Read MMA SHIYYA Luka 24 Bible Online

Luka 24 - MMA SHIYYA bible

Luka 24

¹Kyasia nkonu wa mbele usoṛaa Sabato ili kindebooka itaṛaikana, vaka valya vasha alya mbangeń varie miri ilya ya kisaamu veemmaa isongosia.

²Vakakooya iwe lia lyambiṛingitio̱ kwaasha ya mbanga.

³Vakaaka nafo nta ilolia nnyiṅa wa Nndumi Yesu.

⁴Neeli veeṛiikaa kiimba kya mboni to, lia eni a va vandu vavili vaṛee miseto iikalakalaa.

⁵Nawo vakawarwa wweṛei vakainamisia fisangu si. Nawo vakavaia: Naamu ki mukee iṛuya uu eefo na muu kwa vafu?

⁶Akiyo ia ndi, anduka. Kumbueń kilya anderera neeni lia akee Galilaya

⁷eenumbuaa: Kyawara Mwana wa nndu arambikio̱ maakoń a vandu varekwa na ikabio̱ nsalabeń na iṛuka nkonu wa kararu.

⁸Nawo vakakumbua firero filya famwi.

⁹Vakauya vauka kulya mbangeń. Vakandeongoya valya ikumi na umwi na vengi woose mboni tilya toose.

¹⁰Nawo ni Maria wa kulya Magidala na Yohana na Maria akee mae wa Yakobo na valya vengi veerianii nawo, wwo vandeia varumi valya mboni tilya.

¹¹Firero fo fikavavia sheeli mfa dua ana nta vavairikia ndi.

¹²Nae Petiro kakwimboo kaenda eerishaa kumande kulya mbangeń. Kakwinika kalla kulya kari kalolia firami filja fiimwiṛiniee fikee kyaanya kyayo. Kauya na kwamwi aṛiikisio̱ ni ifo fatanika.

¹³Kyasia nkonu ulya to muni veefo vavili va vandu va Yesu veekee yenda muṛiń umwi. Nato kuuka kulya Yerusalemu kwendaa weendo lwa saa ivili kufike-fo. Na irina lyayo uvaangwaa Emau.

¹⁴Nawo veekee irera usaṛe lwa mboni tilya tindeva toose.

¹⁵Kyasia ili veereraa usaṛe kuri na yuṛana, Uyo Yesu avaserikia kaenda andu emwi nawo.

¹⁶Kake miso awo akawarwa ni irra nta vatammanye yye.

¹⁷Nae ka-vauṛa: Ni usaṛe lungalu mukee irera kunu shień? Vakasalala na fisangu fawo foore unaari.

¹⁸Na umwi wawo, eevaangwaa Kiliopa, kaaṛua kamwia: A iwe ku muni kukee mwini kunu Yerusalemu kuteeshi filya findetanika-fo mikonu ii?

¹⁹Kavauṛa: Mmboni ta kiki? Vakamwia: Nta Yesu wa Nasareti, eekee nndu mwauya fisuku, eekee na mwaṛia wa findo finini fa itana na fa irera mbele ya Iṛuva na mbele ya vandu woose.

²⁰Na vakohani veru vanini andu emwi na vakuu veru vakarambikia awalwa vakankabia nsalabeń.

²¹Neese tiikusuriee sheeli uu yye akiṛaa vandu va Isiraeli. Na kuuka ifi fivva, nkonu wa nnu nto wa kararu.

²²Na lingi veefo vaka va kweru kiindi vantikyangisa. Valava ngama kio kulya mbangeń

²³nta ikooya-fo nnyiṅa wamwi. Vakasha vakanumbua, vallolia vamalaika va Iṛuva vandekworusa na baa vakanumbua vai: Eefo na muu.

²⁴Na kiindi kya vandu veru vakaenda indella alya mbangeń. Vakakooya nkuro da sheeli vaka valya vandenumbua, kake ye muni vallolia-fo ndi.

²⁵Llyo Yesu avaia: A baa vandu variṅani, nki ili ngoo tanu tallemwa ikusurana na filya foose feemaauywaa vvaauya fisuku?

