Read MMA SHIYYA Luka 4 Bible Online

Luka 4 - MMA SHIYYA bible

Luka 4

¹Kyasia Yesu kauya auka kulya Yoridane eeshue Mumuyo Nsongori. Kakurikwa mMumuyo wa Iṛuva ifo ṅṅaloń. Kakaa-fo andu a mikonu makumi aani eelelio̱o̱ nSatana.

²Nae mikonu ilya nta ilya kindo. Neeli indesia kawarwa nsoto.

³Satana kamwia: Kwakooya kukee Mwana wa Iṛuva dede, ia iwe lia lyaṛuke nkate.

⁴Yesu kanumbua: Nkitisiṛe: Kindo nndu awaraa nakyo muu nshoonga yo sheni ndi.

⁵Kanrosa uroń waasha kamworusa ngyumangi toose ta isanga kwa limwi tiń.

⁶Satana kamwia: Umangi lu loose na tikisi yayo nkuniingaa, fulya fikee maakoń akwa, nań mfikuniingiaa nndu sheeli nankunda.

⁷Kyasia iwe kwakooya kufwiṛiaa nri si mbele yakwa, fivaa fafo foose.

⁸Yesu kaaṛua kamwia: Nkitisiṛe: Ni Nndumi Iṛuva wafo kumfukiyaa nri kuntereve ye muni na imwindia.

⁹Numa kankurika kumande Yerusalemu kanseṛeesa alya uṛoṛo lwa numba ya Iṛuva kamwia: Kwakooya kukee Mwana wa Iṛuva, kutuule si kuuka ia!

¹⁰Amu nkitisiṛe: Akurikiaa vamalaika vamwi vakuringe.

¹¹Nawo vakuwariaa na maako awo, amu urende lwafo lutakabwa ni iwe.

¹²Yesu kaṛua kamwia: Manya kutareye Nndumi Iṛuva wafo!

¹³Neeli Satana andemarisia kyelelio kyoose, kamwuka kanrea mbele.

¹⁴Na Yesu kauya na kulya Galilaya awore finya ya Mumuyo wa Iṛuva. Na nsendo wamwi ukakwana ngyurukeń toose ta miyanuń.

¹⁵Nae kava mulosha ifo numba tawo ta iterevia eeitikiswaa vvandu woose.

¹⁶Kasha na kulya Nasareti kulya aṅinia. Kandeaka neefo numba ya iterevia nkonu wa Sabato. Kasalala asomie vandu.

¹⁷Kaniingio kitabu kya mwauya ulya Yesaya. Kakirua kakooya andu atisiṛie:

¹⁸Mumuyo wa Nndumi nkwa ule yakwa, amu anshaamba mafura nkwanisie vandu vakiva mboni ya Iṛuva ya ifura. Kashiruma nkwanisie vafinge vaboṛomulwa na vafu miso vakooye ilolia lingi, nniinge valya vavavisio̱ muumu vaende,

¹⁹na ikwanisa mwaka wa Nndumi usenye.

²⁰Karaya kitabu kilya kawiiṛia ndundi ulya kakaa rembo. Na valya veekee numba ya iterevia woose vakamulla koroo.

²¹Kabooka ivaia: Nnu mitisine ii yamaawukia marwiń anu.

²²Na woose vakanumbua sheeli nkuro, vakaṛiikiswa mfirero fa uwoo findeuka kaniń kamwi. Vakanumbua: A uu mmwana wa Yosefu se?

²³Nae kavaia: Kiifo kindo kiimaa mwishiiaa sumu ii ndi: Mwaanga kukiṛe ku muni! Findo foose tamiita sheeli fatanika kulya Kaperinaumu, fitane na ia urukefi lwafo ku muni!

²⁴Kalunga inumbua: Nkue namuia: Eefo mwauya airikio̱o̱ urukeń lwamwi muni ndi.

²⁵Nkya dede namuia: Iifoo misikeeti miingi kulya urukeń lwa Isiraeli kyeeri kya Elia lia iṛuvewu lindefingwa myaka iraru na miiri irindaru na soto nini ikasha urukeń loose.

²⁶Ana nta Elia arumwa kwa umwi wawo ndi kita kwa nsikeeti umwi kulya Sarepita urukeń lwa Sidon.

²⁷Lingi veeifoo veengi veeworwaa ni ivave kulya urukeń lwa Isiraeli kyeeri kya mwauya ulya Elisa. Ana eefo nta umwi andeshiiswa kitaare nNaeman, nae ni nndu wa Siria.

²⁸Woose veekee ifo numba ya iterevia ili vandeita ifi vakaliwa nngoo.

²⁹Vakakwimboo vakansomuta wooṛo ya muṛi. Vakankurika kumande mbaambaa ya uro, kulya muṛi wawo witanie, amu vambiṛingitie si.

³⁰Kake ye aira karikari kawo kakwendia.

³¹Kainama na kulya Kaperinaumu mmuṛi wa Galilaya. Kava mulosha mikonu ya Sabato.

³²Nawo vakaṛiikiswa mmiloshie yamwi, amu firero famwi fiiworee finya yukie kwa Iṛuva.

³³Nafo numba ya iterevia kasha-fo nndu aworwa mmumuyo nkasha. Kariika na ununga unini.

³⁴Kanumbua: Iya! Nkiki kikuwore neese, Yesu wa Nasareti? Kwansha itimamisia. Nań nkwishi iwe ni iwe i! Iwe ni iwe Nsongori wa Iṛuva.

³⁵Llyo Yesu annaya kanumbua: Sia do do, kumwuke! Llyo mumuyo ulya nkasha ukankaba na si io kari kawo ukamwuka utawavise.

³⁶Vakariika woose na yuṛana wo veni na veni veenumbuaa: A kirero ki nkya mikae ingai? Akee ivavasa mimuyo mikasha na finya ya kimangi, nayo ikauka.

³⁷Na nduma wamwi ukakwana kundo koose ngyurukeń ta miyanuń.

³⁸Kyasia kasomuka ifo numba ya iterevia kafika numba kwa Simon. Mae wa nka wa Simon eeworwaa mmuro vvave wa mukunguru. Vakantereva kiimba kyamwi.

³⁹Kaenda na-wo kakumwinikia kanaya mukunguru ulya. Nato ukamwuka. Lia eni kakwimbo kavaṛundia.

⁴⁰Neeli saa iiakiaa, kashewa wwoose vawore vandu valole ndwaṛi ta mikae yoose. Nae kavaekeṛia maako umwi umwi kavakiṛa.

⁴¹Na veengi vakaukwa mmimuyo mikasha iishiṛaa iinumbuaa: Iwe kukee Mwana wa Iṛuva. Kainaya nta iiotoṛia irere, amu yo imwishi sheeli yye Kristo.

⁴²Neeli kukye kauka-fo kaenda kundo kutaare vandu. Na syamu ilya ya vandu ikanduya. Vakafika kulya akai. Vakakunda imwima, amu atalakani nawo.

⁴³Nae kavaia: Kyashiwara neende na miṛiń ingi nndeongoya vandu mboni ya ifura ya umangi lwa Iṛuva, amu ikyo nkyo nnderumio̱.

⁴⁴Kava mukwanisa kirero kya Iṛuva ifo numba tawo ta iterevia kulya Galilaya.