Read MMA SHIYYA Luka 23 Bible Online

Luka 23 - MMA SHIYYA bible

Luka 23

¹Isyamu lia likakwimboo lyoose likankurika kwa Pilato.

²Vakabooka indiinga veenumbuaa: Tallolia sheeli nndu uu akee ireta uruka lweru na iima vandu veeniingiaa Kaisari kyaalo. Kanumbua ye muni sheeli yye Kristo akee mangi.

³Pilato kamwuṛa: Iwe ni iwe mangi ya Vayuda? Nae kaaṛua kamwia: Ni iwe kwanumbua.

⁴Pilato kaia vakohani valya vanini na syamu ya vandu: Niń llolie ukasha kwa nndu uu ndi.

⁵Kake wo vakaengeṛia nnu irera na itikiatikia vakanumbua: Ye afuluta vandu eeloshaa kunu Yudaya koose kabookia Galilaya kumande kunu.

⁶Neeli Pilato andeita kuro, kauṛa akwaa nndu uu wwa Galiliya.

⁷Neeli andemanya sheeli akee ushiliń lwa Herode, kanrika kwa Herode. Amu nae eekee kulya Yerusalemu mikonu ilya.

⁸Neeli Herode andelolia Yesu kafura nnu, amu mmikonu miingi eefuriee nnu illolia, fulya eemiitaa mboni tamwi. Kaira ba kundo aloliaa myorusie yukie na kwamwi.

⁹Kamwuṛa mboni shiingi. Nae nta imwaṛua kindo.

¹⁰Na vakohani vanini na vaaria va mitisine vakasalala-fo vakandiinga na finya.

¹¹Kyasia Herode na vaseṛo vamwi vakamweetia na inteenda. Kavvika miseto ya utoṛe, numa kawwiiṛa kwa Pilato.

¹²Kyasia nkonu ulya muni Herode na Pilato vakabooka iitana, amu lya mbele veesuyanii.

¹³Pilato kavaanga vakohani valya vanini na vandu va nrwe na vandu woose kavasandia.

¹⁴Kavaia: Mwanshendee nndu uu sheeli atevetaa vandu. Nań nanrera mwaandu wamwi mbele yanu. Nań nta nallolia kindo kyavvinga iki mwandiinga nakyo ndi.

¹⁵Na akwaa ni Herode nae nta alolia ndi, amu ammuwiiṛa kweru. Kyasia kiifo kindo atanie kyawara awalwa ndi.

¹⁶Kyasiań ninkabaa, numa mmwotoṛe.

¹⁷Amu kyeemmuwaraa ivaboṛomuya mfungwa umwi kyeeri kya kisuku.

¹⁸Vakaṛoṛongya woose andu emwi veenumbuaa: Uta-fo nndu uu! Kutiboṛomuye Baraba!

¹⁹Nae ni nndu eenrawaa ki-fingioń kiimba kya myaandu indesha muṛiń na ya iwaa.

²⁰Kyasia Pilato karera nawo lya kavili, fulya eefuriee yotoṛa Yesu.

²¹Nawo vakaṛoṛongya veenumbuaa: Nkabie nsalabeń! Nkabie nsalabeń!

²²Kavaia lya kararu: Naamu ki? Uu atanie fikasha ki? Nta kirero kimwi nallolia ky awwara afwe. Kyasiań ninkabaa, numa mmwotoṛe.

²³Kake vakaṛoṛongya na ngyununga nini veekundaa akabio̱ nsalabeń da. Ngyununga tawo tikavinga.

²⁴Llyo Pilato afukya, kilya vafurie kive.

²⁵Kaboṛomua ulya anderawa kifingioń kiimba kya myaandu na iwaa, yye vandensaua. Na Yesu kavarambikia vantanie sheeli vakundie.

²⁶Neeli vanrie vakawara nndu umwi, nSimon wa Kirene, ashe auka na nremiń. Vakanrika nsalaba aukurike io numa ya Yesu.

²⁷Isyamu iingi lya vandu likansoṛa na vaka veekabakabaa mbafu tawo na illilia.

²⁸Na Yesu kavaindukia kavaia: Muṛe vaka va Yerusalemu, manya mutashililie niń ndi! Iyeń kyanu mu veni na kya vana vanu!

²⁹Amu lleń te kikaa kishe kyeeri vandu vanumbuaa: Ngoma iwo vakee fuumba na iwo vatandeira vana na mavele atandeongwa.

