Read MMA SHIYYA Luka 7 Bible Online

Luka 7 - MMA SHIYYA bible

Luka 7

¹Ili andemaa irera firero filya famwi foose fikaaka marwiń a vandu, kafika kulya Kaperinaumu.

²Na ifo eeifoo nshili umwi wa vasikari iyana, eeworee iketi lyamwi lilole kufui na ufu, nae eekee nndu eenkundiee nnu.

³Ili andeita mboni ya Yesu, kanrumia vasuṛi va Vayuda vantereve ashe ankiṛie iketi lyamwi.

⁴Nawo ili vandefikia Yesu, vakantereva nnu veenumbuaa: Asumani kuntanie kuro.

⁵Amu akundie nnu vandu veru kumande atitania numba yeru ya iterevia.

⁶Kyasia Yesu kaenda andu emwi nawo. Neeli ateekikee kwaasha na numba yamwi, nshili ulya kanrumia ndoo tamwi vashe imwia: Nndumi, manya kutakwareese, amu niń nsumani kwake numbeń yakwa ndi.

⁷Nkyo kiteveto nakulolia shi muni sheeli nsumani isha kwafo ndi. Kake rera kirero kimwi da, na iketi lyakwa livaa isha.

⁸Amu na akwaa nniń nkee nndu nrwaywa kwa si ya vanini vakwa. Noore na vasikari vakee kwa si yakwa. Kwakooya naia uu: Enda! Nae aendaa. Naia ungi: Oṛesho! Nae ashaa. Naia iketi lia lyakwa: Tana kuri! Nae katana.

⁹Ili Yesu andeita kuro kandiikia. Kaindukia syamu ilya indellatia kanumbua: Nta nallolia ikusura inini kuri kunu Isiraeli ndi.

¹⁰Na valya vanderumwa ili vandeuya kyeń, vakakooya iketi lia lilole lyammaa iva isha.

¹¹Nkonu ungi Yesu kaenda muṛiń uvaangwaa Nain. Na vaseṛo vamwi variani nae na vandu kinga.

¹²Ili andefika kufui na mbenge ya muṛi ulya, kakwania-fo na nndu mfu ariwa eendeṛikwaa. Nae eekee ngitani kwa mae, na mae eekee nka nsikeeti. Na vandu veengi va muṛi ulya vakamwimia.

¹³Ili Nndumi andellolia, kavavio̱ mmuu kiimba kyamwi kamwia: Kutakiiye ndi, yeyo!

¹⁴Kaserikia kiraa kilya kirie nnyiṅa kakibaana na valya vakirie vakasalala. Kanumbua: Mwana nakwia: Kwimboo! Na ulya mfu kakwimboo kabooka irera. Na Yesu kawwiiṛia mae.

¹⁵

¹⁶Na vandu valya vakawarwa wweṛei woose vakaṅinisa Iṛuva vakanumbua: Nndu mwauya kisuku ankwimboo kunu kweru. Na vengi vakanumbua: Ni Iṛuva muni ansha isengera vandu vamwi.

¹⁷Na mboni ii yamwi ikakwana urukeń lua loose lwa Yudaya na ngyurukeń tingi toose ta miyanuń.

¹⁸Vanalosho va Yohane vakamwendee mboni to toose.

¹⁹Llyo Yohane avaanga vavili kari ka vanalosho vamwi kavaruma kwa Nndumi vaende imwuṛa: Iwe ni iwe ulya ashaa, ana tikaverea ungi?

²⁰Nawo ili vandefika kwamwi, vakanumbua: Ni Yohane mbatisa atiruma kwafo eenumbuaa: Iwe ni iwe ulya ashaa, ana tikaverea ungi?

²¹Na kyeeri kilya kyeni kakiṛa veengi saka tawo na mavavio na mimuyo mikasha. Na midoń miingi kavaelekia ikalolia.

²²Llyo aaṛua kavaia: Endeń mukandeongoya Yohane ifi mwallolia na iita: Midoń ikee ikooya ilolia. Fitoṛokombo fikee yenda. Vaworwa ni ivave vakee ishia. Vafu marwi vakee iita. Vafu vakee iṛutwa. Vakiva vakee ikwanisio̱ mboni shinuru ta ifura.

²³Na wwa ngoma nndu ulya woose atashituṛukiaa.

²⁴Na valya vanderumwa ni Yohane vameenda, Yesu kabooka iia syamu ilya mboni ta Yohane: A lia mukwimboo mukaenda bateń, nkiki mundeendella-fo? Nsuṛumuta ikee ivivitwa mmburaato?

²⁵Ana nkiki kyamusomuta mukandella-fo? Ni nndu aṛee miseto mirenderi? Valya vaṛee miseto ya utoṛe na ilya ifura wo vakaa numbeń ta kimangi.

