Read MMA SHIYYA Luka 11 Bible Online

Luka 11 - MMA SHIYYA bible

Luka 11

¹Kyasia eekee andu alive katerevia-fo Iṛuva. Ammarisia mwanalosho umwi wamwi kamwia: Nndumi, tiloshe neese itereva Iṛuva, sheeli na Yohane andelosha vanalosho vamwi.

²Kavaia: Mukatereva Iṛuva numbueń kuri: Wui Nde, irina lyafo liindio̱. Umangi lwafo lushe.

³Kutiniinge nnu shoonga teru ta itisindisa.

⁴Kutitie na sile ta mareko eru, sheeli neese tikee itia valya vantirekio̱. Kutatiotoṛie tiwe nreyoń.

⁵Yesu kavaia: Eeifoo nndu eeworee ndoo yamwi. Kaenda kwamwi kio isomukoń karikari kamwia: Ndoo yakwa, nakutereva nnu kutu kushaakue mambumbu araru a mangolo a indeniinga mwini wakwa ashishea alli kio ki da arie kyaaṛo kyamwi. Nań natuṛa kindo kya inniinga.

⁶

⁷A mulla ini? Naare nndu ulya wa numba amwaṛuaa? Amwiaa: Kwashaatara! Numba yammaa iraywa na vana vakwa vammaa ilala. Nkimakii ikwimboo nkuniinge ndi.

⁸Amwaṛuaa kuro? Wode. Namuia: Na akwaa atakwimboo anniinge, lla ili eekee ndoo yamwi, akwimboo buṛu anniinge foose fintinye, fulya antereva nnu kutu.

⁹Na akwaa nniń namuiań: Tereveń amu muniingwaa. Ruyeń amu mukooyaa. Kabekabeń yoondi amu muruywaa!

¹⁰Fulya ulya woose akee itereva aniingwaa. Na ulya akee iṛuya akooyaa. Na ulya akee ikabakaba yoondi aruywaa.

¹¹A ini kunu kwanu mwana amakii itereva ndee imbumbu lya mangolo na ndee anniinge songoṛo ya iwe? Ana antereve ikunga na ndee anniinge shoka andu a ikunga?

¹²Ana antereve ngosho ya nguku na ndee anniinge nguluva andu a ngosho?

¹³Kyasiań kwakooya ini, mukee varekwa, mwishi iniinga vana vanu findo fisha, nkilanya se Nde yanu wa iṛuvewu aniingaa valya vakee intereva Mumuyo wamwi Nsongori?

¹⁴Nkonu umwi Yesu eekee yumbuta mumuyo nkasha uwore nndu ateeshi irera. Na mumuyo ulya nkasha ili wamwuka, Uyo nndu ulya eemakii irera. Na isyamu lia likaṛiika.

¹⁵Na kiindi kyawo vakanumbua: Ni ito nnini wa mimuyo mikasha, mBelisebuli, yye anniingie finya ya yumbuta mimuyo yo mikasha.

¹⁶Na vengi vakakunda avaoruse kiringisio kinini kya kiiṛuvewu veemweleliaa.

¹⁷Nae kamanya makusaṛo awo kavaia: Umangi loose lukankwava lo weni na weni, Uyo luvaa nrabu. Na numba ikankufukya kavili iwaa.

¹⁸Na akwaa nSatana kwakooya akwava kakukaba ye muni, a umangi lwamwi naare lusalalaań? Ili mwanumbua, mfinya ya Beelisebuli naumbuta nayo mimuyo ii mikasha.

¹⁹Kwakooya niń nkee yumbuta mimuyo mikasha kwa finya ya Beelisebuli, a vana vanu vaiumbutaa kwa finya ya i? Kyasia iwo wwo vamurambuaa.

²⁰Kake kwakooya ni nni wa Iṛuva naumbuta nato mimuyo mikasha, kyasiań na umangi lwa Iṛuva lwammaa imulikia.

²¹Ili shaamba iwore fiya famwi na iringa nafo numba yamwi, masaa woose awore akaa na kibua.

²²Kake kashewa nshaamba ingi inkilie finya ikakabana nae na iwinga, insokaa fiya filya famwi foose afikusurie na ifiavia vandu vamwi.

²³Nndu atakee wa taari yakwa nkituva kyakwa. Na ulya atakee isaṅiṛia andu emwi nań akee inyanyata.

²⁴Na mumuyo ito nkasha ukamuuka nndu wiraa kundo kuumu kutawore mura wiṛuyaa andu a iimuya. Ukantuṛa, ukanumbua: Nuuyaa kyeń kwakwa ifo nuukie.

²⁵Ili umaa yuya, ukakooya numba yamaangatwa na isongosio̱

²⁶Lia eni ukaenda ukandesha uriani na mimuyo ingi mfungare ikee mikasha kita to. Nayo ikaaka numba ilya ikakaa-fo. Na mboni ta ifurumia ta nndu to tivaa shikasha kita tilya ta mbele.

²⁷Kyasia ili eereraa kuro, nka umwi wa ifo isyamuń karosa ununga lwamwi kamwia: Ngoma simi ilya indekwira na mavele alya andekwosa.

