Read MMA SHIYYA Yohane 5 Bible Online

Yohane 5 - MMA SHIYYA bible

Yohane 5

¹Numa yayo ukafika nkonu nnini wa Vayuda. Yesu karwa na kulya Yerusalemu.

²Na ifo Yerusalemu kufui na ngiṛi ya maanri liifo iniva livaangwaa Kiebrania Betesida. Nalyo liwore matengo araanu.

³Na ifo veefo vandu veengi valole veelalaa-fo, mmidoń na fitoṛokombo na manketenkete.

⁴Na woose veekee iverea mura ukoole. (Amu kiifoo kyeeri malaika eeolokaa iruveń lia kaolaola mura ulya. Na ulya ambooka yoloka-fo ili mura wakoola kava nsha saka yamwi na ikava ki.)

⁵Na io eeiyoo nndu eemmayaa-wo myaka makumi araru na nyaanyi eelunganaa na saka yamwi.

⁶Nndu ulya Yesu kallolia alele-fo kamanya sheeli ammaa feeri faasha. Kamwia: Kufurie iva nsha?

⁷Nndu ulya alole kamwaṛua: Nndumi, noore nndu wa ishiolota ifo iruveń ili mura ukoolaa ndi. Ili niishi nkee yoloka-fo, nndu ungi kashiiria mbele kaoloka-fo.

⁸Yesu kamwia: Kwimboo imboo kiraa kyafo kuṛueṛue.

⁹Lia eni nndu ulya kava nsha deń kaimboo kiraa kilya kyamwi kamakii yenda. Na nkonu ulya ukee nkonu wa Sabato.

¹⁰Na Vayuda vakaia nndu ulya andekiṛwa: Nnu ni nkonu wa Sabato tee, nawe koore muumu wa ikurika kiraa ndi.

¹¹Nae kavaia: Ni nndu to ashaaṛua nava nsha yye ashiia: Kurike kiraa kyafo kuṛueṛue.

¹²Nawo vakamwuṛa: A nndu to akuia: Imboo kiraa kyafo kwende ni ungau?

¹³Kake nndu ulya andekiṛwa andemanya ni i ndi. Fulya Yesu eenrekiaa vanduń veekuumbiee io.

¹⁴Numa yayo Yesu kankooya akee ifo numba ya Iṛuva kamwia: Lla te kwanshiań. Manya kutakitane lingi fikasha kuwoywa lingi nnrenga nini kita ii.

¹⁵Nndu ulya kakwimboo kaenda kandeia Vayuda, yye Yesu amwaṛua kava nsha.

¹⁶Kiimba kya ikyo Vayuda vakasua Yesu, fulya atana ikyo nkonu wa Sabato.

¹⁷Nae kavaaṛua: Nde yakwa akee iṛunda mashoṛa kumande alli, nań nkee iṛunda mashoṛa.

¹⁸Kiimba kya ikyo Vayuda vakaengeṛia induiya mwaanya wa iwwaa, nta nkiimba kya iimbua Sabato da ndi, kake nna kiimba kyo avaanga Iṛuva Nde yamwi kakwaṛua kimwi na Iṛuva.

¹⁹Kyasia Yesu kaaṛua kavaia: Nkue nkue namuia: Mwana amakii itana kindo ye muni kitaare nkilya alolia Nde eetanaa ndi. Amu kilya kyoose akee itana ye nkyo na Mwana akitanaa da.

²⁰Amu Nde akundie Mwana kamwonga kyoose atana ye muni. Na akwaa mmashoṛa manini kita iwo amworusaa, amu neeni muṛiike.

²¹Amu sheeli Nde aṛutaa valya vafu na ivawiiṛia muu, mfo kuro da na Mwana aaṛuaa va muu valya ankunda.

²²Amu Nde nta aumisiaa nndu ndi, kake uumisio loose anrambikie Mwana,

²³naamu woose vaindie Mwana, sheeli vaindiaa Ndee. Na nndu atakee iindia Mwana amakii iindia na Nde ito anrumie ndi.