²⁶A kikangio mukaenda ni indella-fo ki? Ni nndu mwauya naań? Ee da, namuia: Ni nnini kita nndu mwauya.

²⁷Uu yye atisiṛio̱ ifi: Lla te naruma nrumi wakwa akwirie mbele asongosie shia yafo mbele yafo.

²⁸Nań namuia: Kari ka woose vandeiriwa vvaka eefo nnini kita Yohane ndi. Kake ulya akee munnya wa woose ifo umangiń lwa Iṛuva, ni nnini kita ye.

²⁹Na vandu vandearanya Yohane na akwaa wasaṅiṛia kyaalo wo vakairikia mifurie ya Iṛuva veekubatisio̱o̱ ubatiso lwa Yohane.

³⁰Kake Vafarisayo na vaaria va mavavaso wo vaima kilya Iṛuva andevaṛengia, fulya vandelea indebatiswa yye.

³¹Nndumi kanumbua: A vandu va kishuku ki vvavakanisaa na kiki? Wo vavakani na i?

³²Vavakani na fivana fikee rembo singiṛeń fiivaanganaa fiinumbuaa: A ili tamukabia mbembe neeni mukalea itavana nkiki? Tamuimbia fiimbo fa kiiyo neeni nta iiya!

³³Amu Yohane mbatisa ashe nta ilya nkate ana nta inwa mfinyo. Neeni mukanumbua: Aworwa ni uketo.

³⁴Mwana wa nndu kasha kalya na inwa. Neeni mukanumbua: Uu ni llafu na munwa mfinyo kawara na ndoo na vasaṅiṛia kyaalo na varekwa.

³⁵Kake uṛango lwa dede lwammanyika kwa vana vayo woose valya vakuwara nalo.

³⁶Kyasia umwi wa Vafarisayo kashea Yesu kantereva andelya shoonga kwamwi. Na Yesu kafika kwa Mfarisayo ulya kaaka numba kakaa rembo.

³⁷Na muṛiń ulya eeifoo nndu nka aṛemie na waaisi. Nae ili andemanya, sheeli Yesu akee ilya shoonga kwa Mfarisayo ulya, kasha arie kawembe kawore mafura a kisaamu a ikwaamba.

³⁸Kaserikia Yesu amuuka na kimungo eeiyaa. Na masoru amwi akashololokia marendeń a Yesu. Nae kaangua na mafuli amwi a nrwe. Kaonga na marende amwi mimo na yaamba-fo mafura alya arie.

³⁹Mfarisayo ulya eevaangiee Yesu kwamwi ili andelolia kuro, kakusaṛa ngooń yamwi eenumbuaa: Kifo nndu uu mmwauya fisuku dede, eemanyaa mikae ya nka uu akee imbaana, sheeli mmwaaisi.

⁴⁰Lia eni Yesu kamwia: Simon, noore kindo nkwiaa. Na Simon kamwia: Shiia Mbee!

⁴¹Kamwia: Eeifoo nndu mwakuya vandu awore vaasile vavili. Ulya umwi amwakue shilingi mayana araanu na ulya ungi amwakue shilingi makumi araanu.

⁴²Neeli vandetuṛa kutu kindo kya intaa, kavatia sile woose vali vavili. A kullań iwe? Kari ka vandu iwo vali vavili ni ungau amfuraa kya mmwasi?

⁴³Simon kamwaṛua kamwia: Nkusaṛie ni ulya andentia shiingi. Yesu kamwia: Kwamaaṛua kisumani.

⁴⁴Kaindukia nka ulya kaia Simon: Kulolie nka uu? Lia nasha numba ii yafo, kwashiniinga nta mura wa isangya marende ndi. Nae kashiiritia masoru amwi marendeń akwa na yaangua kaangua na mafuli amwi a nrwe.

⁴⁵Lingi nta kwanshoonga mimo ndi. Nae kuuka lia nasha numba ii yafo, nta amiimua yonga marende akwa mimo ndi.

⁴⁶Lingi nta kwanshaamba mafura nrweń wakwa ndi. Nae kaamba marende akwa mafura a kisaamu.

⁴⁷Kiimba kya iki nakwiań: Nka uu ammaa itio̱ mareko amwi lla kasa eekee meengi, fulya awore ikunda iingi lya ishikunda niń. Kake ulya antio̱ mareko maangu ni ulya awore ikunda yaangu lya ishikunda niń.

⁴⁸Kyasia Yesu kaia nka ulya: Kwammaa itio̱ mareko afo.

⁴⁹Na vandu valya veekee shoongeń andu emwi nae vakakusaṛa ngooń tawo: A nndu uu yye i katia vandu mareko awo?

⁵⁰Nae kaia nka ulya: Kwanshikusura, nakyo nkyo kyankukiṛa! Enda na unambwe!