Read MMA SHIYYA Luka 5 Bible Online

Luka 5 - MMA SHIYYA bible

Luka 5

¹Kyasia vandu vakasiṛa Yesu, amu vaaranye firero fa Iṛuva. Nae aselele kulya mbaai ya nruva ilya ya Genesareti.

²Kalolia-fo ngalava ivili tikee alya mbaai. Na vareya makunga veemoolokaa vasangye mireyo yawo.

³Kasaama ngalaveń ilya imwi, nayo ikee ya Simon. Kantereva aiserise kinnya na kulya nruveń. Kakaa rembo kalosha vandu akee ifo ngalaveń.

⁴Ammaa ilosha kaia Simon: Serisa ngalava yafo na kulya karikari ka nruva mwolote-fo mireyo yanu mureye makunga!

⁵Simon kamwaṛua kamwia: Nndumi, kio ki tindelala rembo barań tiireiyaanta iwara kindo. Kake kiimba kya kirero kyafo kwanshiia noolotaa mireyo yakwa mureń.

⁶Neeli vatana kuro, vakawara makunga meengi na mireyo yawo ikaranduka.

⁷Vakasinia vaaroe vawo vakee ngalaveń ilya ingi vashe ivaelekia yomua. Nawo vakasha vakaishuṛa ngalava tilya ivili makunga tikaemio̱ kufui tooloke nruveń.

⁸Ili Simon Petiro alolia ifi, kawa na si marendeń a Yesu kamwia: Uka kwakwa, Nndumi, fulya niń nkee nndu nrekwa.

⁹Fulya ataṛaaka nnu ye na valya woose vakee nae kiimba kya wiingi lwa makunga alya vawara.

¹⁰Na vana valya va Sebedayo wo Yakobo na Yohane vakee vaaroe va Simon nawo vaka-taṛaaka kuro da. Yesu kaia Simon: Manya kuteeṛee! Kuuka alli kuvaa mureya vandu.

¹¹Vakawiiṛa ngalava alya mbaai vakabunawo findo foose vakasoṛa Yesu.

¹²Ili eekee muṛiń umwi wa miri ilya, ifo eeifoo nndu aworwa ni ivave deń. Nae ili andelolia Yesu, kawa si na kisangu kantereva eenumbuaa: Nndumi, kwankunda kumakii ishishiisa.

¹³Nae kasaaṛa uko lwamwi kambaana eereraa: Mfurie, va nsha! Lia eni ivave lyamwi likamwuka.

¹⁴Kavvavasa ataie nndu. Kamwia: Enda kundekworusa kulya kwa nkohani ulya. Kuniingie na kindo kyafo kya iniinga Iṛuva kiimba kya ishiiswa lyafo, sheeli kyavavaswa mMose, kive nkyo mirambuye ifo kwawo.

¹⁵Kake mboni tamwi tikaengeṛia ikwana. Na vandu vakakusandia matoroto meengi veemwaranyaa na ikiṛwa saka tawo.

¹⁶Kake ye muni kaiwukana kaenda kundo kutayo vandu. Katerevia-fo Iṛuva.

¹⁷Kyasia nkonu umwi eekee ilosha vandu, na Vafarisayo na valosha mavavaso veekee rembo io vaukie kimuṛin kyoose kya Galilaya na Yudaya na Yerusalemu. Na finya ya Nndumi iikee nae kamakii ikiṛa vandu.

¹⁸Lia eni vakasha na-wo vaseṛo varie nndu na kiraa atoṛokombie meengo. Vakaraya mwaanya wa imwata numba vanrwaa io akai.

¹⁹Ili vatuṛa mwaanya wa imwata numba kiimba kya wiingi lwa vandu, vakasaama mmbeewu vakauta-fo matufari kiindi alya eealiee vakamwolota na-wo andu emwi na kiraa alya Yesu akai.

²⁰Nae ili andelolia sheeli vankusurie, kanumbua: Iwe nndu, kwamma itio̱ mareko afo.

²¹Kyasia vaaria va mitisine na Vafarisayo vakabooka yuṛana wo veni na veni vakanumbua: Ni nndu ki uu akee irera firero fa irama Iṛuva? Ni i amakii itia vandu mareko awo kitaare ni Iṛuva muni?

²²Na Yesu kamanya makusaṛo awo kaaṛua kavaia: Nkiki mukee ikusaṛa ifo mirimiń yanu?

²³Nkingaki kikee kyaangu? Ni inumbua: Kwantio̱ mareko afo ana ni inumbua: Kwimboo kwende?

²⁴Na alli mumanyaa, sheeli Mwana wa nndu awore finya kunu isangeń ya itia vandu mareko awo. Kaia nndu ulya atoṛokombie meengo: Kwimboo kukurike kiraa kyafo, kwende kyeń kwafo!

²⁵Lia eni kasalala mbele yawo kaimboo kiraa kilya akilaye. Kaenda kyeń kwamwi eeitikisaa Iṛuva.

²⁶Vakariika woose vakaitikisa Iṛuva. Vakawarwa wweṛei veenumbuaa: Nnu tallolia findo fitaishiwa vvandu.

²⁷Numa ya ifo kasomuka kaenda. Kalolia nndu nsaṅiṛia kyaalo, irina lyamwi lLevi, akee rembo andu a isaṅiṛia kyaalo. Kamwia: Shisoṛa!

²⁸Nae kaburaya-wo foose kakwimboo kansoṛa.

²⁹Na Levi kansongosia imutu inini numba kwamwi. Na mamwiingi wa vasaṅiṛia kyaalo na vandu vengi vakasha vakakaa-fo rembo shoongeń.

³⁰Kyasia Vafarisayo na vaaria va mitisine vakaṅuṅuria vanalosho vamwi vakanumbua: Nki ili mukee ilya na inwa andu emwi na vasaṅiṛia kyaalo iwo na varekwa?

³¹Na Yesu kaaṛua kavaia: Valya vatalole vaṛuyaa mwaanga ndi kita iwo valole tubu.

³²Nansha ivaanga vasumani ndi, kake warekwa, amu vailashike nrimiń.

³³Nawo vakamwia: Nki ili vanalosho va Yohane vakootoya keengi na itereva, na vanalosho va Vafarisayo nawo da, na vanalosho vafo valee na inwa?

³⁴Yesu kavaia: A mumakii ikabiṛia valya vavaange waliń vakootoye, na muni wali akee nawo?

³⁵Kake mikonu ishaa, ili vautwaa muni wali, Uyo kyeeri kyo vakootoyaa.

³⁶Kavakabia na sumu: Eefo nndu aminyaa kirami kya nseto mwiya kakifumia nseto nkuu ndi. Kakifumia-wo aranduaa na ulya mwiya, na kirami kilya kya nseto mwiya kiviaa nsetoń ito nkuu ndi.

³⁷Ana eefo nndu amakii irwaa mfinyo mwiya mbolokoń shikuu ndi. Karwaa-fo, mfinyo to mwiya urandaa mboloko to. Nato wirikaa na mboloko tikashaa.

³⁸Kake mfinyo mwiya kyawara urawa mbolokoń shiiya.

³⁹Ana eefo nndu annwa mfinyo nkuu akunde lingi ito mwiya ndi. Amu anumbuaa: Ulya nkuu nto nnuru.