²⁴Nkue nkue namuia: Nndu akee yaranya kirero kyakwa na ikusura ito ashirumie awwaria muu wa miṛeṛe na miṛeṛe, nta akiumisio̱o̱ ndi. Fulya ansomuka ufuń kafika muuń.

²⁵Nkue nkue namuia: Kishaa kyeeri na akwaa ni alli kiifo da, ili vafu vaitaa ununga lwa Mwana wa Iṛuva, na valya vaitaa vavaa na muu.

²⁶Amu sheeli Nde akee na muu kari kamwi, mfo kuro da andeniinga na Mwana iva na muu kari kamwi.

²⁷Kanniinga na finya ya yumisia, fulya akee Mwana wa nndu.

²⁸Manya mutaṛiikiswa ni ifi! Amu kyeeri kishaa na vandu woose valele mbangeń vaitaa ununga lwamwi, nawo vakwimboo-fo.

²⁹Na valya vandetana finuru vaṛuke vakooye muu. Na valya vandetana fikasha vaṛuke vakooye uumisio.

³⁰Niń mmakii itana kindo na finya yakwa shi muni ndi. Nkee ifukya kindo kisumani na ikyo namiita. Na uumisio lwakwa llwa usumani, fulya nduyaa mifurie yakwa niń ndi, kake mmifurie ya ito ashirumie.

³¹Kwakooya niń nakurambua shi muni, ikurambua lyakwa llya dede ndi.

³²Eefo ungi akee ishirambua. Nań niishi sheeli irambua akee ishirambua nalyo llya dede.

³³Ini mwaruma vandu kwa Yohane, nae karambua kilya kikee kya dede.

³⁴Kake niń nkee iwaria irambua limilie kwa vandu ndi. Kake nkee irera ifi, amu ini mukooye ikia.

³⁵Ulya eekee sha taa ikee yaaka na imulika. Neeni mukakunda isenywa llanga yayo kwa kyeeri kyaangu tubu.

³⁶Kake irambua nkee nalyo niń ni inini kita irambua lya Yohane. Amu mashoṛa alya Nde andeshiniingia mmarisie mmashoṛa wo meni nkee yaṛunda. Wwo akee ishirambua sheeli nNde ashirumie.

³⁷Na Nde to ashirumie yye anshirambua ye muni. Neeni nta mwamiita ununga lwamwi ndi, ana nta mwallolia fwana yamwi ndi.

³⁸Ana nta kirero kyamwi kikee kari kanu ndi, fulya ini mutakusurie ulya arumio̱ yye.

³⁹Mukee ikwataria mitisine mwikusaṛaa sheeli ini mukooyaa-wo muu wa miṛeṛe. Nayo yyo meni ikee ishirambua niń.

⁴⁰Neni nta mufurie isha na kwakwa mukooye muu ndi.

⁴¹Niń wwariaa tikisi yuka na vanduń ndi.

⁴²Kake niń nammumanya ini sheeli kitaare muwore ikunda lya Iṛuva kari kanu.

⁴³Niń nansha kwa irina lya Nde yakwa ana nta ini ishiwaria. Kake ungi kwakooya akee isha na irina lyamwi muni yye mu wwariaa.

⁴⁴Mumakii are ishikusura ini mukee ikwitikisa mu veni na mu veni, na nduma ulya ukee yuka kwa Iṛuva muni mutakee iṛuya?

⁴⁵Manya mutakusaṛe sheeli niń mmuṛiingaa kwa Vaava. Eefo nndu amuṛiingaa yye Mose ito munkusurie ini.

⁴⁶Amu kikooye mwikusuriee Mose, mwishikusuraa nań, amu yye atisiṛie kya mboni takwa.

⁴⁷Kake kwakooya kitaare mwakusura mitisine yo yamwi, naare mwirikiaa firero fakwa niń?