Read MMA SHIYYA Yohane 7 Bible Online

Yohane 7 - MMA SHIYYA bible

Yohane 7

¹Numa ya ifi Yesu eekee iṛua kulya Galilaya. Fulya atakifurie iṛua kulya Yudaya kiimba kya Vayuda veeriee iwwaa.

²Na kisuku kinini kya Vayuda kilya kya matengo kikee kufui.

³Kyasia vanavamae vakamwia: Kwimboo kunu kwende Yudaya, amu na vanalosho vafo valolie mashoṛa wo afo kukee itana.

⁴Amu eefo nndu amakii itana kindo kiṛisi neekai afurie amanywa na baa ndi. Kwakooya kufurie itana mashoṛa a mikae ii, kworuseń kwa va isanga li.

⁵Amu na akwaa wanavamae vvandu vatandenkusura ndi.

⁶Kyasia Yesu kavaia: Kyeeri kyakwa kyamfika ndi. Kake ini kyeeri kyanu kiifo mikonu yoose.

⁷Isanga limakii imusua ini ndi. Kake niń lishisule, fulya niń nkee irambua sheeli mashoṛa ayo mmakasha.

⁸Kwendień ini rweń kisukuń. Niń nkee irwa nndelya kisuku ki ndi, amu kyeeri kyakwa kyamfika ndi.

⁹Ammaa ivaia ifi ye muni kakaa ifo Galilaya.

¹⁰Ili vanavamae vandemaa irwa kisukuń, Ilyo nae arwe da, kake nkwa baa ndi, nkwa kiṛisi.

¹¹Kyasia Vayuda vakanduya kisukuń kilya. Vakanumbua: A ye nkwi akai naań?

¹²Likava inunua iingi kari ka isyamu lia kiimba kyamwi. Kiindi vakunumbua: Ye ni nndu nsha. Kiindi vakanumbua: Wode, ye aretaa vandu.

¹³Kake nta nndu andensenda na baa, fulya veeṛee Vayuda.

¹⁴Kake karikari ka mikonu ya kisuku Yesu karwa kaira na numba ya Iṛuva kaloshia-fo.

¹⁵Vayuda vakariika veereraa: Uu amanya are mitisine, nae atakee lloshe?

¹⁶Yesu kavaaṛua kavaia: Miloshie yakwa yyakwa niń ndi, yya ito ashirumie.

¹⁷Nndu kafura itana kilya ye afurie, amanyaa akwaa miloshie yo yukie kwa Iṛuva ana akwaa mfirero fakwa feni nkee irera.

¹⁸Ulya akee irera kya mifurie yamwi akee iṛuya unini lwamwi muni. Kake ulya akee iṛuya unini lwa ulya anrumie ito wwa dede ana awore ukavili kari kamwi ndi.

¹⁹A Mose yye se amuniingia mavavaso? Ana nta umwi wanu aindiaa mavavaso wo. Nkiki ili mufurie ishiwaa?

²⁰Vandu valya veekuumbiee-fo vakaaṛua: Ako! Kuworwa ni uketo! Ni i akee iṛuya kya ikuwaa?

²¹Yesu kaaṛua kavaia: Niń ni ishoṛa limwi nndetana kunu Yerusalemu neeni mukaṛiikiswa mu woose.

²²Mose yye amuniingie llimu wa irinwa. Kake nkwa Mose uukie ndi, kake nkwa vakuuku va mbele. Neeni na akwaa ni nkonu wa Sabato murinaa nndu.

²³Kyasia kwakooya nndu arinwaa nkonu wa Sabato, amu ivavaso lya Mose litafukywa, nkiki ili ini mwashituṛukia niń, ili naaṛua nndu kava nsha deń nkonu wa Sabato?

²⁴Manya mutafukye mwaandu kwa kikundia, kake fukyeń mwaandu na usumani!

²⁵Kyasia vandu kiindi va Yerusalemu vakanumbua: A uu yye se vakee induya vawwaa?

²⁶Nae a uu akee irera na baa vataare nta kindo vakee imwia! Kitakooye vandu wo va nrwe vammanya dede sheeli uu yye Kristo naań?

²⁷Kake nndu uu timwishi kundo aukie nafo. Kake Kristo ili ashaa, nta nndu eeshi kundo aukie nafo ndi.