²⁸Nae kanumbua: Nkya dede valya vakee va ngoma vvalya vaaranyaa kirero kya Iṛuva na ikiwara vakakiwara.

²⁹Ili isyamu lya vandu lindeengeṛia ikusaṅiṛia io akai, kabooka irera eenumbuaa: Kishuku ki kya alli nkikasha, fulya kikee iṛuya myorusie. Ana nta kiniingwaa ndi kita myorusie ilya ya mwauya fisuku Yona.

³⁰Amu sha lia Yona avia vandu va kulya Ninive myorusie, mfo kuro da na Mwana wa nndu aviaa kishuku ki myorusie.

³¹Na mangi ilya ya kika ya taari ya itate ikaa isalale andu emwi na vandu va kishuku ki, ili mwaandu ulya nnini ushaa, nae avaumisiaa. Fulya ye ashe auka marayoń a isanga, amu aaranye firero fa uṛango lwa Salomon. Neeni lleń te: Ia aiyo akilie Salomon.

³²Na vandu va Ninive vasalalaa nkonu ulya wa mwaandu andu emwi na kishuku ki, nawo vavaumisiaa. Amu wo vailashika kiimba kya miloshie ya Yona. Neeni lleń te: Ia aiyo akilie Yona.

³³Nta eefo nndu aataa taa kairwaa andu a kiṛisi ndi ana aifulutie mengetoń ndi. Kake aivanikaa kivanikoń, amu imulikie woose vaakaa numba.

³⁴Taa ya wili ni iriso. Kyasia kwakooya iriso lyafo ni inuru, na wili wafo nato ni nnuru. Kake kwakooya iriso lyafo lyawa ikasha, na wili wafo nato uvaa llema.

³⁵Kyasia lla langa yo ikee kari kafo, amu itave llema!

³⁶Kyasia kwakooya wili wafo uwore langa, lingi utawore andu a llema, wili wafo uvaa na langa kutu, sheeli na taa ikee ikumulikia na langa yayo.

³⁷Neeli eereraa kuro, Mfarisayo umwi kantereva aende kwamwi andelya shoonga. Kaaka numba kwa nndu ulya kakaa rembo shoongeń.

³⁸Ili Mfarisayo ulya allolia eelyaa shoonga kitaare ansangya maako, kariika.

³⁹Nndumi kamwia: Ini Vafarisayo musangyaa umbata na kyaasho kiwooṛo, kake ifo kari kanu mwishule soka na ukasha.

⁴⁰Ini mukee variṅani! Uu andetana fa kiwooṛo yye se andetana na fa kinumba?

⁴¹Kyasia filya fikee kari lilień nafo vandu, Uyo foose fivaa finuru kwanu.

⁴²Kake ushi ini Vafarisayo! Fulya ini muniingiaa kyeenga kya ikumi kya nunda na nyanya na filimu foose, kake mukaira mbaai mukatia-wo ushili usongori na ikunda Iṛuva. Ifi fivili fimuwara mutane kitaare mutiaa-wo filya fingi

⁴³Ushi ini Vafarisayo! Fulya ini mukundie ikaa rembo fifumbiń fa mbele numbeń ta iterevia na iisanio̱ vvandu ifo singiṛeń.

⁴⁴Ushi ini, fulya muvakani na mbanga ta vafu tirekekie na vandu vairaa kwa ule yayo vatatiishi.

⁴⁵Kyasia nndu umwi kari kawo eekee mwaṛia wa mavavaso kaaṛua kamwia: Llosha, kwarera kuro kwatiila neese.

⁴⁶Nae kanumbua: Na akwaa ni ini vaaria va mavavaso ushi neeni! Fulya murikaa vandu myaanda itafitikaa, neeni mu veni mubaanaa nta na nni wanu umwi ndi.

⁴⁷Ushi ini, fulya musongosiaa mbanga ta vaauya fisuku, na vaande yanu wwo vandevawaa.

⁴⁸Kyasia nkuro mukee irambua mitanie ya vaande yanu na isenywa yyo. Amu iwo wwo vandevawaa, neeni mukasongosia mbanga tawo.

⁴⁹Kwa kiimba kya ikyo uṛango lwa Iṛuva lwanumbua: ”Vvarumiaa vaauya na varumi. Nawo vawaa kiindi kyawo na ivaumbuta,

⁵⁰naamu usao lwa vaauya valya woose lundeiritwa kuuka isanga lintanwa luuṛwa kwa kishuku ki

⁵¹kuuka usao lwa Abeli kumande usao lwa Sakaria ulya awaywa kari ka kiraa kya ikoṛa firasio na numba ya Iṛuva. Ee namuia: Luuṛwaa kwa kishuku ki“.

⁵²Ushi ini mukee vaaṛia va mavavaso, fulya ini mundeuta-fo ufunguo lwa irua numba ya ikooya uṛango. Neeni mu veni nta yaka, na valya vafurie yaka nafo mukavaima.

⁵³Ansomuka-fo vaaṛia valya na Vafarisayo vakabooka imwiria ndewu shuu na imwaala na firero fiingi

⁵⁴Veellayaa si, vakooye kirero kyuka kaniń kamwi, amu vandiinge nakyo.