wamwi. Na valya woose vandembaana vakakia.