²⁶Mwishi se sheeli kyawara Kristo aliswa ukiva lu na yuya unini lwamwi?

²⁷Kabooka ivamanyisa mboni ta kuuka Mose na ta vaauya vengi na ta filya foose feentisiṛwaa kyamwi.

²⁸Kyasia vakaserikia kufui na muṛi ulya veekee yenda. Nae kakwaṛua sheeli afurie iira na mbele.

²⁹Vakantereva veemwiaa: Lalia kweru Mbee, fulya kwamiila na saa ikee ikaliakalia. Kaaka numba kakaa nawo.

³⁰Kyasia ili eekee rembo andu emwi nawo valye shoonga, kaimboo nkate kaana Iṛuva kafukyafukya kavaavia.

³¹Llyo miso awo akaambua kalabu vakammanya yye. Lia eni kaveṛuka kari kawo vatakillolie.

³²Vakakurera wo veni na veni: A lia ngoo teru tikee imwanaana lia eekee irera neese ifo shień na itimanyisa mboni ta mitisine, nta immanya ye.

³³Vakakwimboo kyeeri kilya kyeni vakauya na kulya Yerusalemu vakakooya valya ikumi na umwi vakusandie andu emwi na valya veekee vaaroe vawo.

³⁴Nawo vakaongoya valya vavili veenumbuaa: Nkya dede Nndumi anduka kalolio̱ nSimon.

³⁵Nawo vakavaongoya mboni tilya ta kulya shień na sheeli andemanyikwa wwo eefukyaa nkate.

³⁶Ili vaseṛo va Yesu veekee irera mboni tilya ta iṛuka lya Yesu, lia eni Yesu muni kasalala kari kawo kavaia: Kaań-fo na unambwe!

³⁷Nawo vakataṛaaka vakaeṛea, veeshi valolia kiṛishwe kya nndu.

³⁸Kavaia: Nki ili mwataṛaaka na inunua nrwe?

³⁹Shilleń maako akwa na marende akwa, nniń shi muni uu. Shibaaneń mushille, amu kiṛishwe kiwore nyama ana mafua sheeli mushilolie niń noore ndi.

⁴⁰Ili eereraa kuri, kavaorusa maako na marende.

⁴¹Nawo veemakii iirikia kiimba kya ifura na iṛiika ndi. Llyo avauṛa: Muwore shoonga ia? Vakamfingia ngambuṛa ya ikunga shookye na kauki.

⁴²

⁴³Kawaria kalya mbele yawo

⁴⁴Numa kavaia: Iti nto mboni tilya namwongoya lia nkee neeni, sheeli foose fifikaa fikee fitisiṛe fitabuń fa Mose na fa vaauya fisuku na fa fiimbo fa Iṛuva.

⁴⁵Kavaniinga uṛango vamanye mitisine ilya.

⁴⁶Kavaia: Nkuri kikee kitisiṛe sheeli Kristo kyawara atuṛulwa na iṛuka kwa vafu nkonu wa kararu.

⁴⁷Nawo vandu valya vateeshi Iṛuva vakwanisio̱ mboni ya ikurra na ya itio̱ mareko veekuvavaa nae, nakyo kibookaa kunu Yerusalemu.

⁴⁸Neeni mukee varambua va filya foose findeva.

⁴⁹Neeni manyiń niń mmurikiaa kilya kinderekio̱ nNde yakwa kimwolokie. Kake ini kaań muṛiń uu wa Yerusalemu kumande muniingwaa finya yuka ule.

⁵⁰Kyasia kavasomuta kulya muṛiń kavafita kumande kufui na Betania. Kaimboo maako amwi kavaniinga mboṛa.

⁵¹Kikava ili eevaniingaa mboṛa, kalakaniswa nawo karoswa iṛuvewu.

⁵²Nawo vakawa si na fiboota. Numa vakauya na kulya Yerusalemu vawore ifura iingi.

⁵³Vakava vasinda ifo numba ya Iṛuva kyeeri kyoose veeitikisaa Iṛuva.