Read MMA SHIYYA Yohane 4 Bible Online

Yohane 4 - MMA SHIYYA bible

Yohane 4

¹Kyasia Nndumi kamanya sheeli Vafarisayo vamiita, Yesu amiira vanalosho veengi na ibatisa veengi kita Yohane.

²Kake Yesu ye muni abatisa vandu ndi, wanalosho vamwi.

³Llyo alakana na kulya Yudaya kaenda lingi kumande Galilaya.

⁴Nae kalolia sheeli kyawara aire kari ka Samaria.

⁵Kafika muṛiń umwi wa kulya Samaria uvaangwaa Sikari ukee kufui na nrema ilya Yakobo andeniinga mwanamwi Yosefu.

⁶Neefo lwiifoo usokwa lua lwa Yakobo. Yesu kakooya amaareeswa nkyaaṛo kakaa rembo io mbaai ya usokwa. Kikee kyeeri kya saa isasaru.

⁷Kasha na-wo nndu nka wa Kisamaria isheraya mura. Yesu kamwia: Shirita mura nnwe.

⁸Amu vanalosho vamwi veemeendaa muṛiń indeuṛa-fo shoonga.

⁹Nka ulya wa Kisamaria kamwia: Naare kyava iwe kukee nndu wa Kiyuda kwashoomba mura, nań nkee nka wa Kisamaria? Amu Vayuda veeitanaa na Vasamaria ndi.

¹⁰Yesu kamwaṛua kamwia: Kikooye kwimanyaa wavi lwa Iṛuva na imanya nndu uu akuia: Shirita mura nnwe, llyo nawe kwinterevaa, nae eekuniingaa mura uwore muu.

¹¹Nka ulya kamwia: Nndumi, a ili kutawore nta kindo kya iraa mura na usokwa lu lwa mura lwolokie nnu. Nkwi kuutaań mura to uwore muu?

¹²Eewe kukee nnini kita nde yeru Yakobo? Yye andetiniinga usokwa lu lwa mura. Nae muni aniya-fo mura ye na vana vamwi na findo famwi eefilimiee.

¹³Yesu kamwaṛua kamwia: Ulya woose anwa mura uu awarwaa nnyura lingi da.

¹⁴Kake nndu kanwa mura uu ninniingaa niń, akiwarwaa nnyura lingi ndi na kumande miṛeṛe. Kake mura uu niń ninniingaa kari kamwi ushevaa-fo iriso lya mura, nalyo lyeekaa lifike muuń ulungani.

¹⁵Nka ulya kamwia: Nndumi, shiniinga mura to ntakiliwa lingi nnyura ana ntakishe ia nnderaa mura.

¹⁶Yesu kamwia: Enda ivaanga mmi wafo kuuye nae ia!

¹⁷Nka ulya kaaṛua kamwia: Noore mmi ndi. Yesu kamwia: Kwarera dede, ili kwanumbua: Noore mmi ndi.

¹⁸Amu kweeriwaa wwomi varaanu, ana uu kukee nae alli ni mmi wafo ndi. Ikyo kwarera nkya dede.

¹⁹Nka ulya kamwia: Nndumi, llolie sheeli kukee nndu mwauya.

²⁰Vaande yeru veetereviaa Iṛuva uroń ilu. Neeni mukanumbua: Yerusalemu mfo kundo kyawara kuterevio̱ Iṛuva.

²¹Yesu kamwia: Iwe nka, amu kikaa kishe kyeeri mutakiindiaa Nde kunu uroń ilu ana nta kulya Yerusalemu.

²²Ini mukee iindia kindo mutakiishi, neese tikee iindia kindo tikiishi, fulya kwa Vayuda mfo ikia lya vandu lyukie.

²³Kake kyeeri kishaa, nakyo kiifo alli da, ili va iindia Iṛuva va dede vairiaa Nde windi luriwa mMumuyo na udede. Amu na Nde afurie vandu sha iwo vakee imwindia kuro.

²⁴Iṛuva mMumuyo na iwo vakee imwindia kyawara vamwirie windi luriwa mMumuyo na udede.

²⁵Nka ulya kamwia: Niishi sheeli Mesia ashaa ulya avaangwaa Kristo. Nae ili ashaa yye atimanyisaa findo ifi foose sheeli fikai.

²⁶Yesu kamwia: Nniń ito nkee irera nawe.

