Read MMA SHIYYA Yohane 11 Bible Online

Yohane 11 - MMA SHIYYA bible

Yohane 11

¹Eeifoo nndu umwi alole, yye Lasaro wa kulya Betania kimuṛiń kilya kya Maria na Marita mfwamae wamwi.

²Na Maria to yye aamba Nndumi mafura a kisaamu na yangua marende amwi na mafuli a nrwe wamwi. Na mwanamae wamwi Lasaro yye alole.

³Kyasia vamfwamae valya vamwi vakaramia Yesu nrumi veenumbuaa: Nndumi, ulya kunkundie a to alole.

⁴Kyasia ili andeita kuro kanumbua: Saka ii yya ufu ndi, yya yorusa unini lwa Iṛuva, amu Mwana wa Iṛuva autie-wo iitikiswa.

⁵Na Yesu eekundanii na Maria na mfwamae na Lasaro.

⁶Ili amaa iita alole, kaengeṛia isinda alya akai mikonu ivili.

⁷Numa yayo kaia vaseṛo vamwi: Ndefoń tuuye na kulya Yudaya.

⁸Vaseṛo vamwi vakamwia: Llosha, ni alli kuri da Vayuda valya veeriee kya ikukaba na mawe, nawe kufurie yuya nafo lingi?

⁹Yesu kaaṛua: Saa ta nsanyiń ni ikumi na ivili se? Kwakooya nndu aṛuaṛua nsanyiń akabwaa urende ndi, fulya alolie saa ya isanga li.

¹⁰Kake kwakooya nndu aṛuaṛua ili kio akabwaa urende, fulya atawore saa kari kamwi.

¹¹Ili andemaa irera kuro kavaia: Ndoo yeru Lasaro allala. Kake nkee yenda nndemwanta.

¹²Kyasia vanalosho valya vamwi vakamwia: Nndumi, kwakooya niikai alele, ashiaa.

¹³Kake ye Yesu arera kya ufu lwamwi. Nawo vakakusaṛia sheeli arera mboni ta ilala ruo.

¹⁴Llyo Yesu avaia na baa: Lasaro amfwa.

¹⁵Nań namfura kiimba kyanu, fulya kitaare mfo niikaii, amu muutie-wo ikusura. Kake ndefoń teende kwamwi.

¹⁶Kyasia Toma ulya avaangwaa wa yaasa kaia vanalosho valya vengi: Ndefoń neese, amu tindefwa andu emwi nae.

¹⁷Kyasia ili Yesu andefika-fo, kakooya ammaa mikonu iini mbangeń.

¹⁸Na Betania ukee kufui na Yerusalemu sha andu a kyeenga kya saa.

¹⁹Na Vayuda veengi veenshaa kulya kwa Marita na Maria, amu vashevalembalemba kiimba kya mwanamae wawo.

²⁰Kyasia ili Marita andeita sheeli Yesu akee isha, kandemwondoṛa. Na Maria kakaa ifo numba.

²¹Kyasia Marita kaia Yesu: Nndumi, kikooye kwikee ia, mwanamae wakwa eefwaa ndi.

²²Kake na akwaa na alli niishi, sheeli kyoose kuterevaa Iṛuva, Iṛuva akuniingaa.

²³Yesu kamwia: Mwanamaa aṛukaa.

²⁴Marita kamwia: Niń niishi namanya, aṛukaa ili vafu vaṛukaa nkonu ulya wa ifurumia.

²⁵Yesu kamwia: Niń nniń nduti na muyamuu. Na nndu akusuranaa nań na akwaa afwa, akaa na muu.

²⁶Na ulya woose eefo na muu kakusurana nań, akifwaa lingi ndi kumande miṛeṛe. A iwe kukusurie kuro?

²⁷Nae kamwia: Ee Nndumi, niń nkusurie sheeli iwe ni iwe Kristo Mwana wa Iṛuva ito eenringisio̱o̱ sheeli ashaa isangeń.

²⁸Ammaa irera kuro kakwimboo kandevaanga mfwamae Maria kiṛisiń kanumbua: Llosha ansha akee ikuvaanga.

²⁹Nae ili andeita kuro, kakwimboo byań kansoṛa.

³⁰Nae Yesu eemfikaa kimuṛiń kilya ndi. Eekikee alya akwania na Marita.

³¹Kyasia Vayuda valya veekee andu emwi na Maria ifo kyeń veellembalembaa vakalolia Maria akwimboo byań kasomuka wooṛo. Nawo vakansoṛa veekusaṛaa sheeli akee yenda mbangeń amu andelilia-fo.

