Read MMA SHIYYA Luka 18 Bible Online

Luka 18 - MMA SHIYYA bible

Luka 18

¹Kavaia na sumu ya ivafunda, sheeli kyavawara vatereve Iṛuva mikonu yoose nta vatalemwa.

²Kanumbua: Eeifoo nndu nshili mufukya fikwena muṛiń llive ateeṛee Iṛuva ana atataalie nndu.

³Na muṛiń ito eeifoo nka nsikeeti. Nae eellatiaa matika woose eemwiaa: Shifukiya mwaandu wa kituva kyakwa!

⁴Nae kalleya mikonu miingi. Numa kakurera ifo nrimiń wamwi: Lla ili ntakusurie Iṛuva ana ntataalie nndu,

⁵kake fulya nka uu nsikeeti akee ishaatara, nimfukiyaa mwaandu wamwi kisumani, kaaṛa atafurumie ishiraa kisangu.

⁶Nndumi kanumbua: Aranyiń kasa nshili ulya nrekwa arera.

⁷A Iṛuva araa atafukiya iwo awasaua vakee illilia kio na nsanyiń, nae avatevese tubu?

⁸Namuia: Avafukiaa kisumani ree. Kake ili Mwana wa nndu ashaa, akooyaa vandu vankusurie kunu isangeń naań?

⁹Yesu kalolia vandu kiindi vandekumanya wo veni sheeli wasumani vakabiṛa vengi. Kavakabia sumu kanumbua:

¹⁰Veeifoo vandu vavili varwe na ule numbeń ya Iṛuva vandeterevia-fo. Ulya umwi ni Mfarisayo na ulya ungi ni nsaṅiṛia kyaalo.

¹¹Mfarisayo ulya kasalala katereva Iṛuva kuri ifo ngooń yamwi: Nakwaana Iṛuva, fulya niń ntakee sha vandu vengi, ntakee sha fisoki ana sha valembi ana sha vaaisi ana sha nsaṅiṛia kyaalo ullya.

¹²Kari ka mikonu mfungare nkee isinda kuro mikonu ivili ntalya shoonga. Lingi nkee ifukya kyeenga kyoose kya masaa akwa noore naniingia akava maanga a Iṛuva.

¹³Na nsaṅiṛia kyaalo ulya ye kasalala kulya numa, nta akaṛia iimboo miso amwi na iṛuvewu ndi, kake kanaṛia nnu kutu eekurraa kanumbua: Wui Iṛuva, kushililie niń nkee nndu nrekwa.

¹⁴Nań namuia: Nsaṅiṛia kyaalo ulya aende kyeń kwamwi akee nshiise kita Mfarisayo ulya. Fulya ulya woose, akuṅinisaa ye muni, anyiiswaa, na ulya akunyiisaa muni aṅiniswaa.

¹⁵Vakamwendee na vana vannya amu avabaane. Vanalosho vakalolia vakavakandara.

¹⁶Kake Yesu kavavaanga vashe kwamwi. Kanumbua: Tień vana iva vannya vashe kwakwa, manya mutavaimi. Amu vandu sha iwo umangi lwa Iṛuva llwawo.

¹⁷Nkue namuia kya dede: Nndu kwakooya atawariaa umangi lwa Iṛuva sha mwana, aakaa-fo kutu ndi.

¹⁸Lingi nndu umwi nnini kamwuṛa eereraa: Llosha nnuru, ntanaa are naań, amu nrwaa diṅu ya muu wa miṛeṛe?

¹⁹Yesu kamwia: Nki ili kwashivaanga nnuru? Eefo nnuru kitaare ni umwi tubu ndi, nae yye Iṛuva.

²⁰Kwishi mavavaso a Iṛuva: Kutaaike, kutawaa vandu, kutaive, manya kutafingie nndu ungi kindo atatanie, india ndeo na maa.

²¹Nae kanumbua: Ifo foose niifiworee kuuka utiń lwakwa.

²²Ili Yesu andeita kuro, kamwia: Kukiseere na kindo kimwi. Andekumba foose kuwore kwaavia vakiva. Nawe kuvaa na masaa mafise ifo iṛuvewu. Kwammaa kusheń kushisoṛe.

²³Amiita kuro kanaṛia, fulya awore masaa meengi nnu.

²⁴Neeli Yesu andelolia kuro kanumbua: Lleń kasa kikee kyuumu masimba yaka umangiń lwa Iṛuva!

²⁵Kivaa kyaangu ngoye iitwa mbueń ya sindano kita nndu isimba yaka umangiń lwa Iṛuva.

²⁶Na valya vandeita vakanumbua: Kwakooya nkuro, ni iń akooyaa ikiṛwa?

²⁷Kanumbua: Ikyo kitamakii iva kwa vandu, kwa Iṛuva kivaa.

²⁸Petiro kanumbua: Lla te ise tamburuya-wo findo feru foose tikakulatia.

²⁹Nae kavaia: Nkue namuia kya dede: Eefo nndu anderea numba ana nka ana vanavamae ana ndee ana mae ana vana kiimba kya umangi lwa Iṛuva,

³⁰kara ataniingwa eewiiṛio̱o̱ fiingi andu a kilya kimwi na feeriń ifi fa alli. Na ifo isangeń lia lishaa akooye muu wa miṛeṛe.

³¹Yesu kakurika valya ikumi na vavili kavaia: Manyiń alli tikee irwa na ule Yerusalemu, na ifo mfo fimarisio̱o̱ foose feentisiṛwaa wauya fisuku fa Mwana wa nndu.

³²Amu arambikyo̱ maakoń a vandu valya vateeshi Iṛuva. Nae aeetio̱o̱ na iteendwa na imishio̱ manyiiri.

³³Nawo vankabaa na ngova na iwwaa. Na nkonu wa kararu aṛukaa.

³⁴Nawo nta yaṛukio̱ mfirero famwi ana nta imanya misendie yayo.

³⁵Kyasia ili andeserikia kufui na Yeriko, eeifoo nndu ndoń akee rembo mbaai ya shia eeombaa vandu findo.

³⁶Kaita vandu veeiraa veengi kavauṛa: Nkiki ikyo muṛe?

³⁷Vakamwia: Ni Yesu ulya wa Nasareti akee iira.

³⁸Kawaanga na ununga unini eenumbuaa: Wui Yesu, Mwana wa Davidi, shililia!

³⁹Na valya vairie mbele vakannaya vakamwia: Sia do! Kake ye kaengeṛia iṛoṛongya eenumbuaa: Wui Mwana wa Davidi, shililia!

⁴⁰Yesu kasalala kavavasa amwendewa. Ili vandenserisia kufui nae, kamwia:

⁴¹Nkiki kufurie nkutanie? Nae kamwia: Nndumi, mfurie llolie.

⁴²Yesu kamwia: Loliań! Ili kwanshikusura, nkyo kyankukiṛa.

⁴³Lia eni kallatia eeṅinisaa Iṛuva. Na vandu valya woose ili vandelolia, vakaitikisa Iṛuva.