Read MMA SHIYYA Luka 9 Bible Online

Luka 9 - MMA SHIYYA bible

Luka 9

¹Kyasia kavaanga valya ikumi na vavili kavaniinga finya na miitoṛio ya iitoṛio mimuyo mikasha yoose na ikiṛa saka toose.

²Kavaruma amu vandeongoya vandu mboni ta umangi lwa Iṛuva na ishiisa valole.

³Kavaia: Manya mutakurike nta kindo kyaaṛoń kyanu, nta mbiiri, nta mboloko, nta kishawu, nta fesa, nta manya mutaende murie miseto ivili.

⁴Na numba yoose muyakaa kaań-fo, kumande mukwimboo-fo mwende kungi.

⁵Na kulya vatamuwariaa, ukeń muṛiń ito. Na funga yo ikee marendeń anu vaangatień, ive myorusie kwawo.

⁶Vakawara shia vakaira fimuṛiń fa vandu kimwi kimwi veekwanisaa mboni shinuru ta ifura na ikiṛa vandu valole kundo koose.

⁷Kyasia mangi ilya Herode kaita mboni tilya toose tindetanika. Kasavaa, fulya vandu kiindi veekee inumbua, sheeli Yohane anduka kwa vafu.

⁸Vengi vakanumbua: Ni Elia ansha. Na vengi vakanumbua: Ni umwi wa vaauya fisuku valya va mbele anduka.

⁹Nae Herode kanumbua: Yohane nniń nndenrumbua nrwe. Kake ni i uuń nkee iita mboni tamwi? Kaṛuya mwaanya wa illolia.

¹⁰Varumi valya vakauya vakashemwongoya foose vandetana. Nae kavakurika kaenda kumande muṛiń ulya uvaangwaa Betisaida, amu akaa-fo kyaanya kyamwi andu emwi nawo.

¹¹Neeli mamwiingi wa vandu vandemanya vakansoṛa. Nae kavawaria. Karera nawo mboni ta umangi lwa Iṛuva na valya vatinywa ikiṛwa kavakiṛa.

¹²Ili saa iiakiaa, valya ikumi na vavili vakasha na io akai vakamwia: Vikiań syamu ii muumu yende na ifo fimuṛiń fisengetie na ifo manremiń vandeṛuya-fo kundo kwa ilala na ikooya shoonga, amu kunu tikai mbateń.

¹³Nae kavaia: Vaniingeń shoonga ini! Nawo vakanumbua: Toore kindo kya mmwasi ia kitaare mmikate iraanu na makunga avili ndi. Kikooye ni ise teendaa tindeuṛa shoonga fifilaa vandu iva woose.

¹⁴Amu woomi vaiyo vafikie sha fiku firaanu. Kaia vanalosho vamwi: Endeień vandu wo vakaa rembo matoroto-matoroto, vandu makumi araanu araanu.

¹⁵Vakatana kuro vakavakaarisa rembo woose.

¹⁶Nae kawaria mikate ilya iraanu na makunga alya avili. Kalla na ule iṛuvewu kaana Iṛuva kafiniinga mboṛa. Kaifukyafukya kaniingia vanalosho vamwi vaavie isyamu lia.

¹⁷Vakalya vakawuura woose. Na fibeṛeshu filya fasaa vakafisaṅiṛia ikaishua mikusha ikumi na ivili.

¹⁸Kikava ili eeterevaa Iṛuva kyaanya kyamwi, vanalosho vamwi veekee andu emwi nae. Kavauṛa: A isyamu li linumbuaa niń nkee i?

¹⁹Vakamwaṛua veenumbuaa: Vanumbua: Ni Yohane mbatisa. Na vengi vakanumbua: Ni Elia. Na vengi vakanumbua: Ni umwi wa vaauya fisuku valya va mbele anduka.

²⁰Nae kavaia: A ini munumbuaa nkee i? Petiro kamwaṛua kamwia: Iwe ni iwe Kristo wa Iṛuva!

²¹Kavaikimba kaaṛa vataie nndu kirero kyo.

²²Kanumbua: Kyawara Mwana wa nndu aliswa ukiva wiingi na ilewa wasuṛi na vakohani vanini na vaaria va mitisine, na iwalwa awalwaa na nkonu wa kararu aṛukaa.

²³Kaia vandu vaiyo woose: Nndu akundie ishilatia niń akusue ye muni, akurike nsalaba wamwi nkonu woose ashisoṛe.

²⁴Amu nndu akundie ikiṛa muu wamwi auretaa. Na nndu aretaa muu wamwi kiimba kyakwa aukiṛaa.

²⁵A nkiki kyelekaa nndu, kwakooya awaraa isanga lyoose kakureta ye muni ana ikooya ukiva lwa nrima wamwi?

²⁶Amu nndu woose airaa sonu kiimba kyakwa niń na kya firero fakwa, na Mwana wa nndu airaa sonu kiimba kyamwi, ili ashaa akee na unini lwamwi na lwa Ndee na lwa vamalaika vasongori ifo iṛuvewu.

²⁷Nań namuia kya dede: Vaiyo vaselele ia vatawarwaa ni ufu kitaare vallolia umangi lwa Iṛuva.

²⁸Ammaa irera kuri ikaira sha mikonu nyaanyi. Kakurika Petiro na Yohane na Yakobo karwa uroń andeterevia-fo.

²⁹Kikava ili eeterevaa, fwana ya kisangu kyamwi ikailashika na miseto yamwi ikava myeelwa fyu ikavarama.

³⁰Kwibari a va vandu vavili vakee irera nae, nawo mMose na Elia.

