Read MMA SHIYYA Yohane 8 Bible Online

Yohane 8 - MMA SHIYYA bible

Yohane 8

¹Kyasia Yesu kaenda uroń lwa miri ya misenifu.

²Ili lya ndesi ngama kio kafika lingi kulya numba ya Iṛuva. Na vandu woose vakanshea. Nae kakaa rembo kavalosha.

³Vaaṛia va mitisine na Vafarisayo vakamwendee nka aaramwa eeaaikaa. Vakanseṛeesa io kari.

⁴Vakamwia: Llosha, nka uu aaramio̱ allya da eeaaikaa.

⁵Kyasia Mose ativavasie ifo mavavasoń kya vaka va mikae ii tivakabe na mawe. A iwe kunumbuaań are?

⁶Varera kuro kya inreya, amu vakooye kindo kya indiinga. Kyasia Yesu kakwinika katisiṛa ifo uteriń na nni.

⁷Neeli vandeitika imwuṛa, kakwinua kavaia: Ulya atawore ireko kari kanu ave wa mbele wa inkaba na iwe.

⁸Kakwinika lingi katisiṛa ifo uteriń na nni.

⁹Nawo ili vandeita kuro, vakasomuka umwi umwi kibookia vasuṛi kumande vasia-wo. Kasaa-wo Yesu muni na nka ulya aselele io karikari.

¹⁰Yesu kakwinua lingi kamwia: Vaṛiingi valya vafo valla kwi, yeyo? Nta umwi akuumisia?

¹¹Nae kamwia: Nta umwi, Nndumi. Yesu kamwia: Nta nań nkuumisiaa ndi. Kwendień! Manya kutakitane lingi kikasha!

¹²Kyasia Yesu karera nawo lingi kanumbua: Niń nkee langa ya isanga. Ulya ashisoṛaa niń akiendaa llemiń kutu ndi, kake avaa na langa innde muu.

¹³Kyasia Vafarisayo vakamwia: Iwe kukee ikurambua ku muni. Ikurambua lyafo llya dede ndi.

¹⁴Yesu kaaṛua kavaia: Na kwakooya niń nakurambua shi muni, mirambuye yakwa yya dede, fulya niishi kundo nuukie nafo na kundo neendaa. Neeni mwishi kundo nuukie ana kundo neendaa ndi.

¹⁵Ini mukee yumisia mwilatiaa mikae ya vvili, niń nuumisiaa nndu nta ndi.

¹⁶Na kwakooya niń naumisia nndu, uumisio lwakwa llwa dede, amu niń nniń shi muni ndi, kake nakaa andu emwi na ulya ashirumie.

¹⁷Na akwaa ni ifo mavavasoń anu kitisiṛie sheeli: Ukureki lwa vandu vavili llwa dede.

¹⁸Niń nniń nkee ikurambua shi muni, na Vaava to ashirumie nae akee ishirambua.

¹⁹Kyasia vakamwia: A Vaava wafo akee kwi? Yesu kaaṛua: Mushiishi niń ndi ana nta Vaava wakwa mumwishi ndi. Kifo mushiishi niń mwimanyaa na Vaava wakwa.

²⁰Firero fo afireria andu alya a isaṅiṛia misimbika ifo numba ya Iṛuva ili eeloshaa. Ana nta nndu akaṛia iwwara, fulya kyeeri kyamwi kitandefika.

²¹Kyasia kavaia lingi: Niń nkee yenda, neeni mushiṛuyaa. Na ifo marekoń anu mufiyaa. Kundo niń neendaa, nta ini mumakii ifika-fo ndi.

²²Kyasia Vayuda vakanumbua: Manya kitakooye akundie ikuwaa naań, ili anumbua: Kundo niń neendaa, nta ini mumakii ifika-fo ndi?

²³Nae kavaia: Ini mumilie kunu si, niń mmilie kulya ule. Ini mukee va isanga li, niń nkee wa isanga li ndi.

²⁴Kiimba kya ikyo namuia: Mufiyaa marekoń anu. Kwakooya mutakusuraa sheeli nniń ye, mufiyaa marekoń anu.

²⁵Kyasia vakamwia: Iwe ni iwe iń? Yesu kavaia: Nkuro kikai sheeli nndetembeṛe imuia, na alli namuia kuro da.

²⁶Niiworee fiingi fa irera kyanu na fa yumisia kyanu. Kake ulya anshiruma wwa dede. Nań filya namiitia kwamwi mfo nkee ifirera fa iia isanga.

²⁷Nawo nta kyawaaṛukia sheeli awasendia Nde ndi.

²⁸Kyasia Yesu kanumbua: Mukammaa irosa Mwana wa nndu llyo mumanyaa sheeli nniń ye. Ana nta kindo nkee itana kikee kyakwa shi muni, kake nkilya Nde andeshilosha.

²⁹Na ito ashirumie akee andu emwi nań, nta andeshitia shi muni ndi. Amu filya finsenye ye mfo ntanaa mikonu yoose.

³⁰Neeli anderera kuri, veengi vakankusura.

³¹Kyasia Yesu kaia Vayuda valya veekusuriee: Mukakuwara na firero fakwa llyo muvaa vanalosho vakwa va dede.

