Read MMA SHIYYA Yohane 13 Bible Online

Yohane 13 - MMA SHIYYA bible

Yohane 13

¹Kyasia ili kitaare kisuku kya Pasaka kyeemfikaa, Yesu eemmanyaa sheeli kyeeri kyamwi kyamfika akwimboo kunu isangeń aende kwa Nde. Nae sheeli andekunda iva vamwi kunu isangeń, nkuro andevakunda kumande ifurumia.

²Neeli veelyaa shoonga ya ukwawuń, Satana eemmaa yatia Yuda Isikariote mwana wa Simon nrima wa indiinga.

³Nae Yesu muni eemmanyaa sheeli Nde ammurambikia findo foose maakoń amwi na sheeli andeuka kwa Iṛuva, nae auyaa kwa Iṛuva.

⁴Kakwimboo shoongeń kakuuta nseto wamwi wa yeeṛia kaimboo kirami kakufingia kisiń.

⁵Numa kaletia usokwa mwashoń kabooka isangya vanalosho vamwi marende na ivaangua na kirami kilya akufingie nakyo.

⁶Neeli andefikia Simon Petiro, ye kamwia: Nndumi, iwe kushisangye marende niń?

⁷Yesu kaaṛua kamwia: Kilya niń nkee itana kukimanyaa alli ndi, kake kukimanyaa numa.

⁸Petiro kamwia: Iwe kushisangyaa marende kutu ndi. Yesu kamwia: Kwakooya kitaare nkusangyaa marende, kuwore ilungana nań ndi.

⁹Simon Petiro kamwia: Nndumi, mmarende akwa wo meni tubu ndi, na akwaa mmaako na nrwe deń.

¹⁰Yesu kamwia: Ulya ammaa ikusangya akitinye lingi isangywa ndi kita marende tubu, amu vvili wamwi mmwelwa woose. Neeni mwamiiliswa, kake mmu woose ndi.

¹¹Amu eeishii ulya andiingaa. Nkyo kiteveto kanumbua: Nta mmu woose mukee vailise ndi.

¹²Kyasia ili ammaa ivasangya marende, kaimboo nseto wamwi. Kakaa-fo lingi rembo kavaia: A naań mwamaaṛukio̱ ni ikyo namutania?

¹³Ini mushivaangaa llosha na Nndumi. Neeni mwarera kinuru, amu nniń ye.

¹⁴Kyasia kwakooya niń namusangya marende nkee Nndumi wanu na llosha, kyawara mukusangye marende neeni mu veni na mu veni.

¹⁵Fulya nammuniinga myorusie, amu sheeli niń nammutania, neeni mukutanie kuro.

¹⁶Nkue nkue namuia: Iketi ni inini kita nndumi wamwi ndi, ana ulya anderumwa ni nnini kita ulya andenruma ndi.

¹⁷Mukammanya ifi muvaa va ngoma mukatana kuro.

¹⁸Nta narera kuro kyanu mu woose ndi. Niń niishi valya navasaua. Kake kyawara mitisine ilya yawukie: ”Ulya aliye nkate wakwa ye anshiimboyo sendu ashikabe inanga.“

¹⁹Kake ifi natembeṛie imuia alli kitaare kyawa, amu ili kindevaa naamu mukusure sheeli nniń ye.

²⁰Nkue nkue namuia: Ulya woose awariaa nndu nammuruma anshiwaria niń. Na ulya ashiwaria niń awwaria ulya andeshiruma.

²¹Neeli Yesu ammaa irera kuro, kataṛaaka nrimiń karambua kanumbua: Nkue nkue namuia: Umwi wanu ashiṛiingaa.

²²Vanalosho vakakullalla vakakwiria nunua ni i akee isendwa.

²³Eeifoo umwi wa vanalosho vamwi eefwitanii na Yesu, nae yye ulya Yesu amwita mbele.

²⁴Kyasia Simon Petiro kansinia kamwia: Mwuṛe ni i ito akee insenda?

²⁵Numa ulya eefwitanii na Yesu kamwuṛa: Nndumi, ni iń?

²⁶Yesu kaaṛua: Ni ulya ninkabiaa kibeṛeshu kyaashoń ninniingie. Kakaba kibeṛeshu kilya kyaashoń. Kakiimboo kaniingia Yuda Isikariote ulya wa Simon.

²⁷Nae ili andemaa ilya kibeṛeshu kilya, llyo Satana andemwaka. Kyasia Yesu kamwia: Kilya kurie itana tana ree!

²⁸Ana nta nndu umwi wa valya veekee shoongeń andemanya kiteveto kamwia kuro.

²⁹Amu kiindi vakusaṛa ili Yuda arie mboloko ilya ya fesa, eeba Yesu amwia: Enda yuṛa findo fitinye fa kisuku, ana aniingie vakiva kindo.

³⁰Kyasia ili andemaa ilya kibeṛeshu kilya, lia eni kasomuka. Nakyo kiikee kyeeri kya kio.

³¹Kyasia ili ansomuka na wooṛo, Yesu kanumbua: Alli Mwana wa nndu aṅṅiniswa na Iṛuva kaṅiniswa kiimba kyamwi.

³²Kwakooya Iṛuva amiitikiswa kiimba kyamwi na Iṛuva amwitikisaa akee nae muni. Lingi amwitikisaa alli kuri.

³³Ini vana vakwa, kiseere kyeeri kyaangu nkee andu emwi neeni. Neeni mushiṛuyaa. Na sha lia niia Vayuda: Alya neendaa niń ini mumakii isha-wo ndi, nkuro na alli nkee imuia.

³⁴Ni ivavaso iiya nkee imuniingia, Ilyo ili: Kundaniń sheeli nndemukunda ini, neeni kundaniń kuro.

³⁵Kindo vandu woose vamumanyaa nakyo mwawa vanalosho vakwa ni ikundana, kwakooya mwakundana ini mu veni na mu veni.

³⁶Simon Petiro kamwuṛa: Nkwi kwendaa, Nndumi? Yesu kamwaṛua: Kulya niń neendaa kumakii ishisoṛa alli ndi, kake kushisoṛaa-fo numa.

³⁷Petiro kamwia: Nndumi, naamu ki ili ntamakii ikusoṛa alli? Niń nrekaa-wo muu wakwa kiimba kyafo.

³⁸Yesu kamwaṛua: Iwe kurekaa muu wafo kiimba kyakwa? Nkue nkue nakuia: Nguku ya shawu kitaare yamiikoro kushikanaa kararu.