Read MMA SHIYYA Mariko 9 Bible Online

Mariko 9 - MMA SHIYYA bible

Mariko 9

¹Nae kavaia: Nkya dede namuia: Veefo vandu kari ka iva vaselele ia vataloliaa ufu kutu kumande vallolia umangi lwa Iṛuva lwishaa na finya.

²Numa ya mikonu irindaru Yesu kakurika Petiro na Yakobo na Yohane. Kavarosa uroń waasha kundo vakee kyaanya kyawo wo veni. Kailashika fwana yamwi mbele yawo.

³Na miseto yamwi ikavarama ikava myeelwa fyu, ateefo nta musangya umwi wa urukefi amakii iilisa kuro.

⁴Vakashewa ni Elia andu emwi na Mose. Nawo vakarera na Yesu.

⁵Petiro kaia Yesu: Llosha, neendo ise tikee ia. Neese titani matengo araru, limwi lyafo na limwi lya Mose na lya Elia limwi.

⁶Amu eeishii kilya akee irera ndi, fulya vawarwa wweṛei.

⁷Lia eni iṛumbe likasha likavaendie nruve. Na ununga lukauka iṛumbeń lia lwireraa: Uu mMwana wakwa ninkundie, mwaranyiń ye!

⁸Lia eni ili veeiṅuṛuṅuṛuu, nta ilolia nndu kita Yesu muni da akee nawo.

⁹Neeli veeolokaa uroń kavavavasa vataongoye nndu kilya valolia kumande Mwana wa nndu aṛukaa kwa vafu.

¹⁰Vakawara kirero kilya veeuṛanaa wo veni: A iṛuka li kwa vafu misendie yayo nkiki?

¹¹Vakamwuṛa vakanumbua: Nkiki ili vaaṛia va mitisṛie vanumbua: Kyawara Elia ashe mbele?

¹²Kaaṛua kavaia: Nkya dede Elia ashaa mbele aaṛue findo foose fiiya. Kake andu emwi na iki naare kiti-siṛień kya Mwana to wa nndu, sheeli atuṛulwaa nnu na iilwa?

¹³Kake niń namuia: Elia ammaa isha, nawo vakantania sheeli veefuriee, sheeli atisiṛyo̱.

¹⁴Ili vandefikia vanalosho valya vengi, kalolia isyamu inini livalengetie na vaaṛia va mitisiṛie veeaṛuyanaa nawo.

¹⁵Lia eni isyamu lyoose ili vallolia, vakaṛiika. Vakanrishia vakamwisana.

¹⁶Nae kavauṛa: Nkiki mukee yaṛuyana nawo?

¹⁷Na nndu umwi kari ka isyamu lia kamwaṛua: Llosha, naminnde mwana wakwa kwafo aworwa mmumuyo nkasha untumuye tumu.

¹⁸Na kyeeri wammukwimboyo untuulaa si. Na mwana kannde mavia na irafunia mayoo na inaanaa kanaanaa deń. Nań nanrera na vanalosho vafo vauumbute, nta imakii.

¹⁹Yesu kaaṛua kavaia: Ini kishuku kitaare ikusura, nkaa neeni kumande iri ki? Mmusisiriaa kumande iri ki? Munndeń na ia nkai!

²⁰Vakamunnde na kwamwi. Neeli mumuyo ulya Tindelolia Yesu, lia eni ukasikasika mwana. Nae kawa si kakwalaala eenndee mavia.

²¹Yesu kauṛa vaava wamwi: A nkuuka iri ki wawwara? Kanumbua: Nkuuka utiń lwamwi.

²²Na keengi umwe-eṛaa muroń na mureń amu unrete. Kake kwakooya iwe kumakii kindo, teelekie kwitililiaa!

²³Yesu kamwia: Ili kwanumbua: Kwakooya kumakii! Manya findo foose fivaa kwa ulya akusuraa.

²⁴Lia eni ndee wa mwana ulya karosa ununga kanumbua: Nkusurie, na alya llemyo̱o̱ ikusura sheelekia mbee!

