Read MMA SHIYYA Mitanie ya varumi 10 Bible Online

Mitanie ya varumi 10 - MMA SHIYYA bible

Mitanie ya varumi 10

¹Kyasia kulya Kaisaria eeifoo nndu umwi irina lyamwi ni Korinelio akee nnini wa kinga kya vasikari kiivaangwaa Kiitalia.

²Nae eekee nndu nsongovisi kakusura Iṛuva na numba yamwi yoose. Nae eekee muniinga misimbika miingi ya ililia vandu kalungana itereva Iṛuva mikonu yoose.

³Nkonu umwi kikee sha kyeeri kya saa kyeenda ta nsanyiń kaoruswa kindo. Kalolia malaika wa Iṛuva eeiraa na numba kwamwi kamwia: Korinelio uu!

⁴Nae kamulla koroo kaeṛea kanumbua: Nkiki Nndumi? Malaika kamwia: Fiterewo fafo famfika ule na misimbika yafo na ikumbulwa mbele ya Iṛuva.

⁵Kyasia alli ruma vandu Yope vavaange Simon ito avvaangwaa Petiro.

⁶Ye mmwini wa nndu umwi irina lyamwi nSimon akee nsisa shoni awore numba yamwi ikee mbaai ya nruva.

⁷Na malaika ulya eekee irera nae ili andemaa yenda, Korinelio kavaanga maketi amwi avili na nsikari umwi akee nsongovisi kari ka valya veekee indundia.

⁸Kavaongoya findo foose kavaruma vaende Yope.

⁹Na ili lya ngama ili valya varie shia na ifika kufui na muṛi ulya Petiro kasaama kai indetereva Iṛuva. Kikee kyeeri kya saa isasaru ta nsanyiń.

¹⁰Kaliwa nsoto kafura ilya. Ili veensongosiaa shoonga kailashika makusaṛo.

¹¹Kalolia iṛuvewu liruukie kalolia kiya kyolokaa kivakani na nseto nnini kiiolotwaa na mikyendu yayo iini kumande si.

¹²Na kari kayo eeifoo mafisi a mikae yoose a marende aani na aafuafuaa na si na ndee ta kwa si ya iṛuvewu.

¹³Na ununga lukanshea lwinumbuaa: Kwimboo Petiro, sikya kulye!

¹⁴Petiro kanumbua: Wode Nndumi, amu nalle kutu kindo kikasha kya usutu ndi.

¹⁵Ununga lukanshea lya kavili lwimwiaa: Findo famiiliswa ni Iṛuva iwe kutafivaange fa usutu ndi.

¹⁶Kindo ki kikatanika kararu, numa kiya kilya kikaroswa lingi iṛuvewu.

¹⁷Neeli Petiro eekee na inunua nrimiń wamwi atandemanya misendie ya ifi afilolia, ilyo yeni vandu valya vanderumwa nKorinelio ili vandemaa yuṛa numba ya Simon vakasalala mwaangoń.

¹⁸Vakavaanga vakauṛa akwaa Simon avaangwaa Petiro eefo.

¹⁹Na Petiro eekirekiee ikusaṛia myorusie ilya. Mumuyo kamwia: A va vandu vararu vakee ikuṛuya.

²⁰Kyasia kwimboo oloka si kwende nawo. Manya kutanunue, amu nniń navaruma.

²¹Petiro kaoloka kalolia vandu valya kavaia: Nniń ito mukee induya. Mwasha kiimba kya kiki?

²²Vakanumbua: nKorinelio nshili akee nndu nsumani akusurie Iṛuva, awore nsendo nnuru vanduń woose va Vayuda, andevavaswa mmalaika nsongori iruma vandu kwafo, amu kwende kwamwi aaranye firero fafo.

²³Petiro kavaata kwamwi kavawaria vakava veeni vamwi. Neeli lya ndesi Petiro kakwimboo andu emwi nawo. Na kiindi kya vanavamae veekee Yope vakariana nae.

²⁴Na nkonu wa kavili wayo vakafika Kaisaria. Na Korinelio eevaveriee eemmaa ikuumbia andu emwi na va numba yamwi na ndoo tamwi.