³²Kyasia ili Maria afika io Yesu akai na illolia, kawa si marendeń amwi. Kamwia: Nndumi, kifo nkunu kwikaii, mwanamae to wakwa eefwaa ndi.

³³Kyasia ili Yesu andellolia eeiyaa na Vayuda valya veerianii nae veeiyaa, kavawwa mmuu kanaria nrimiń wamwi.

³⁴Kavauṛa: Nkwi mundendika? Vakamwia: Oṛesho Nndumi kundella!

³⁵Yesu kaiya na masoru akasha.

³⁶Kyasia Vayuda valya vakanumbua: Lleń kasa eenkundiee!

³⁷Kake kiindi kyawo vakanumbua: A nndu uu andemakii itaṛambua nndu ulya ndoń miso, andelemwa are iima nndu uu eefwaa?

³⁸Kyasia kavawwa mmuu lingi nrimiń wamwi kafika mbangeń. Nayo ikee mbanga shiremi iweń, na iwe likee yamiṛwa-wo.

³⁹Yesu kanumbua: Uteń-wo iwe lyo! Marita mfwamae wa ulya andefwa kamwia: Nndumi, ambooka iraa tee, amu eemmaa-fo mikonu iini.

⁴⁰Yesu kamwia: Neenkuiaa se kwakooya kwakusura kuloliaa unini lwa Iṛuva?

⁴¹Kyasia vakauta-wo iwe lia. Yesu kaimboo miso amwi na ule kanumbua: Wui Nde, nakwaana, fulya kwanshaaranya.

⁴²Nań niishi sheeli kushaaranyaa mikonu yoose. Kake kikangio narera kuri nkiimba kya wiingi lu lwa vandu lushilengetie, amu vautie-wo ikukusura vamanye sheeli ni iwe kushirumie.

⁴³Neeli andemaa irera kuro, karera na ununga unini kavaanga: Lasaro somuka na kunu wooṛo!

⁴⁴Nndu ulya mfu kasomuka na kulya wooṛo. Nae afingiefingie na firami marende na maako. Na kisangu kyamwi kisikie na kirami kya yangua nrike. Yesu kavaia: Mboṛomueń muntie aende.

⁴⁵Kyasia Vayuda veengi kari ka iwo veenshaa kwa Maria ili vandelolia kilya andetana, vakankusura.

⁴⁶Kake kiindi kyawo vakaenda kwa Vafarisayo vakandevaia filya Yesu atana.

⁴⁷Kyasia vakohani vanini na Vafarisayo vakavaanga kikwena kinini kya vangyama vakanumbua: Titanaa are, ili nndu uu akee itana myorusie minini miingi kuri?

⁴⁸Tikamia kuri vandu woose vankusuraa. Numa Varome vashaa na itisoka uruka na vandu.

⁴⁹Umwi wawo nKayafa akee nkohani nnini mwaka ulya. Nae kavaia:

⁵⁰Ini mwishi kindo ndi. Nta mukusaṛie sheeli llyo ńwana nndu umwi afwe andu a vandu kita ili vandu woose varekaa ndi.

⁵¹Firero fi afirera na uṛango lwamwi lo weni ndi. Kake nkiimba kya ili eekee nkohani nnini mwaka ulya kaauya sheeli Yesu afiyaa vandu va uruka.

⁵²Kake afiyaa vandu va uruka wo veni ndi, kake afiyaa na vana va Iṛuva vanyanyakie, amu avasańiṛie andu emwi.

⁵³Kuuka nkonu ulya vakarera kyama kya iwwaa.

⁵⁴Nae Yesu akiṛuaṛua na bata kari ka Vayuda ndi. Kake kauka-fo kaenda muungoń ukee kufui na bateń. Kafika muṛiń uvaangwaa irina lyayo Efiraimu kakaa-fo andu emwi na vanalosho vamwi.

⁵⁵Kisuku kilya kya Pasaka kiikee kufui na vandu veengi va uruka lua vakarwa na ule Yerusalemu ili kitaare kisuku kya Pasaka kyeemfikaa, amu vakwilisie-fo.

⁵⁶Vakaṛuya Yesu vakakurera wo veni na veni vaselele ifo numba ya Iṛuva: A mulla ini, ashaa kisukuń iki ana wode?

⁵⁷Nawo vakohani vanini na Vafarisayo veewavasaa, kwakooya nndu eeshi kundo Yesu akai, arambue amu vandewwara.