²⁷Lia eni vanalosho vamwi vakauya vakariika, ili vallolia akee irera na nndu nka. Kake nta umwi andemwuṛa: Nkiki kukee iṛuya kwamwi ana nkiki ili kukee irera nae.

²⁸Kyasia nka ulya katia-wo nungu yamwi. Kaenda muṛiń kandeia vandu: Oṛeshoń mushella nndu ashoongoya foose nantana. Kikooye yye Kristo se naań?

²⁹

³⁰Vakakwimboo vauka muṛiń vakamwendea.

³¹Ili kikikee kuro vanalosho vamwi vakantereva vakamwia: Llosha, lyań te!

³²Nae kavaia: Niń noore shoonga mutaiishi ini.

³³Kyasia vanalosho vamwi vakakurera: Eefo nndu amwendie shoonga naań?

³⁴Yesu kavaia: Shoonga yakwa yyo ii: Ni itana mifurie ya ito andeshiruma na yawutia mashoṛa amwi.

³⁵A ini mukee inumbua se, sheeli iseere miiri iini llyo iilula lishaa? Niń namuia: Imbooń miso anu mulle manrema kasa antondoṛa anserikia iilulwa.

³⁶Na mwilula alli akee iwaria maṛe kiimba kya mashoṛa amwi a isanyiṛia filimu finnde muu wa miṛeṛe, na ito muveekya mbeu andu emwi na mwilula vafure andu emwi.

³⁷Amu sumu ilya yarerwa ia dede: Muveekya mbeu ni ungi na mwilula kava ungi.

³⁸Niń mmurumie mundeilula kindo mutakikwataria. Vvengi vakwatarie, neeni mwawwaria ngatara tawo.

³⁹Na ifo muṛiń ulya Vasamaria veengi vakankusura kiimba kya kirero kya nka ulya andevarambuya sheeli: Anshiia foose nndetana.

⁴⁰Kyasia ili Vasamaria valya vandenshea vakantereva akaa kwawo. Nae kakaa-fo mikonu ivili.

⁴¹Na vandu veengi kilanya vakankusura kiimba kya miloshie yamwi.

⁴²Vakaia nka ulya: Alli tankusura nta nkiimba kya filya kwarera ndi, fulya tamiita ti veni tikamanya sheeli uu yye nkiṛa wa isanga dede.

⁴³Kyasia mikonu yo ivili yansia kakwimboo-fo kafika Galilaya,

⁴⁴lla kasa Yesu ye muni eerambuyee sheeli: Mwauya kisuku akooyaa tikisi urukeń lwamwi muni ndi.

⁴⁵Kyasia ili andefika Galilaya, vandu va Galilaya vakawwaria kisha, fulya veelloliaa foose andetana kulya Yerusalemu nkonu wa kisuku, fulya nawo veekee kisukuń.

⁴⁶Numa Yesu kasha lingi muṛiń wa Kana wa kulya Galilaya alya aaṛua mura ukava mfinyo. Neefo eeifoo ndundi wa kwa mangi awore mwana wamwi wa iseeka alole kulya Kaperinaumu.

⁴⁷Nae ili andeita Yesu ansha na kulya Galilaya auka kulya Yudaya, kaenda kwamwi kandentereva ainame kwamwi andenkiṛia mwana wamwi, fulya eekee kufui anutuke.

⁴⁸Yesu kamwia: Kitaare mwaoruswa findo finini fa maṛiikiso mukusuranaa nań ndi.

⁴⁹Ndundi ulya wa kwa mangi kamwia: Wui Mbee, inama da kitaare mwana wakwa annutuka.

⁵⁰Llyo Yesu amwia: Kwendień, mwana wafo eefo na muu. Kyasia nndu ulya kakusura kirero kilya Yesu amwia kaenda.

⁵¹Ili akee shień eeinamaa na kyeń, vaseṛo vamwi vakakwania nae veendemwongoyaa vakamwia: Mwana wafo eefo na muu.

⁵²Nae kavasokoda kyeeri andebooka iva ṅwana. Vakamwia: Nkwawu saa imooroka llyo muro undesia wiliń.

⁵³Kyasia ndee kamanya nkyeeri kilya kyeni Yesu andemwia: Mwana wafo eefo na muu. Kakusurana na Yesu andu emwi na woose va kyeń kwamwi.

⁵⁴Na kindo kilya Yesu andetana kya iṛiikisa vandu kiikee kya kavili, ili andeuka kulya Yudaya kasha na kulya Galilaya.