Read MMA SHIYYA Luka 21 Bible Online

Luka 21 - MMA SHIYYA bible

Luka 21

¹Nae kaimboo miso amwi kalolia vandu masimba veeutiaa misimbika yawo ifo isandukuń lya misimbika.

²Kalolia nka nsikeeti nae akee nkiva eerwaa-fo fisenti fivili.

³Kanumbua: Nkya dede namuia: Nsikeeti uu nkiva anrwaa-fo mmwasi kita woose.

⁴Amu iwo woose varwaa-fo nsimbika vauta ifo mmwasiń wa masaa awo. Kake uu kwa ukiva lwamwi anrwaa-fo foose akee nafo fa ilela muu wamwi.

⁵Neeli vandu kiindi veekee irera mboni ta numba ya Iṛuva, kasa ikee shaambike na mawe manuru na myambikie ingi iisandiee-fo, nae kanumbua:

⁶Ifi mukee ifilla ikaa ishe mikonu, nta litasaa iwe kwa ule ya iwe lingi litaburuywaa si.

⁷Vakamwuṛa veenumbuaa: Llosha, a ifo fivaa iri ki? Lingi mmyorusie ki ilolikaa ili kufui faawukie?

⁸Kanumbua: Kulleń kaaṛa mutalembwa! Amu veengi vashaa na irina lyakwa veenumbuaa: Niń nniń ye! Lingi vanumbuaa: Kyeeri kyansha kufui. Kyasia manya mutavalatie!

⁹Neeni ili mwitaa mboni ta fira na ngyuṛiingi, manya mutakyangike. Amu ifi foose kita five mbele, kake ifurumia lishaa ree ndi.

¹⁰Llyo avaia: Uruka lukwimboo lukabe uruka lungi, na umangi lukabanaa na umangi lungi.

¹¹Livaa na irerema inini lya isanga na soto na saka kundo kungi na kungi. Fivaa na findo fa yeṛeese na myorusie minini yukaa iṛuvewu.

¹²Kake kitaare ifo foose favva, vamusaaṛiaa maako na imuumbuta veemurwaa numbeń tawo ta iterevia na imurwaa kifingioń. Vamukurikaa mbele ya mamangi na vashili kiimba kya irina lyakwa

¹³Na ifi fishemuviaa, amu mumakii ishirambua.

¹⁴Mukudeeṛie mirimiń yanu, amu mutabooke iṛuya firero mukuutaa nafo.

¹⁵Amu niń mmuniingaa uṛango usha ifo kaniń kanu, na vatuṛua vanu woose vatamakii yaṛua ana ifuma.

¹⁶Neeni muṛiingwaa wasuṛi vanu na vanavamae vanu na vafwari vanu na ndoo tanu. Na kinga kyanu kiwalwaa.

¹⁷Neeli musulwaa vvandu woose kiimba kya irina lyakwa.

¹⁸Kake nta ifuli limwi lya nrwe wanu lirekaa.

¹⁹Kwakooya musisiriaa deń, mukiṛaa mirima yanu.

²⁰Kake ili muloliaa muṛi wa Yerusalemu ulengetio̱ nsyamu ya fira, manyiń sheeli kyeeri kya ikasheeswa lyayo kyamfika.

²¹Kyeeri kyo valya vakooywaa vakee Yudaya varishie ngyuroń. Na iwo vakooywaa vakee kari ka muṛi vasami-fo. Na iwo vakooywaa vakee nremiń manya vatauye nafo.

²²Fulya mikonu yo yyo ya iliswa ukiva, amu foose fikee fitisiṛe faawukie.

²³Kake ushi vaka valya vakooywaa vakufingie na valya vakee yosa vana mikonu yo! Amu luvaa ukiva unini urukeń, na vandu va uruka lu varawaa uumisioń lwa ivareta.

²⁴Vengi vawaa si veeliwaa nshombo na vengi vawarwaa mifungwa vakurikwa ifo kwa vandu va masanga woose. Na muṛi uu wa Yerusalemu uvario̱vario̱ vvandu va masanga, kumande feeri fa vandu va masanga fainutio̱.

²⁵Lingi akaa ave maṛiikiso saań ii ivele na mwiriń na nyinyiriń. Na vandu woose va masanga Uyo vataṛaakaa na isavasavaa, ili vaitaa nruva iiṛuṛumaa na ilolia iirosaa mavia meengi.

²⁶Na vandu vaumaa ṅadu kiimba kya weṛei veellaa na iverea filya fivaviaa, fulya valoliaa na iṛuvewu lyoose liisenikasenikaa.

²⁷Na kyeeri kyo Uyo valoliaa Mwana wa nndu eeshaa ariwa ni iṛumbe akee na finya na tikisi nini.

²⁸Neeli muloliaa ifi foose fibooka iva, uiywań mmuu na isalala kisha na ifura, fulya ikiṛwa lyanu lyansha kufui.

²⁹Kavakabia na sumu: Lleń nri wa nkuu na akwaa mmiri ingi yoose!

³⁰Mukallolia iifumbisaa yooṛe, mumanyaa sheeli iruuna nkufui.

³¹Na akwaa ni ini nkuro da: Mukallolia ifi foose five, manyiń sheeli umangi lwa Iṛuva lwansha kufui.

³²Namuia kya dede: Kishuku ki kisiaa kutu kitaare ifi foose favva ndi.

³³Nakyo kusureń kutu, amu iṛuvewu na isanga fo fisiaa, kake firero fakwa fo fisiaa kutu ndi.

³⁴Neeni kulleń ninsha kaaṛa mirima yanu itatanyaṛiswa mfindo fa ndewu sha ilafuka na findo ana inangwa wwari ana ikwareesa na findo fa isanga li, kaaṛa nkonu to utamushee kibashuka.

³⁵Fulya ushaa kwa vandu woose vakee isangeń na iwara uvawaraa sha mfwaanri wawara kindo.

³⁶Kyasia laleńń kya umbuura mwiterevaa Iṛuva, amu mukooye finya ya ikia ifi foose fishaa na isalala kisha kisanguń kya Mwana wa nndu.

³⁷Kyasia feeri fa nsanyiń kava mulosha ifo numba ya Iṛuva. Na kio kauka-fo kandelala kulya uroń luvaangwaa lwa misenifu.

³⁸Na vandu woose vakanshea ngama isomukoń kulya numba ya Iṛuva, amu vandemwaranya.