Read MMA SHIYYA Yohane 17 Bible Online

Yohane 17 - MMA SHIYYA bible

Yohane 17

¹Mfo firero fo Yesu andefirera. Kaimboo miso amwi kalla na ule iṛuvewu kanumbua: Wui Nde, kyeeri kyamfikań. Kuṅinise Mwana wafo, na Mwana wafo akwitikise iwe.

²Ni iwe kunniingie finya ya ishilia vandu woose, amu woose kwammuniingia avaniinge muu wa miṛere.

³Na muu uu wa miṛere ni ikumanya iwe sheeli ni iwe kukee Iṛuva wa dede, na ito kunrumie yye Yesu Kristo.

⁴Nań nankwitikisa ia isangeń naawutiaa ishoṛa lyo kwanshilivavasa lya iṛunda.

⁵Na alli, wui Nde, shiitikisań ifo kwafo kwishiiningaa unini lua niikee nalo kwafo lia kitaare isanga lyeentanwaa.

⁶Irina lyafo nallirambuya vandu va kundevashiniinga kuvauta kunu isangeń. Veekee vafo nawe kwavashiniinga. Na kirero kyafo vankiwara.

⁷Alli vammanya sheeli ifo foose kundeshiniinga nkwafo fuukie.

⁸Amu firero filya kundeshiniinga navvaniinga nawo. Nawo vakafiwara vakamanya dede sheeli nkwafo nuukie. Vakakusura sheeli ni iwe kushirumie.

⁹Nań wwo nkee ivaterevia. Ni isanga nkee iliterevia ndi. Vvalya kwavashiniinga, fulya wo vakee vafo.

¹⁰Na foose fikee fakwa mfafo. Na ifo fikee fafo mfakwa. Nań ifo kwawo naṅṅinisio̱.

¹¹Nań nkikee lingi isangeń ndi. Nawo vakaa isangeń. Nań nkee isha na kwafo. Wui Nde Nsongori, varinge vakaa na irina lyafo ili kushiniingie niń, nawo vave kimwi neese.

¹²Ili niikee andu emwi nawo niikee iringa iwo kavashiniingie na ivalla niivandamisaa na irina lyafo. Na eefo nta umwi kari kawo andereka ndi kita mwana ulya wa ureti, amu kilya kikee kitisiṛe kyawukie.

¹³Na alli nkee ishań na kwafo, na firero fi nafirera nkee kunu isangeń, naamu vakaa na ifura li lliwore, nalyo liishue ifo mirimiń yawo.

¹⁴Niń navvaniingia kirero kyafo. Na va isanga vakautia-wo ivasua, fulya wo vatakee va mikae ya isanga, sheeli nań ntakee wa mikae ya isanga.

¹⁵Nkee ikutereva amu kuvaute isangeń ndi, kake naamu kuvaringe Nkituva to nkasha.

¹⁶Wo nta wa mikae ya isanga ndi, sheeli nań ntakee wa mikae ya isanga li.

¹⁷Vailise na ikyo kikee dede! Na kirero kyafo nkyo ikyo kikee dede.

¹⁸Na sheeli kundeshiruma nafika kunu isangeń, nań nkuro da nndevaruma vafike masangeń.

¹⁹Na kiimba kyawo nakwilisa, naamu nawo vailiswa.

²⁰Kake ni iwo tubu nkee ivatervia ndi. Nkee iterevia na akwaa ni iwo vandeshikusuraa kiimba kya kirero kyawo.

²¹Nawo vave kimwi woose, sheeli iwe Nde kusaangi nań, nań nsaangi nawe, naamu vave kimwi neese na va isanga vautie-wo ikusura sheeli ni iwe kushirumie.

²²Na unini lua kundeshiniinga iwe navvaniinga nawo vave kimwi, sheeli neese tikee kimwi.

²³Niń vve andu emwi nawo, nawe kuve andu emwi nań, nawo vave vandu va imarisia iva kimwi. Na va isanga vautie-wo imanya sheeli ni iwe kushirumie niń, lingi kwavvakunda sheeli kundeshikunda niń.

²⁴Wui Nde, mfurie na akwaa ni iwo kundevashiniinga vave andu emwi nań io nkai, amu vamakii ilolia unini lwakwa ilo kushiniingie. Amu kwashikunda ilyo kitaare isanga lyeentanwaa.

²⁵Wui Nde nsumani, isanga likwishi ndi, kake niń nndekumanya. Nawo vakamanya sheeli ni iwe kushirumie.

²⁶Nań nawarambuya irina lyafo, na lingi nee-ngeṛiaa ivarambuya. Na ikunda lyo kundeshikunda nalyo likaa ifo mirimiń yawo, nań nkaa nsaangi nawo.