Read MMA SHIYYA Yohane 12 Bible Online

Yohane 12 - MMA SHIYYA bible

Yohane 12

¹Ili ikiseere mikonu irindaru kisuku kya Pasaka kifike, Yesu kafika muṛiń wa Betania kulya Lasaro eerulee ulya Yesu anduta kwa vafu.

²Vakamwikia shoonga na Marita kavaavia. Na Lasaro eekee umwi wa valya valye shoonga andu emwi na Yesu.

³Na Maria kaimboo wembe luwore mafura a mikae minuru kutu, awore uuru unini. Kaamba marende a Yesu mafura alya kaangua na mafuli amwi a nrwe. Na numba yoose ikaishua kisaamu kya mafura alya.

⁴Na Yuda Isikariote umwi wa vaseṛo vamwi ulya asheṛiinga Yesu kyeeri kya numa kanumbua:

⁵A mafura va naamu ki ili kitaare akumbwa na shilingi mayana araru, tiniingwa vakiva?

⁶Arera kuro kiimba kya ililia vakiva ndi, kake mfulya eekee inini. Nae yye eekurikaa mboloko ilya ya fesa na iiva eeivaa-fo kiindi kya fesa tilya tiirawaa-fo.

⁷Yesu kamwia: Nrie, afisa mafura o kumande nkonu wa iṛikwa lyakwa.

⁸Fulya vakiva mukee nawo mikonu yoose, kake niń mukaa nań mikonu yoose ndi.

⁹Kyasia vandu veengi va ifo kwa Vayuda vakamanya sheeli mfo akai. Vakasha nafo, nta nkiimba kya Yesu ye muni da ndi, kake naamu valolie na Lasaro ulya Yesu andenduta kwa vafu.

¹⁰Na vakohani vanini vakafukya kikwena kya iwaa Lasaro nae.

¹¹Fulya na kwa kiimba kyamwi Vayuda veengi vandeenda vakakusura Yesu.

¹²Neeli lya ndesi yayo vandu veengi iwo vandesha kisukuń vakaita sheeli Yesu akee isha Yerusalemu.

¹³Vakawara maṛamba a maangashi vakasomuka vandemwondoṛa. Vakakaba nndoṛo vakanumbua: Osiana! Eetikiswa ulya asha na irina lya Nndumi kava mangi wa Isiraeli!

¹⁴Na Yesu eenkooyaa kyaashe kya nshungu kakyaṛukia, sheeli kikee kitisiṛe:

¹⁵Manya kuteeṛee iwe sambuṛa ya Sion! Lla te mangi yafo yakushea aaṛukie kyaasheń kya nshungu.

¹⁶Mboni to taaṛukia vanalosho vamwi io mbele ndi. Kake ili Yesu andemaa yenda uniniń lwamwi, llyo vandekumbua sheeli yye eenti-siṛioo kuro na sheeli vammutania kuro.

¹⁷Kyasia syamu ilya iikee andu emwi nae lia avaanga Lasaro kasomuka mbangeń kanduta, nayo ikanrambua.

¹⁸Na kiimba kya ikyo syamu ilya ya vandu ikandemwondoṛa, fulya vaita sheeli antana kindo kyo kya iṛiikisa.

¹⁹Kyasia Vafarisayo vakakurera wo veni na veni: Mulolie sheeli nta kindo mukimakii. Lleń te isanga lyoose linrie numa.

²⁰Kari ka vandu valya varwe na kulya Yerusalemu kisukuń vandeterevia-fo Iṛuva veeifoo na Vagiriki kiindi.

²¹Vagiriki wo vakashea Filipo akee wa muṛi ulya wa Betisaida, nato ukee muungoń wa Galilaya. Vakantereva veemwiaa: Nndumi ise tifurie ilolia Yesu.

²²Na Filipo kaenda kandeongoya Anderea. Filipo na Anderea vakaenda vakandeongoya Yesu.

²³Na Yesu kavaaṛua kavaia: Kyeeri kya Mwana wa nndu kyamfika, amu auye uniniń lwamwi.

²⁴Nkue namuia kya dede: Kwakooya kitaare mbeke ya umbi yeeṛwa si uteriń na ibwaa ibwaa, ikaa yo sheni da ikee imwi nsi. Kake ikambwaa ireekaa na innde mbeke shiingi.

²⁵Kyasiań ulya akundaa muu wamwi auretaa, na ulya asuaa muu wamwi kunu isangeń ili aukiṛaa na ikooya muu utakisiaa.

