Read MMA SHIYYA Yohane 2 Bible Online

Yohane 2 - MMA SHIYYA bible

Yohane 2

¹Neeli lya nrondo veeifoo vandu vaalikio̱ kulya muṛiń wa Kana ukee muungoń ulya wa Galilaya. Na mae wa Yesu nae eeifoo.

²Na akwaa ni Yesu kavaangwa-fo andu emwi na vaseṛo vamwi.

³Kyasia mfinyo ukafikya. Mae wa Yesu kamwia: Vakiwore mfinyo ndi.

⁴Llyo Yesu amwia: Kyakutiṅa-fo ki se iwe? Kyeeri kyakwa kya yelekia kyamfika ndi.

⁵Na mae wamwi kandeṛaṛika vaṛundi valya veekee iṛunda eevaiaa: Kilya kyoose amuvavasaa kitaniń na kikava ki!

⁶Na io tiyo nungu isasaru ta mawe tisimbiti-wo ta llimu wa Vayuda wa ikusangya. Na nungu imwi iwore mifukyo ivili ana iraru.

⁷Lia eni Yesu kaia vaṛundi valya: Ishuṛeń nungu ti mura! Nawo vakatiishuṛa bele.

⁸Kavaia: Alli raań kinnya murwaye mwika ulya shoonga! Nawo vakanrwaya.

⁹Neeli mwika shoonga ulya aria mura ulya waaṛulwa mfinyo na imungyamungya eeishii kundo wautwa nafo ndi. Kake valya veeshi waṛundi valya varaa mura to tubu. Llyo mwika shoonga avaanga nseṛo ulya aalika kamwia:

¹⁰Nndu woose aniingaa mbele vandu mfinyo nnuru. Vakammaa iwuura llyo avaniingaa ulya nkashankasha. Kake iwe kwamfisa mfinyo nnuru kumande alli.

¹¹Nkyo kindo kya mbooko Yesu atana kya maṛiikiso kikatanikia kulya muṛiń wa Kana ukee muungoń ulya wa Galilaya. Kamanyisa nakyo unini lwamwi. Na vaseṛo vamwi vakautia-wo inkusura.

¹²Numa ya ifo kainama kumande Kaperinaumu ye na mae wamwi na vanavamae na vanalosho vamwi. Vakakaa-fo mikonu myaangu.

¹³Na kisuku kya Pasaka ya Vayuda kiikee kufui, na Yesu karwa Yerusalemu.

¹⁴Kakooya-fo vandu veekaa rembo numba ya Iṛuva veekumbiaa-fo numbe na mburu na mbuku na vandu veeilashaa fesa.

¹⁵Kaoka uruu lwa ukova kaumbuta vandu valya woose numba ya Iṛuva andu emwi na mburu na numbe kairita fesa ta veelasha valya kafuluta na mesa tawo.

¹⁶Kaia valya veekee ikumba mbuku: Imbooń findo fi ia ree! Manya mutaaṛue numba ya Vaava wakwa ive numba ya ikabia mbusha!

¹⁷Llyo vanalosho vamwi vakumbua kirero kilya kikee kitisiṛe: ”Utomari lwa ishiisa numba yafo lukee ishivinga.“

¹⁸Kyasia Vayuda vakamwaṛua vakamwia: A mmyorusie ingai kutoorusaa, ili kwakaṛia itana kuro?

¹⁹Yesu kaaṛua kavaia: Sakyeń numba ii ya Iṛuva, nań niiseṛeese kari ka mikonu iraru.

²⁰Kyasia Vayuda vakanumbua: Numba ii ya Iṛuva yatanwa andu a myaka makumi aani na irindaru, nawe kwiseṛeese andu a mikonu iraru?

²¹Kake ye arera kya vvili wamwi ukee numba ya Iṛuva.

²²Kyasia ili andeṛuka kwa vafu, vanalosho vamwi vakakumbua kilya anderera. Vakakusurana na mitisine ilya na kirero kilya Yesu anderera.

²³Kyasia ili eekee kulya Yerusalemu kisukuń kya Pasaka, vandu veengi vakabooka ikusurana na irina lyamwi, fulya vandelolia myorusie ilya andeitana.

²⁴Kake ye Yesu andekusurana nawo ndi, fulya ye aveeshi woose.

²⁵Nae kyeemmuwaraa asunundio̱ ni nndu mboni ta nndu ungi ndi. Amu ye muni eeshi makusaṛo akee nrimiń wa nndu.