²⁵Ili Yesu andelolia sheeli vandu kinga vakee yengeṛia inrishia, kanaya mumuyo ulya nkasha kauia: Iwe mumuyo uteeshi irera na uteesile, niń nakuvavasa mwuke, nta kutakimwuiye lingi ndi.

²⁶Ukaṛoṛongya ukansikasika nnu ukamwuka. Na mwana kava sheeli amfwa. Na akwaa wengi vakanumbua: Ankumba muu.

²⁷Kake Yesu kawwara uko kamwimboo. Nae kasalala.

²⁸Neeli andeaka numba, vanalosho vakamwuṛa kya-miń: Naamu ki ise titamakii yuumbuta?

²⁹Kavaia: Mikae yo imakii yumbutwa na kindo ndi kita na kiterewo tubu.

³⁰Vakakwimboo ifo vakaira kari ka Galilaya. Nae afura nndu amanyi ndi.

³¹Amu eekee ilosha vanalosho vamwi eevaiaa: Mwana wa nndu arambikyo̱o̱ maakoń a vandu, nawo vawwaa. Nae kammaa iwalwa, numa ya mikonu iraru aṛukaa.

³²Nawo nta yaṛu-kyo̱ nkirero kyo. Vakaeṛea imwuṛa.

³³Vakafika kulya Kaperinaumu. Neeli ansha na kyeń, kavauṛa: Nkiki mwikee ivingania kulya shień?

³⁴Vakasia do. Fulya kindo vandevingana wo veni na veni vakee shień ni ulya akee nnini kari kawo.

³⁵Kakaa rembo kavaanga valya ikumi na vavili kavaia: Kwakooya nndu afurie iva wa mbele, kyawara ave wa numa kita woose na muṛundia woose.

³⁶Nae kannde mwana kanseṛeesa karikari kawo. Kanshukuṛa kavaia:

³⁷Nndu awwaria kimwana kimwi sha iki eeshikumbuaa niń, ito anshiwaria niń. Na nndu ashiwaria niń, nniń ashiwaria ndi, kake ni ulya andeshiruma.

³⁸Yokane kamwia: Llosha, tindelolia nndu eeumbutaa mimuyo mikasha eesendaa irina lyafo, nae atakee nndu alungani neese. Neese tikamwima.

³⁹Yesu kanumbua: Manya mutamwimi! Amu eefo nndu atanaa kindo kinini eesendaa irina lyakwa na imakii ishirera lingi kikasha ndi.

⁴⁰Nndu atatileye, ito wwa taari yeru.

⁴¹Amu ulya woose amurita mura na umbata kiimba kya ishikumbua niń, fulya mukee va Kristo, nkya dede namuia: Akaa atuṛe isina lyamwi kutu ndi.

⁴²Na ulya woose atevetaa umwi wa iwo vannya vashikusurie, llyo ṅwana afingyo̱ isewe sungoń yamwi na yeeṛwa nruveń.

⁴³Na uko lwafo lukankuteveta, luminyi! Llyo ṅwana yaka muuń kutuṛie yeeṛo limwi kita iva na maako avili na yeeṛwa muroń utarunyikaa.

⁴⁴Nafo mfo sava yawo itafwaa ana muro utarunyikaa.

⁴⁵Na urende lwafo lukankuteveta luminyi! Llyo ṅwana yaka muuń kutuṛie urende lumwi kita iva na marende avili na yeeṛwa iriniń lya muro utarunyikaa.

⁴⁶Nafo mfo sava yawo itafwaa ana muro utarunyikaa.

⁴⁷Na iriso lyafo likankuteveta liiṛue-fo kulikumbe! Llyo ṅwana yaka umangiń lwa Iṛuva kukee iboosho kita iva na miso avili na yeeṛwa iriniń lya muro.

⁴⁸Nafo mfo sava yawo itafwaa na muro utarunyikaa.

⁴⁹Amu munyu wa ilorisa nndu mmuro.

⁵⁰Munyu nkindo kisha. Kake munya ukavva kyoongio, muulorisaa na kiki? Veń na munyu kari kanu, mukaa na unambwe ini mu veni na mu veni.