²⁶Na ulya afurień ishiṛundia kyawara ashisoṛe na utomari. Na alya niń nkai wwo na iketi lyakwa likaa da. Na nndu kashiṛundia na utomari, Vaava wakwa amwitikisaa.

²⁷Alli nrima wakwa wansavaa. Nań narerań are? Nnumbuaa: Vaava shuuta, kaaṛa ntafikie saa yo? Kake kiimba kya ikyo nanshea saa yo.

²⁸Wui Vaava, itikisa irina lyafo! Llyo ununga lwitiwa luuka iṛuvewu lwinumbuaa: Nammaa iliitikisa na lingi lliitikisaa.

²⁹Syamu ya vandu valya veeyoo ili vandeita vakanumbua: Kiṛuṛumu kyambaṛangaka. Vengi vakanumbua: Mmalaika arera nae.

³⁰Yesu kaaṛua kanumbua: Ununga lu lwarera kiimba kyakwa ndi, nkiimba kyanu.

³¹Alli uumisio lwa isanga li lwaawukia. Alli mwitoṛo wa isanga li aburuswaa aliuke.

³²Nań ili nammaa iroswa nuutwa isangeń, llyo noomuaa woose na kwakwa.

³³Kirero ki kakirera, amu aoruse ni ufu lungalu luweree.

³⁴Kyasia vandu valya veeyoo vakamwata: Ise tamiita ifo uvavasoń sheeli Kristo akaa kumande miṛeṛe. A iwe kwarerań are: Kyawara Mwana wa nndu aroswa na ule? A Mwana to wa nndu yye iń?

³⁵Kyasia Yesu kavaia: Langa ikikee andu emwi neeni kyeeri kyaangu. Kuwareń na langa yo ili mukiiwore, amu mutamiṛwa ni llema. Amu ulya akee iṛuaṛua llemiń eeshi kulya aendaa ndi.

³⁶Ili mukiwore langa, kusureń langa yo, amu muve vana va langa.

³⁷Mfo firero Yesu anderera kamaa. Kalakana na vandu kandekufisa. Kake lla kasa andetana myorusie miingi kuri mbele yawo, nawo nta vandenkusura ndi.

³⁸Kindeva kuro, amu kirero kya mwauya kisuku ulya Yesaya andekirera kyawukie: ”Nndumi, ni i andekusurana na myongoye yeru? A lingi ni i amaaṛukio̱ mfilya uko lwa Nndumi lukee itana?“

³⁹Nkyo kikangio vatandemakii ikusura, amu Yesaya arera na kingi:

⁴⁰”Awariṅanisa miso awo kaa-ṛua ngoo tawo sheemeri, kaaṛa vatalolie na miso awo na imanya mirimiń yawo veelashike, nań wakiṛe.“

⁴¹Firero fo Yesaya andefirera, fulya andelolia unini lwa Yesu kasenda mboni tamwi.

⁴²Kake veeifoo na vandu va nrwe veengi vandenkusura. Kake kiimba kya Vafarisayo vanderambua na baa ndi, kaaṛa vataimwa veeakaa numba ya iterevia.

⁴³Amu wo veekundiee iitikiswa vvandu kita iitikiswa ni Iṛuva.

⁴⁴Kyasia Yesu karosa ununga kanumbua: Ulya ashikusurie niń, nniń ashikusurie ndi, ni ito andeshiruma.

⁴⁵Na ulya ashilolie niń, alolie na ito andeshiruma.

⁴⁶Niń nansha isangeń nava langa, naamu nndu woose ashikusurie atakikaa llemiń.

⁴⁷Na kwakooya nndu aitaa firero fakwa kara atafiwara, nniń mmwumisiaa ndi. Amu niń nansha nuumisie isanga ndi, nansha ikiṛa isanga.

⁴⁸Ulya ashileaa niń kalea na firero fakwa, ankooya mumwumisia. Kirero kilya nankirera nkyo kimwumisiaa nkonu ulya wa ifurumia.

⁴⁹Amu nkindo nuutie kwakwa shi muni nndekirera ndi. Nde yakwa ito ashirumie yye ashiniingia ivavaso lya kindo nnumbuaa na kindo nreraa.

⁵⁰Nań niishi kilya avavasa nkyo kirie muu wa miṛeṛe. Kyasiań kilya nkee irera nkee ikirera kisumani na kilya Nde anshiia.