³¹Vakalolika vakee na unini veereraa nae mboni ta ufu lwamwi, sheeli lundeawukiaa kulya Yerusalemu.

³²Petiro na valya veekee andu emwi nae vakaṅinio̱ nruo. Kake ili vandeokia ruoń, vakalolia unini lwamwi na vasuṛi valya vavili vaselele andu emwi nae.

³³Kikava ili veelakanaa nae, Petiro kaia Yesu: Nndumi, neendo ise tikee ia. Tisongosie matengo araru, limwi lyafo iwe na limwi lya Mose na lingi lya Elia. Nae ateeshi kilya akee irera.

³⁴Ili eekireraa kuro, likasha iṛumbe likavaruvia. Vakaeṛea ili vandesikio̱ ni iṛumbe lyo.

³⁵Na ununga lukauka iṛumbeń lia lwireraa: Uu mMwanakwa nndensaua. Mwaranyiń ye!

³⁶Neeli ununga lo kindeitiwa, Yesu kalolio̱-wo ye muni. Nawo vakasia do nta yongoya nndu mikonu ilya meni mboni ta kilya valolia.

³⁷Kyasia ili lya ndesi veeolokaa kulya uroń, syamu shiingi ikakwania nae.

³⁸Na kulya syamuń ilya lia eni nndu umwi karosa ununga kanumbua: Llosha, nakutereva kulle mwana wakwa wa womi, amu ye mmwana ngitani.

³⁹Lla mmumuyo nkasha untambukiaa. Nae lia eni kaishiṛa. Nato ukamwaṛua usukwa kannde mafue, na kwaita wamwotoṛa kikava kyuumu, nato ukamburushuaburushua.

⁴⁰Nań natereva vanalosho vafo vauumbute nta imakii.

⁴¹Yesu kaaṛua kanumbua: Ini kishuku kitawore ikusura kirekie, a nkaa neeni kumande iri ki? A mmusisirie kumande iri ki? Nnde mwanafo na ia!

⁴²Neeli mwana to eellatiaa, mumuyo ukantuula si ukankushakusha. Yesu kanaya mumuyo ulya nkasha. Kakiṛa mwana ulya kanniingia ndee.

⁴³Vandu woose vakaṛiika koṛoń kiimba kya ilolia unini lwa Iṛuva. Neeli veeṛiikaa woose kiimba kya filya andetana, kaia vanalosho vamwi:

⁴⁴Wareń firero fi mmuiaa alli marwiń anu! Mwana wa nndu akee yenda irambikio̱ maakoń a vandu.

⁴⁵Nawo nta yaṛukio̱ nkirero ikyo kikavavia kirero kifise vatakimanyi. Vakaeṛea imwuṛa misendie ya kirero ikyo.

⁴⁶Kyasia vakabooka yuṛana kya nnini wa kari kawo ni ungau.

⁴⁷Na Yesu kamanya makusaṛo a mirima yawo. Kaimboo mwana munnya kanrwaa io akai.

⁴⁸Kavaia: Ulya woose awariaa mwana sha uu akuvavie na irina lyakwa ashiwaria niń. Na ulya woose ashiwaria niń awwaria ulya ashirumie. Amu ulya akee munnya kari kanu mu woose, ito yye nnini.

⁴⁹Yohane kaaṛua kamwia: Nndumi, tindelolia nndu eeumbutaa mimuyo mikasha eesendaa irina lyafo. Neese tikamwima, fulya atakulatie ariani neese.

⁵⁰Yesu kamwia: Manya mutamwimi, amu ulya atamuleye akee taari yanu.

⁵¹Kyasia ili mikonu yamwi ya iroswa iṛuvewu indefika, ye muni kaorusa kisangu kyamwi kikasumana na shia ya yenda na Yerusalemu.

⁵²Llyo aruma vaseṛo vamwi vamwirie mbele. Vakandefika muṛiń wa Vasamaria vafurie indensongosia-fo andu a yeveṛa.

⁵³Nawo nta iwwaria, fulya kisangu kyamwi kyorusie shia ilya ya yenda Yerusalemu.

⁵⁴Kyasia ili vaseṛo vamwi vandelolia kive kuro, Yakobo na Yohane vakanumbua: A le Nndumi, kufurie tinumbue muro woloke uuka iṛuvewu uvamaa sha lia Elia atana?

⁵⁵Nae kavaindukia kavareria eevaiaa: Niikai muteeshi mumanyi mukee vandu va Mumuyo wa mikae ingai?

⁵⁶Fulya Mwana wa nndu ansha ireta mirima ya vandu ndi, ni iikiṛa. Llyo vaenda muṛiń ungi.

⁵⁷Neeli varie shia veendaa, nndu umwi kamwia: Nkusoṛaa kundo koose kwendaa.

⁵⁸Yesu kamwia: Mabaaṛwe awore marina ayo na ndee tiwore fifuri fayo, kake Mwana wa nndu awore andu a yekeṛia nrwe wamwi ndi.

⁵⁹Kakooya nndu ungi kamwia: Shilatia! Nae kamwia: Shiniinga mbele muumu neende nndeṛika vaava wakwa.

⁶⁰Nae kamwia: Tia vafu iwo vaṛike vafu vawo veni. Kake iwe enda andekwanisa umangi lwa Iṛuva.

⁶¹Na ungi kanumbua: Nkusoṛaa, Nndumi. Kake shiniinga mbele muumu nndeia va numba yakwa vakaa kibua.

⁶²Yesu kamwia: Nndu kamaa iwara ikumbi lya irema na numbe na illa lingi numa, ito asumanaa na umangi lwa Iṛuva ndi.