²⁵Ili Petiro eeiraa na numba Korinelio kakwania nae kawa na si mbele yamwi eemwindiaa.

²⁶Petiro kamwimboo kanumbua: Salala amu nań nkee nndu shawe.

²⁷Ili eereraa nae kaaka numba kalolia-fo vandu vakuumbie-fo veengi.

²⁸Kavaia: Mwishi sheeli kitasumani nndu Muyuda ilungana na nndu wa uṛiti lungi ana nta imfikia. Kake Iṛuva anshiikimba nta nndu umwi ave ungau ni nravi ana nsutu.

²⁹Nkyo kiteveto nasha ili nndevaangwa nta ilea. Kyasia nkee yuṛa: Nkirero ki mundeshivaangia?

³⁰Korinelio kanumbua: Nnu ni nkonu wa kaani kuuka ilyo niikee itereva. Nayo ikee saa kyeenda ili niiterevaa numba kwakwa. Ilyo yeni nndu kasalala mbele yakwa aṛee nseto uvaramaa.

³¹Kashiia: Korinelio, itereva lyafo lyamiitiwa na misimbika yafo ikumbuywa mbele ya Iṛuva.

³²Kyasia ruma vandu vaende Yope vandevaanga Simon avaangwaa Petiro akee mwini numba kwa Simon nsisa shoni nkufui na mbaai ya nruva. Nae kansha areraa nawe.

³³Lia eni naruma vandu kwafo, nawe kwatana kisha kwasha. Kyasia alli ise toose tikee ia mbele ya Iṛuva amu taaranye firero foose kundevavaswa ni Nndumi.

³⁴Nae Petiro kabooka irera kanumbua: Alli nammanya dede sheeli Iṛuva allaa mikae ya vandu ndi.

³⁵Kake kari ka vandu woose ulya amweṛeaa na itana kisumani awario̱o̱ yye.

³⁶Kirero kyamwi Iṛuva ankirumia vana va Isiraeli karika Yesu Kristo akwanisie vandu mboni shinuru ta unambwe. Uu akee Nndumi wa woose.

³⁷Ini mwishi mboni tilya tindeva kulya urukeń loose lwa Yudaya tikabooka kulya Galilaya kuuka ubatiso lua Yohane andekwanisa. Sheeli Iṛuva andeavia

³⁸Yesu wa Nasareti Mumuyo Nsongori na finya. Nae kaṛuaṛua na itania kinuru valya woose veekee iliswa ukiva nSatana na ivakiṛa, fulya Iṛuva eekee andu emwi nae.

³⁹Neese tikee varambua va filya foose andetana urukeń lua lwa Vayuda na kulya Yerusalemu. Na Yesu uu vakawwaa vakankabia nsalabeń.

⁴⁰Kake Iṛuva kanduta nkonu wa kararu kamworusa na bata.

⁴¹Kake nkwa vandu woose ndi kita ise tikee varambua veensaulwaa ni Iṛuva. Neese tikalya nae na inwa andu emwi nae kyeeri kilya ili andemaa iṛuka kwa vafu.

⁴²Nae kativavasa toongoye vandu na iringisia, sheeli uu yye eende-ṛio̱o̱ ni Iṛuva ave mufukya myaandu ya valya veefo na muu na valya vamfwe.

⁴³Nae uu vaauya fisuku woose vanderera iringisioń lyawo, sheeli ulya woose ankusuraa atio̱o̱ mareko kwa irina lyamwi.

⁴⁴Kyasia ili Petiro eereraa firero fi Mumuyo Nsongori kaolokia valya woose veekee yaranya kirero kilya.

⁴⁵Na valya veekusuriee vakee varini valya veerianii na Petiro vakariika, fulya valolia na vayavaṛumu vamoolokio̱ mMumuyo Nsongori.

⁴⁶Fulya vavaita veereraa na mirerie miiya veeitikisaa Iṛuva.

⁴⁷Llyo Petiro anumbua: Eefo nndu amakii iima vandu va vawwaria Mumuyo Nsongori sheese veebatiswaa na mura?

⁴⁸Kavavasa vabatisio̱ irina lya Yesu Kristo. Llyo vantereva asinde kwawo mikonu kiindi.