³²Neeni mumanyaa kilya kikee kya dede, na udede lo lumutauaa.

³³Vakamwaṛua: Ise tikee kishuku kya Abraamu, nta tave masinga a nndu nta kyeeri kimwi ndi. Nki ili kwanumbua: Mutaulwaa?

³⁴Yesu kavaaṛua: Nkue nkue namuia: Ulya woose akee itana mareko, ni isinga lya mareko.

³⁵Ana nta isinga likaa kyeń kyeeri kyoose ndi. Nndu akaa kyeń kyeeri kyoose mMwana.

³⁶Kyasia kwakooya uu akee Mwana amutauaa, llyo muvaa vataue va dede.

³⁷Niishi da sheeli mukee kishuku kya Abraamu. Kake ini mukee iṛuya kya ishiwaa, fulya kirero kyakwa kitawore andu a ikaa kari kanu.

³⁸Filya nndefilolia kwa Nde mfo nkee ifirera. Kyasia neeni taniń filya mwamiita kwa nde yanu.

³⁹Nawo vakamwia: Nde yeru ni Abraamu! Yesu kavaia: Kikoo mwikee vana va Abraamu, mwitanaa mitanie ya Abraamu.

⁴⁰Kake alli mukee iṛuya kya ishiwaa niń nkee nndu namuia kilya kikee kya dede ikyo nndekiita kyuka kwa Iṛuva. Nta Abraamu andetana kuro ndi. Ini mukee itana mitanie ya ulya akee nde yanu.

⁴¹Vakamwia: Ise teeriwa waaisiń ndi. Ise toore Vaava umwi, nae ni Iṛuva.

⁴²Yesu kavaia: Kifo Iṛuva eekee Vaava wanu, mwishikundaa niń, amu niń nndeuka kwa Iṛuva nasha kunu. Nta niń nndesha kwa kiimba kyakwa shi muni ndi, kake yye ashirumie.

⁴³A nki ili mutakee imanya mirerie yakwa? Mfulya kitaare ini mukee imakii yaranya firero fakwa.

⁴⁴Ini mukee va nde yanu, nae nSatana. Na filya nde yanu alangie mfo musenywa ifitana. Ye eekee wwaa vandu kuuka mbele, ana nta akuwore na udede ndi, fulya ye atawore udede nrimiń wamwi. Karera wongo, areraa ikyo kikee kyamwi muni. Amu ye wwa wongo kava na ndee wa wongo.

⁴⁵Kake niń ili nkee irera ikyo kikee kya dede, nta mukee ishikusura ndi.

⁴⁶Ni ungau umwi wanu amakii ishivinga na kindo kya mareko nndetana? Kwakooya nkee irera kilya kikee kya dede, nkiki ili mutakee ishikusurań?

⁴⁷Ulya amilie kwa Iṛuva aitaa firero fa Iṛuva. Kwa ikyo ini mwisile ndi, fulya ini mutamilie kwa Iṛuva.

⁴⁸Vayuda valya vakaaṛua vakamwia: Ise tarera kisumani se sheeli iwe kukee Nsamaria, kuworwa mmumuyo nkasha?

⁴⁹Yesu kaaṛua: Niń noorwa nta mmumuyo nkasha ndi, kake niń nkee iindia Nde yakwa, neeni mukashiruma.

⁵⁰Nań nta nkee ikuṛuiya nduma wakwa shi muni ndi. Eefo ito akee ishiṛuiya na ifukya kyakwa na kyanu.

⁵¹Nkue nkue namuia: Nndu kankuwara na firero fakwa, akifwaa kutu ndi kumande miṛeṛe.

⁵²Kyasia Vayuda vakamwia: Alli tammanya na baa sheeli kuworwa mmumuyo nkasha. Abraamu afwe na vaauya fisuku valya vakafwa. Nawe kukee inumbua: Nndu kawara kirero kyakwa akifwaa kutu kumande miṛeṛe ndi.

⁵³A iwe kukee nnini kita nde yeru Abraamu, nae afwe? Na akwaa vvaauya fisuku nawo vafwe. A iwe kwakwaṛua sha i?

⁵⁴Yesu kaaṛua: Kwakooya nakuṅinisa shi muni, unini lwakwa nkindo ndi. Amu ulya akee ishiṅinisa vVaava wakwa. Neeni mukanumbua: Yye Iṛuva wanu.

⁵⁵Nta ini mumwishi ndi. Kake niń mmwishi. Na kwakooya nanumbua ntamwishi, vvaa wa wongo sheeni. Kake niń mmwishi na kirero kyamwi nkiwore.

⁵⁶Nde yanu Abraamu andekaba nndoṛo eeshi akaa alolie nkonu wakwa. Kaulolia kafura.

⁵⁷Vayuda vakamwia: Iwe kitaare kwammaa myaka makumi araanu, nawe kwanumbua kwallolia Abraamu?

⁵⁸Yesu kavaia: Nkue nkue namuia: Ilyo kitaare Abraamu awa-fo, niń niifoo.

⁵⁹Kyasia vakaimboo mawe vamweeṛe. Kake Yesu kakufisa kasomuka ifo numba ya Iṛuva.