²⁸Kyasia Yesu karosa ununga lwamwi kulya numba ya Iṛuva eeloshaa kanumbua: Ee mushiishi na kundo nuukie nafo mwishi da. Nań nta nndesha kwa mifurie yakwa shi muni ndi. Eefo wa dede andeshiruma kitaare mumwishi ini.

²⁹Niń mmwishi, amu nkwamwi nuukie, nae yye ashirumie.

³⁰Kyasia vakaṛuya mwaanya wa iwwara, nta nndu andensaaṛia uko awware, fulya kyeeri kyamwi kitaare kyeemfikaa.

³¹Na vandu veengi kari ka syamu vakautia-wo inkusura. Vakanumbua: Ili Kristo ashaa, naań atanaa findo finini kita ifi nndu uu andetana?

³²Vafarisayo vakaita vandu veereraa kyamwi kiviṛiviṛi. Llyo vakohani vanini andu emwi na Vafarisayo vakaruma vaseṛo vandewwara.

³³Yesu kanumbua: Mmikonu myaangu nkikaa neeni, numa neende kwa ito andeshiruma.

³⁴Mushiruyaa mutashilolie. Neeni kundo nndekaa mumakii ifika-fo ndi.

³⁵Vayuda vakakurera wo veni na veni: A uu afurie yenda kwi neese titalloliaa? Asoṛaa valya vanyanyate ngyurukeń ta Vagiriki aloshie-fo Vagiriki wo?

³⁶Nkirero ki ikyo akirera: Mushiṛuyaa mutashilolie, neeni kundo nndekaa niń mutamakii ifika-fo?

³⁷Na nkonu to wa imarisia kisuku ukee nnini kita ilya ingi Yesu kasalala-wo karera na ununga unini kanumbua: Nndu aworwa nnyura ashe kwakwa anwe!

³⁸Ulya ashikusurie niń kiwiaa sheeli mitisine irerie: Nndu uu ifo wiliń wamwi iṛukaa-fo mira ya yeeka iwore mura wa muu.

³⁹Neeli arera kuro nkiimba kya Mumuyo Nsongori. Nto valya vankusurie vakaa vawwarie. Amu kyeeri kilya Mumuyo Nsongori eenshaa ndi, fulya Yesu atandefika uniniń lwamwi.

⁴⁰Kyasia kari ka isyamu lia veefo vandu vandeita firero fo vakanumbua: Nkya dede uu yye mwauya fisuku ulya.

⁴¹Vengi vakanumbua: Yye Kristo. Vengi vakanumbua: Naare? Kristo ashaa aukaa ifo Galilaya?

⁴²Mitisiṛie irerie se sheeli Kristo ashaa aukie ufwariń lwa kwa Davidi na kulya muṛiń wa Betileemu ulya Davidi eekaa?

⁴³Kyasia vandu vakakufukya kari kiimba kyamwi.

⁴⁴Kiindi kyawo vakafura iwwara, kake nta nndu andeseṛeesa uko lwamwi awware.

⁴⁵Kyasia vaseṛo valya vakauya kwa vakohani vanini na Vafarisayo. Nawo vakavauṛa: Naamu ki ili mutamunnde?

⁴⁶Vaseṛo valya vakaaṛua: Kuuka mbooko nta nndu anrera sheeli uu akee irera ndi.

⁴⁷Vafarisayo vakavaaṛua: Naare? Ini neeni mwallembika?

⁴⁸Eefo nndu wa nrwe na akwaa ni umwi tubu ana Mfarisayo umwi ankusurie?

⁴⁹Kitaare ni isyamu lyo liteeshi uvavaso, nawo vakee vadenge.

⁵⁰Kakwimboo Nikodemo ulya eensheaa Yesu kyeeri kya kio, nae eekee umwi wawo. Kavaia:

⁵¹A mavavaso eru aumisiaa nndu kitaare amaaranywa mbele, kimanyike kilya atanie?

⁵²Vakaaṛua vakamwia: Iwe nawe kukee nndu wa Galilaya? Ṛuya kulolie sheeli kulya Galilaya antandelolika-fo mwauya fisuku.

⁵³Vakalakana vakaenda nndu woose kyeń kwamwi.