Read MMA SHIYYA Luka 15 Bible Online

Luka 15 - MMA SHIYYA bible

Luka 15

¹Kyasia vasaṅiṛia kyaalo veengi na vandu varekwa vashea Yesu vashemwaranya.

²Na Vafarisayo na vaaria va mitisine vakaṅṅuṅuria vakanumbua: Uu awariaa vandu varekwa na ilya nawo shoonga.

³Na Yesu kavakabia sumu eenumbuaa:

⁴A kunu kwanu eefo nndu awore mburu iyana kareta-wo imwi, nae atatiaa tilya makumi kyeenda na kyeenda usakeń, andeṛuya ilya irekie kumande aikooyaa?

⁵Nae kammaa iikooya kaiekeṛia meeveń kafura nnu.

⁶Neeli afikaa kyeń, avaangaa ndoo tamwi na vakyungu vamwi avaie: Fureń andu emwi nań, fulya nankooya mburu ilya yakwa yeenrekaa.

⁷Na Yesu kaia vandu valya: Niń namuia: Mfo kuro livaa ifura kulya iṛuvewu kiimba kya nndu umwi nreti eelashika kita vandu makumi kyeenda na kyeenda vakee ikuvaanga vasumani vatafurie iilashika.

⁸Ana ni nndu nka ungau awore shilingi ikumi kareta-wo imwi, nae ataataa kimuli amulike na yangata numba na iiṛuya kwa utomari kumande aikooyaa?

⁹Kammiikooya kandevaanga ndoo tamwi ta vaka na vakyungu vamwi avaie: Fureń andu emwi nań, fulya nankooya shilingi ilya yakwa yeenrekaa.

¹⁰Nań namuia: Mfo kuro livaa ifura kwa vamalaika va Iṛuva kiimba kya nndu umwi nreti eelashika.

¹¹Numa Yesu kanumbua: Eeifoo nndu umwi awore vana vamwi vavili va womi.

¹²Ulya munnya kaia ndee: Vaava, shiniinga kyeenga kya masaa kilya kisumani nań. Llyo avaavia masaa.

¹³Na ili mikonu myaangu indesia, mwana ulya munnya kasaṅiṛia findo famwi foose kaenda nafo urukefi lwa kwaasha. Na kulya kafwalafwala masaa amwi na yanyanyata kwa beṛebeṛe.

¹⁴Neeli ye andemaa masaa oose deń, soto nini ikasha urukeń lua, nae kabooka ituṛulwa ni ukiva.

¹⁵Llyo aenda kandekuvava na muni numba umwi wa uruka lua. Nae kanruma ifo nremiń tamwi kwaasha andeisa-fo nguve.

¹⁶Nae kalanga nnu iwuurusa ndewu yamwi na makanda alya akee iliwa nnguve da, nta nndu akee inniinga.

¹⁷Kyasia kakwimboo ye muni kanumbua: Mmaketi enga akee kulya kwa vaava wakwa vakee ilya shoonga vakawuura na isaa ikasaa. Nań nkee ifiiya kunu nsoto!

¹⁸Nkwimboo neende kwa vaava wakwa nndemwia: Wui vaava, nanrekio̱ mbele ya Iṛuva na mbele yafo.

¹⁹Nkisumani ivaangwa lingi mwana wafo ndi. Shaaṛua vve umwi wa maketi afo!

²⁰Nae kakwimboo kaenda kwa vaava wamwi. Ili akee kwaasha atandefika, ndee kallolia kavvavio̱ nndewu kanrishia kankulingilia sungoń kamwonga mimo.

²¹Kasia mwana ulya kamwia: Wui vaava, nanrekio̱ mbele ya Iṛuva na mbele yafo. Nkisumani ivaangwa lingi mwana wafo ndi.

²²Kake vaava wamwi kaia maketi amwi: Nndeń nseto ree ulya nnuru kita muwike! Vvikeń na nrashi nniń na faaru marendeń amwi.

²³Numa nndeń na kyaashe kilya kivanri mukisikye. Neese tilye na ikyesa!

²⁴Fulya mwana uu wakwa eefiyee kaṛuka lingi. Eerekyee kalolika lingi. Llyo vabooka ikyesa.

²⁵Na kyeeri kilya mwana ulya nnini eekee nremiń. Neeli eeshaa na iserikia kufui na kyeń, kaita ngyufina na fitavanu.

²⁶Nae kavaanga iketi limwi kalyuṛa: Mmboni ta iki iti?

²⁷Nalyo likamwia: Mmwananu ansha. Llyo vaava wafo ansikiya kyaashe kilya kivanri, fulya ammukooya lingi eefo na muu.

²⁸Kyasia kafulukwa nta ikunda yaka numba. Kyasia vaava wamwi kasomuka kandellembalemba.

²⁹Kaaṛua vaava wamwi eemwiaa: Lla te, myaka ii yoose nankuṛundia, lingi nta ivavaso lyafo limwi nndelikilia. Nawe nta kwanshiniinga ngarina imwi ya mburu, nkooye ifura andu emwi na ndoo takwa ndi.

³⁰Kake mwana to wafo ili asha andenyanyata masaa afo woose andu emwi na vaka va shia, kwammusikiya kyaashe kilya kivanri.

³¹Nae kamwia: Mwanakwa, mikonu yoose iwe kukee andu emwi nań, na foose nkee nafo mfafo.

³²Kake kitisenye tikyese na ifura, fulya mwananu eefiyee kaṛuka lingi. Eerekiee kalolika lingi.