Read MMA SHIYYA Luka 3 Bible Online

Luka 3 - MMA SHIYYA bible

Luka 3

¹Mwaka wa ikumi na karaanu wa witoṛo lwa Kaisari Tiberio Pontio Pilato eekee nshili nnini wa Yudaya, na Herode eekee mangi ya Galiliya, na Filipo mwanamae eekee mangi ya Ituraya na uruka lwa Tarakoniti, na Lisania mmangi ya kulya Abilene.

²Kyeeri kilya kya Hana na Kayafa vakee vakohani vanini Uyo kirero kya Iṛuva kifikia Yohane mwana wa Sakaria kulya ṅṅaloń.

³Nae kafika miṛitiń yoose ikee kufui na Yoridane eekwanisiaa vandu ubatiso lwa iilashika nrimiń, amu vatio̱ mareko awo.

⁴Sheeli kikee kitisiṛe kitabuń kya mwauya kisuku ulya Yesaya: A lu ununga lwa nndu akee ikaba oole bateń eenumbuaa: Songosień shia ya Nndumi, rendentień miko yamwi!

⁵Mamuungo woose alikio̱, na ngyuro toose na fiduru foose fivavario̱! Na kundo kwotokie kuseṛeeswa na shia to toore malomi taalamuswa!

⁶Na vandu woose valolie ikiṛwa ni Iṛuva!

⁷Kyasia karera na isyamu lia lindenshea, amu vabatiswa yye kavaia: Ini ufwari lwa shoka, ni i andemwikimba ini murishe uumisio lwa Iṛuva lushaa?

⁸Kyasia vikeń nunda tisumani na nrima wa ikurra. Manya mutarere mwinumbuaa: Ise toore nde yeru Abraamu! Amu namuia kuri: Kari ka mawe va Iṛuva amakii yutia-fo Abraamu vana.

⁹Na alli kuri kyaaṛa kyammaa irawa sindeń ya nri. Na nri woose utavikaa nunda shinuru uminyo̱o̱ na yeeṛwa muroń.

¹⁰Isyamu lia likamwuṛa: Titanaań are?

¹¹Nae kavaaṛua kavaia: Ulya awore miseto ivili aavie ulya atawore. Na ulya akooyaa awore shoonga atane kuro da.

¹²Na vasaṅiṛia kyaalo nawo vakasha, amu vabatiswa. Vakamwuṛa: Llosha, a ise tikatanań ki?

¹³Nae kavaia: Manya mutaute nndu kindo kya mmwasi kitaare ni ikyo kivavase!

¹⁴Na vasikari nawo vakamwuṛa veenumbuaa: Eese titanaań are? Nae kavaia: Manya mutalamie nndu, ana mutatuṛue nndu amuniinge kindo, kake filwań mmaṛe anu!

¹⁵Neeli vandu veekiveree filya fivaa veekusaṛasaṛaa ifo mirimiń yawo mboni ta Yohane, sheeli eeba yye Kristo,

¹⁶Yohane kavaaṛua kavaia woose: Niń namubatisa na mura. Kake eefo nndu ashaa numa yakwa awore finya kita niń. Nań nta nkaṛiaa iboṛomua ngyuṛuumu ta faaru famwi ndi. Ye amubatisaa na Mumuyo Nsongori na muro.

¹⁷Nae arie kyeele na uko lwamwi aangate kivasha kyamwi kiile fyu. Na umbi asaṅiṛie ikumbiń lyamwi, kake muulu aukoṛaa na muro utasiaa.

¹⁸Kyasia kalunga-wo na firero fingi fiingi eekwanisiaa vandu nrumi ii ya ifura.

¹⁹Kake mangi Herode karerio̱ yye kiimba kya Herodia akee nka wa mwanamae na kiimba kya fikasha foose andefitana.

²⁰Na findo filya foose kaengeṛia-wo na kingi karwaa Yohane kifingioń.

²¹Kyasia vandu woose vandeenda ibatiswa ni Yohane. Na Yesu nae kaenda indebatiswa. Ili eeterevaa Iṛuva, iṛuvewu likaruuka.

²²Na Mumuyo Nsongori kamwolokia kankaya afwanani na mbuku. Na ununga lukauka iṛuvewu lukavaanga: Iwe ni iwe Mwanakwa nkunde, nsenyo̱ ni iwe.

²³Nae Yesu eekee nndu sha wa myaka makumi araru lia abooka ilosha. Nae aishiwa sheeli mmwana wa Yosefu, ye mwana wa Eli,

²⁴ye wa Matati, ye wa Levi, ye ma Maliki, ye wa Yanai, ye wa Yosefu,

²⁵ye wa Matatia, ye wa Amosi, ye wa Naumu, ye wa Esili, ye wa Nagai,

²⁶ye wa Maati, ye wa Matatia, ye wa Semei, ye wa Yoseki, ye wa Yuda,

²⁷ye wa Yoanani, ye wa Resa, ye wa Serubabeli, ye wa Salatieli, ye wa Neri,

²⁸ye wa Maliki, ye wa Adi, ye wa Kosamu, ye wa Elimadamu, ye wa Eri,

²⁹ye wa Yosua, ye wa Elieseri, ye wa Yorimu, ye wa Matati, ye wa Levi,

³⁰ye wa Simeoni, ye wa Yuda, ye wa Yosefu, ye wa Yonamu, ye wa Eliakimu,

³¹ye wa Melea, ye wa Mena, ye wa Matata, ye wa Natan, ye wa Davidi,

³²ye wa Yese, ye wa Obedi, ye wa Boasi, ye wa Sala, ye wa Nasoni,

³³ye wa Aminadabu, ye wa Aramu, ye wa Esiromu, ye wa Faresi, ye wa Yuda,

³⁴ye wa Yakobo, ye wa Isaki, ye wa Abraamu, ye wa Tara, ye wa Naori,

³⁵ye wa Seruki, ye wa Ragau, ye wa Pelegi, ye wa Eberi, ye wa Sela,

³⁶ye wa Kenani, ye wa Arifakusadi, ye wa Semu, ye wa Noe, ye wa Lameki,

³⁷ye wa Metusala, ye wa Enoki, ye wa Yaredi, ye wa Maalaleeli, ye wa Kenani, ye wa Enosi, ye wa Seti, ye wa Adamu, ye wa Iṛuva.