³⁰Llyo vabookaa iia ngyuro: Tiwoyeń! Na ini fiduru tisikień!

³¹Amu kwakooya vatana kuro na nri nshu, a uu mwumu naare utanio̱o̱?

³²Na vaseṛo vavili vakakurikwa andu emwi nae veetaniee fikasha vawalwa andu emwi nae.

³³Vakafika andu avaangwa Kiboṛoń! Nafo vakankabia-fo nsalabeń na fisoki filya fivili andu emwi nae. Vakakaba umwi taari ya uko usha lwa Yesu na ungi taari ya uko umbuyo.

³⁴Na Yesu kanumbua: Wui Nde kuvatie, fulya vateeshi kilya vakee itana. Vakakwavia na miseto yamwi veeikabiaa wuuku.

³⁵Na vandu vakasalala-wo veellaa. Na vandu va nrwe vakanseka vakanumbua: Ankiṛa vengi, kyasia akukiṛeń ye muni, kwakooya yye Kristo nsaue wa Iṛuva!

³⁶Na vasikari valya nawo vakamweetia. Vakanserikia vakanniinga mura nsande na kindo kivavaa.

³⁷Vakamwia: Kwakooya kukee mangi ya Vayuda, kukweleke ku muni!

³⁸Na ifo nsalabeń kwa ule ya nrwe wamwi iifoo mitisine itisiṛie kigiriki na kirome na kiebrania: Uu yye mangi ya Vayuda.

³⁹Na umwi wa fisoki filya feenkabio̱o̱-fo kamweetia kanumbua: Iwe kukee Kristo ndi? Kyasia kukweleke ku muni, kuteeleke neese!

⁴⁰Kake ulya ungi kamwaṛua eennayaa: Kweṛee Iṛuva se? Nawe kukee uumisioń ilu ndi?

⁴¹Ise vavili tikee iliswa ukiva lu kisumani, fulya tikee itawa filya tantana fikasha. Kake ito antana fikasha ndi.

⁴²Kaia Yesu: Wui Yesu kushikumbue, ili kushaa kukee na umangi lwafo.

⁴³Na Yesu kamwia: Nakuia kya dede: Nkonu wa nnu da kuvaa nań kulya Paradiso.

⁴⁴Llyo kyeeri kya saa isasaru. Llema ukasha urukefi loose ukakaa kumande saa kyeenda.

⁴⁵Na saa ikareta langa yayo na isulia lia inini likee ifo numba ya Iṛuva likaranduka kari.

⁴⁶Nae Yesu kaṛoṛongya na ununga unini eereraa: Wui Nde narambikia nrima wakwa maakoń afo. Ammaa irera kuro kanutuka.

⁴⁷Ili nshili wa vasikari valya andelolia kilya kindeva, kaṅinisa Iṛuva kanumbua: Ndede nndu uu eekee nsumani.

⁴⁸Na vandu woose veeifoo veellaa ili vandelolia kilya kindeva, nawo vakakukaba mbafu vakauya kyeń.

⁴⁹Na woose vakwishi nae andu emwi na vaka valya variani nae kuuka Galilaya vakasalala kikwaasha veellaa mboni to.

⁵⁰Lia eni kasha nndu umwi irina lyamwi ni Yosefu. Nae eekee nndu wa nrwe, ni nndu ntele na nsumani.

⁵¹Nae nta airikia fikwena fawo na mitanie yawo ndi. Na kundo aukie nkulya Arimatia mmuṛi wa Vayuda. Lingi eeveree umangi lwa Iṛuva.

⁵²Nndu to kaenda kwa Pilato kantereva nnyiṅa wa Yesu.

⁵³Kawolota-fo kawiṛina na nseto mweelwa fyu. Kandeuaṛa mbangeń ikee shiremi iweń kitaare yamaaṛwa nndu kutu.

⁵⁴Na nkonu ulya ni nkonu wa ikwalia na nkonu wa Sabato ubookeń.

⁵⁵Na vaka valya vandesha nae vauka Galilaya vakansoṛa numa. Vakalla mbanga ilya na nnyiṅa wamwi kasa waṛwaa-fo.

⁵⁶Vakauya muṛiń vakandedeeṛia miri ya kisaamu na mafura a imwaamba. Na nkonu wa Sabato vakaimuya sheeli kikee kivavase.