Read MMA SHIYYA Yohane 18 Bible Online

Yohane 18 - MMA SHIYYA bible

Yohane 18

¹Neeli Yesu ammaa irera kuro, kakwimboo andu emwi na vanalosho vamwi. Kafika kwa kulya ya iriko lya Kidiron kulya kuwore nnda. Kaira nafo ye na vanalosho vamwi.

²Kyasia na Yuda ulya andiingia eeishii andu alya, fulya Yesu eendaa-fo keengi na vanalosho vamwi.

³Kyasia ili Yuda amaa iwaria syamu ya vasikari na maketi andeuka kwa vakohani vanini na Vafarisayo, kasha nafo ariani nawo varie fimuli na taa na fiya.

⁴Kyasia Yesu eemmanyaa filya foose findevviaa. Kasomuka kavauṛa: Uu mukee induya ni i?

⁵Vakamwaṛua: Ni Yesu wa kulya Nasareti. Yesu kavaia: Nniń ye. Na Yuda ulya mundiinga eekee andu emwi nawo.

⁶Kyasia ili andevaia: Nniń ye, vakauya na numa vakawa na si.

⁷Kavauṛa lingi lya kavili: Mukee iṛuya i? Nawo vakanumbua: Ni Yesu wa kulya Nasareti.

⁸Yesu kavaaṛua: Neemmaa imuia: Nniń ye. Kyasia kwakooya nniń mukee ishiṛuya, tień iva vaende.

⁹Kindeva kuro, amu kifike kirero kilya eenreraa: Valya kundevashiniinga nta umwi wawo nammureta.

¹⁰Kyasia Simon Petiro eeworee shombo kaisomua. Kakaba nayo iketi lya nkohani nnini kamminya kuri kwa uko usha. Na iketi lia irina lyamwi mMaliko.

¹¹Kyasia Yesu kaia Petiro: Wiiṛa shombo kiboń kyayo. Naare? Umbata lo Vaava anshiniinga ntanwi se?

¹²Kyasia vasikari valya andu emwi na nnini wawo na vaṛundi va Vayuda vakawara Yesu vakamfinga.

¹³Vakankurika lya mbele kwa Anna. Nae akee nkwe wa Kayafa ulya akee nkohani nnini mwaka ulya.

¹⁴Na Kayafa yye ulya andeia Vayuda sheeli: Llyo ṅwana nndu umwi afwe andu a vandu woose va uruka.

¹⁵Na Simon Petiro na mwanalosho ungi vakalatia Yesu. Mwanalosho ulya ungi eekwishii na nkohani ulya nnini. Kaaka kulya numba ya nkohani nnini andu emwi na Yesu.

¹⁶Na Petiro kasalala mwaangoń kiwooṛo. Kyasia mwanalosho ulya aishiwa ni nkohani nnini kasomuka karera na nringi ulya wa mwaango wa kika kaata Petiro kari.

¹⁷Kyasia isinga lia lya kika likee iringa mwaango likaia Petiro: Iwe nawe kukee se umwi wa vanalosho va nndu uu? Nae kanumbua: Nniń ndi.

¹⁸Na maketi alya na vaṛundi veeselelee-fo veemaataa muro wa makaa vakaora, amu iifo mbioo. Nae Petiro kasalala-fo andu emwi nawo eeoraa muro.

¹⁹Kyasia nkohani nnini kauṛa Yesu mboni ta vanalosho vamwi na ta miloshie yamwi.

²⁰Yesu kamwaṛua: Niń nrerie na baa na vandu woose vakaita. Niń mikonu yoose nndelosha ifo numba ta iterevia na numba ya Iṛuva kundo Vayuda woose vakwania. Ana nta kindo nnderera kiṛisi.

²¹Kukee ishuuṛań are? Uṛa iwo vandeshiita kilya nnderera nawo. Iwo veeshi kilya nndenumbua niń.

²²Ili andemaa irera kuro, nndu umwi wa vaṛundi valya aselele-wo kufui kakaba Yesu ui eenumbuaa: Nkuro kukee yaṛua nkohani uu nnini?

²³Yesu kamwaṛua: Kwakooya narera kikasha, rambuań ukasha lo. Kake kwakooya narera kisha, kwashikabiań ki?

²⁴Kyasia Anna kanrika afingie kuro afitwa kwa Kayafa akee nkohani nnini.

²⁵Kyasia Simon Petiro eeselelee-fo eeoraa muro. Vakamwia: Iwe nawe kukee umwi wa vanalosho vamwi se? Nae kakana kanumbua: Nniń ndi.

²⁶Umwi wa maketi a nkohani nnini nae akee mfwari wa ulya Petiro aminya kuri kanumbua: Niń neenkuloliaa se alya nndeń kukee andu emwi nae?

²⁷Petiro kakana lingi. Na lia eni nguku ya shawu ikaikoro.

²⁸Kyasia vakauta Yesu kwa Kayafa vakanrwaa kulya numba kwa nshili wa Kaisari. Nkyo kikee kyeeri kya ngama. Kake wo veni nta vaaka ifo numba ya nshili nnini ndi, naamu vatakooye nsindaṛa uveemi veelyaa Pasaka.

²⁹Llyo Pilato asomuka na wooṛo kasha io vakai kanumbua: Ni uṛiingi ki mwannde lwa nndu uu?

³⁰Vakaaṛua vakamwia: Kifo kitaare nndu uu eekee mutana fikasha, tiimunndee kwafo ndi.

³¹Kyasia Pilato kavaia: Nkurikeń ini mukandemfukiya mwaandu usumani na mavavaso anu! Llyo Vayuda vamwia: Ise toore muumu wa iwaa nndu ndi.

³²Kikava kuro, amu kifike kilya Yesu eenreraa eeorusaa ni ufu ki afwaa.

³³Kyasia Pilato kaaka lingi ifo numba ya nshili wa Kaisari. Kavaanga Yesu kamwuṛa: A iwe kukee mangi wa Vayuda?

³⁴Yesu kaaṛua: Ni iwe ku muni kwarera kwa makusaṛo afo ana vvandu vengi vakuia mboni takwa?

³⁵Pilato kaaṛua: A niń nkee nndu Muyuda? Vvandu va uruka lwafo na vakohani vanini wwo vakurambikia maakoń akwa. Nkiki kutanie?

³⁶Yesu kaaṛua: Umangi lwakwa llwa isanga li ndi. Kifo umangi lwakwa lwikee lwa isanga li, maketi akwa eeshikabaniaa kaaṛa ntarambikio̱ maakoń a Vayuda valya. Kake umangi lwakwa llwa kunu ndi.

³⁷Kyasia Pilato kamwia: Iwe kukeeń mangi? Yesu kaaṛua: Ni iwe kwarera ku muni. Ee nkee mangi. Na kikangio nairiwa na kikangio nasha kunu isangeń, naamu nrambue ikyo kikee kya dede. Ulya amilie udedeń aaranyaa ununga lwakwa.

³⁸Pilato kamwia: A ikyo kikee dede nkyo ki? Neeli andemaa irera kuro kauiya lingi Vayuda kavaia: Nta niń llolie ukasha lumwi kwamwi ndi.

³⁹Kake kunu kwanu mwishivie ishitereva mmuboṛomuye nndu umwi kyeeri kya Pasaka. Kyasiań mufurie mmuboṛomuye mangi ii wa Vayuda?

⁴⁰Nawo vakaṛoṛongya lingi vakanumbua: Ni ito ndi, mBaraba. Na Baraba ulya eekee kisoki.