Read MMA SHIYYA Mariko 8 Bible Online

Mariko 8 - MMA SHIYYA bible

Mariko 8

¹Mikonu ilya lyakusandia lingi isyamu iingi lya vandu, nawo veeworee shoonga ya ilya ndi. Nae kavaanga vanalosho vamwi kavaia:

²Navavyo̱ mmuu kiimba kya vandu va, fulya vansinda kwakwa mikonu iraru sele vataare kindo valya.

³Na kwakooya navaotoṛa kuri vaende kyeń kwawo vataare kindo vakomba, vamamiaa ifo shień! Na kiindi kyawo vaukie kwaasha.

⁴Vanalosho vamwi vakamwaṛua: Aukaań kwi nndu amakii iwuurusa vandu va na shoonga kunu bateń!

⁵Kavauṛa: Mmikate inga muwore? Vakamwia: Ni mfungare.

⁶Kavavasa isyamu lia likaa rembo. Kawaria mikate ilya mfungare kaana Iṛuva. Kaifukyafukya kaniingia vanalosho vamwi vavaavie. Vakaavia isyamu lia.

⁷Lingi veeworee na tukunga twaangu. Katuniinga mboṛa kanumbua: Na itu vaavień.

⁸Vakalya vakawuura. Vakasaṅiṛia nsaaṛo ulya undesaa ukaishua mikusha mfungare.

⁹Na vandu valya veekee sha fiku fiini. Kavaniinga muumu vaende.

¹⁰Lia eni kasaama ngalaveń andu emwi na vanalosho vamwi kafika miingoń ya Dalimanuta.

¹¹Vafarisayo vakanshea vakabooka ivingana nae. Vakaṛuya myorusie yukie iṛuvewu kwamwi veemweleliaa.

¹²Kanaria ifo nrimiń wamwi kanumbua: Naamu ki ili kishuku ki kikee iṛuya myorusie? Nkya dede namuia: Kishuku ki nta kyoruswaa myorusie ndi.

¹³Kavatia-wo kaaṛukia ngalaveń kaṛuka kwa kulya.

¹⁴Vanalosho vamwi vakakooya vanrekyo̱ iimboo mikate ya kishawu. Na ifo ngalaveń nta kindo kiifo kita nkate umwi tubu.

¹⁵Nae kavaikimba eenumbuaa: Manyiń mukusembeke ndooka wa Vafarisayo na ndooka wa Herode!

¹⁶Vakavingana wo veni na veni: Mfulya titarie mikate.

¹⁷Na Yesu kamanya kavaia: Naamu ki ili mukee ivingana kya fulya mutarie mikate? Mwamaaṛukio̱ ana mwammanya ndi? A ngoo tanu nshuumu kumande alli?

¹⁸Moore miso mutalolie. Moore marwi muteesile. Ana mukikumbuye ndi?

¹⁹Lia nndeavia vandu valya fiku firaanu mikate ilya iraanu, a mikusha yaishua fisaaṛo filya fa fibeṛeshu ni inga? Vakamwia: Ni ikumi na ivili.

²⁰A lia nndeavia valya fiku fiini mikate ilya mfungare, mmikusha inga indeishua fisaaṛo filya findesaa? Vakamwia: Ni mfungare.

²¹Nae kavaia: Niikai mutandeitumuso?

²²Numa vakafika kulya Betisaida. Vakamwendee nndu ndoń vakantereva ambaani.

²³Kawara uko lwa ndoń ulya kanrwaa wooṛo ya muṛi. Kamishia mare misoń amwi. Kamwekeṛia maako amwi kamwuṛa: Kulolie kindo?

²⁴Nndu ulya kataṛambua miso kanumbua: Llolie vandu da, kake vakee sha miri ikee yenda.

²⁵Llyo amwekeṛia maako lingi misoń amwi. Nae kalla koroo kashia kalolia findo foose na baa.

²⁶Nae kavvikia muumu aende kyeń kwamwi kamwia: Manya kutaakie nta muṛiń.

²⁷Llyo Yesu akwimboo ariani na vanalosho vamwi. Vakafika fimiṛiń fikee kufui na kulya Kaisaria ya Filipo. Neefo shień kauṛa vanalosho vamwi: A te vandu vanumbuaa nkee i?

²⁸Vakamwaṛua vakamwia: Veefo vanumbua: Iwe ni Yohane mbatisa, na vengi: Iwe ni Elia, na vengi: Iwe ni umwi wa vaauya fisuku.

²⁹Nae kavauṛa: A ini munumbuaa niń nkee iń? Petiro kaaṛua kamwia: Iwe ni iwe Kristo.

³⁰Nae kavaikimba, kaaṛa vataie nndu ikyo kyamwi.

³¹Numa kabooka ivalosha sheeli kyawara Mwana wa nndu aliswa ukiva wiingi vvandu na ilewa vvakohani vanini na vaaṛia va mitisiṛie na iwalwa, na numa ya mikonu iraru aṛuke.

³²Kavaia kirero kyo na baa. Petiro kanrwaa kyaanya kannaya.

³³Nae kaaṛukia vanalosho vamwi kavalla. Kanaya Petiro kanumbua: Uya numa yakwa Satana! Amu iwe kukee ikusaṛa fa Iṛuva ndi, mfa kivandu!

³⁴Kavaanga isyamu andu emwi na vanalosho vamwi kavaia: Nndu kakunda ishisoṛa niń, kyawara akwimi mifurie yamwi, akurike nsalaba wamwi ashisoṛe.

³⁵Amu nndu woose akundie ikiṛa muu wamwi auretaa. Na ulya woose asuaa muu wamwi kiimba kyakwa na kiimba kya nrumi ilya shisha ya Iṛuva, ito aukiṛaa.

³⁶Ana nkiki kyelekaa nndu, kwakooya awaraa isanga lyoose na mbusha kareta nrima wamwi? Ana nkiki nndu aniingiaa ataue nakyo nrima wamwi?

³⁸Amu nndu woose ashiiriaa sonu na firero fi fakwa kari ka kishuku ki kya waaisi na mareko, na Mwana wa nndu amwiriaa sonu, ili ashaa na unini lwa Ndee andu emwi na vamalaika vasongori.