Read MMA SHIYYA Yohane 20 Bible Online

Yohane 20 - MMA SHIYYA bible

Yohane 20

¹Na nkonu wa mbele usoṛie Sabato ngama kio llyo Maria wa kulya Magidala afika alya mbangeń. Kakooya iwe lia lyamuutwa io mbangeń.

²Llyo auya eerishaa nnu kafikia Petiro na mwanalosho ulya ungi Yesu amwitie mbele kavaia: Vamiimboo Nndumi ifo mbangeń, neese tiishi kundo vanrwaa ndi.

³Kyasia Petiro kakwimboo na mwanalosho ulya ungi vakawara shia ya ifika mbangeń.

⁴Vakarisha woose vali vavili. Kake mwanalosho ulya ungi karisha mmwasi kairia Petiro mbele. Kava wa mbele ifika mbangeń.

⁵Kakwinika kaimaya kalolia miseto ilya ya irika ikee io si ataare andeaka nafo. Na Simon Petiro kasha anrie numa. Kaira neefo mbangeń kalolia miseto ilya iirwayee-wo.

⁷Na kirami kilya kya yangua nrike kilya kiifingiee nrweń wamwi kirwaye andu emwi na filya fa irika ndi, kiikee kyosose kikarawa andu ayo kyo kyeni.

⁸Llyo na mwanalosho ulya ungi andeva wa mbele ifika mbangeń andeaka nae. Kalolia kakusura.

⁹Mfulya kitaare veemaaṛukio̱o̱ mmitisiṛie sheeli: ”Kyawara aṛuke kwa vafu“.

¹⁰Kyasia vanalosho valya vakakwimboo vakauya kyeń.

¹¹Maria Magidalena kasalala alya wooṛo ya mbanga ilya eeiyaa. Ili eeiyaa kaimaya mbangeń.

¹²Kalolia-fo vamalaika vavili vakee-fo rembo vaṛee miseto myeelwa. Umwi akee nrweń na ungi marendeń alya nnyiṅa wa Yesu wiaṛio̱o̱.

¹³Nawo vakamwuṛa: Nkiki kikee ikulirisa, yeyo? Nae kavaia: Vamiimboo Nndumi wakwa, nań niishi kundo vandenrwaa nafo ndi.

¹⁴Ili eereraa kuro, kainduka kalolia Yesu aselele kitaare eeshi yye Yesu.

¹⁵Yesu kamwia: Yeyo, nkiki kikee ikulirisa? Kukee iṛuya i ṛo? Maria kakusaṛa mmuni wa kivasha kyo. Llyo amwia: Kwakooya ni iwe kwamwimboo Mbee, kushiie alya kundenrwaa, nań nndemwonduaa-wo.

¹⁶Llyo Yesu awaanga: Maria uu! Kamwaṛukia kammanya kamwia: Llosha wakwa, ni iwe ṛo?

¹⁷Yesu kamwia: Manya kutashibaane, amu nanrwa kwa Nde yakwa ndi. Enda kwa vanavamae vakwa kundevaia: Nkee irwa na ule kwa Nde yakwa akee na Nde yanu. Nkee irwa kwa Iṛuva wakwa akee na Iṛuva wanu.

¹⁸Maria Magidalena kaenda kandeongoya vanalosho mboni ii kavaia: Nallolia Nndumi. Kavaongoya na kilya amwia.

¹⁹Na nkonu ulya muni wa mbele usoṛie nkonu wa Sabato kumiila vanalosho vakakusandia, na myaango iirayee kiimba kya yeṛea Vayuda. Lia eni Yesu kasha kasalala karikari kawo kavaia: Kaań na unambwe!

²⁰Ili andemaa irera kuro kavaorusa fidawu fa maako amwi na uvari lwamwi. Vanalosho vakafura ili vandelolia Nndumi.

²¹Yesu kavaia lingi: Kaań na unambwe! Sheeli Nde andeshiruma niń, nkuro nań nkee imuruma.

²²Neeli andemaa irera ifi kavaivilia kavaia: Warień Mumuyo Nsongori!

²³Vandu mwawatia mareko awo vammaa itio̱. Na vandu mwawafingia mareko awo vammaa ifingio̱.

²⁴Na Toma ni umwi wa vanalosho va Yesu, eevaangwaa lingi wa yaasa. Nae eekee andu emwi nawo lia Yesu ashe kari kawo ndi.

²⁵Na vanalosho valya vengi vakashemwia: Tallolia Nndumi. Nae kavaia: Kwakooya ntaloliaa niń shi muni fiwoṛo fa misomari ifo maakoń amwi na ibaana fiwoṛo filya fa misomari na nni wakwa na ibaana kiwoṛo kilya kya uvari lwamwi na uko lwakwa shi muni, niirikiaa kutu ndi.

²⁶Ili mikonu nyaanyi indesia, vanalosho vamwi veekusandiee lingi numba ilya sheni na Toma eekee andu emwi nawo. Lia eni Yesu kasha alya vakai, na numba iirayee. Kasalala kari kawo kavaia: Kaań na unambwe!

²⁷Numa kaindukia Toma kamwia: Oṛesho lla maako akwa! Baana na fiwoṛo fakwa na nni wafo! Nnde na uko lwafo kubaane nalo kiwoṛo kya uvari lwakwa! Kutakive mushinunua, kuve mushikusura!

²⁸Toma kamwaṛua kamwi a: Ee Nndumi, ni iwe Nndumi wakwa na Iṛuva wakwa!

²⁹Yesu kamwia: Mfulya kwanshilolia na miso nkyo kyakukangia kwashikusura. Nakuia: Ngoma valya vashikusuraa kitaare vashilolie!

³⁰Kyasia iifo na myorusie ingi miingi Yesu andeitana mbele ya vanalosho vamwi kitaare mmitisiṛe kunu kitabuń iki.

³¹Kake ii yantisiṛwa, amu mukusure sheeli Yesu nKristo Mwana wa Iṛuva, na kiimba kya ikusura li mulolie muu mukuvavie na irina lyamwi.