Read MMA SHIYYA Mitanie ya varumi 11 Bible Online

Mitanie ya varumi 11 - MMA SHIYYA bible

Mitanie ya varumi 11

¹Kyasia varumi na vaaroe vawo vakee kulya Yudaya vakaita sheeli na vayavaṛumu vawwaria kirero kya Iṛuva.

²Neeli Petiro anderwa Yerusalemu, valya vakee varini vakavingana nae

³veenumbuaa: Kundeaka kwa vandu vatakee varini kwalya nawo.

⁴Petiro kabooka ivaongoya kwa useli eereraa:

⁵Niikee muṛiń wa Yope niiterevaa nailashika makusaṛo nalolia myorusie ya kindo kivakani na nseto nnini kiiolotwaa kyuka iṛuvewu na mikyendu yayo iini kikashifikia.

⁶Nakilla koroo niikusaṛaa nalolia mafisi a urukeń awore marende aani na mafisi a usakeń na aafuafuaa na si na ndee ta kwa si ya iṛuvewu.

⁷Naita ununga lwishiaa: Kwimboo Petiro, sikya kulye!

⁸Nanumbua: Wode Nndumi, amu kindo kyoose kikee kikasha na kitakee kisongovisi kyamiira kaniń kakwa ndi.

⁹Ununga lukashaaṛua lingi lya kavili luuka iṛuvewu: Filya Iṛuva amfiilisa manya iwe kutafaaṛue mfikasha.

¹⁰Kindo ki kyatanika kararu. Numa Uyo findo fo fiwiiṛwa iṛuvewu.

¹¹Na lia eni vandu vararu vakasalala mwaangoń wa numba yo niikaii varumwa kwakwa vauka Kaisaria.

¹²Mumuyo kashiia neende andu emwi nawo ntawore inunua. Na vanavamae iva varindaru vakaenda variani nań. Tikaira na numba ya nndu ulya.

¹³Nae katoongoya sheeli alolia malaika aselele numba kwamwi na imwia: Ruma vandu vaende Yope vavaange Simon avaangwaa Petiro.

¹⁴Yye akuṛuiyaa firero fa ikukira iwe andu emwi na va numba yafo yoose.

¹⁵Ili nndebooka irera, Mumuyo Nsongori ka vaolokia sha lia atoolokia neese ilyo mbooko.

¹⁶Nań nakumbua kirero kilya kya Nndumi akirera: Yohane abatisa na mura, kake ini mubatiswaa na Mumuyo Nsongori.

¹⁷Kyasia kwakooya Iṛuva avaniinga wavi lua weni andetiniinga ise tikusure Nndumi Yesu Kristo, niń nniń i mmakii iima Iṛuva?

¹⁸Ili vandeita firero fo vakasia do vakaṅinisa Iṛuva veenumbuaa: Kyasia Iṛuva allilia na vayavaṛumu vakooye ikurra nawo vakooye muu.

¹⁹Kyasia valya vandetaṛakana kiimba kya ukiva lundevavia lwa mboni ya Stefano vakaenda kumande Foinike na Kipiro na Antiokia nta yongoya nndu mboni yo kita Vayuda da kyaanya kyawo.

²⁰Kiindi kyawo veekee vandu va Kipiro na va Kirene. Iwo ili vandefika Antiokia vakakwanisia na Vagiriki mboni shisha ya Nndumi Yesu.

²¹Na uko lwa Nndumi lwikee andu emwi nawo na vandu veengi vakailashika vakakusura Nndumi.

²²Na mboni to ta vandu wo tikafika marwiń a siṛi ilya ikee kulya Yerusalemu. Vakaruma Barinaba aende Antiokia.

²³Nae ili andemaa ifika kalolia wavi Iṛuva awaavia kafura nnu kaikimba woose vakuware na Nndumi na ngoo toore finya.

²⁴Amu eekee nndu nnuru eeshule Mumuyo Nsongori na nndu wa ikusura. Na vandu kinga vakaaṛukia Nndumi.

²⁵Numa Barinaba kakwimboo kaenda Tariso indeṛuya Saulo. Ili andemaa illolia kamunnde Antiokia.

²⁶Nawo vakakaa ifo siṛiń ilya andu a mwaka umwi vakalosha vandu veengi. Na io Antiokia wwo vanalosho vandebookia ivaangwa Vakristo.

²⁷Mikonu yo vaauya vakainama vauka Yerusalemu vakafika Antiokia.

²⁸Kakwimboo umwi wawo irina lyamwi ni Agabo kaorusa eeitikwaa mMumuyo Nsongori sheeli ishaa soto nini isangeń koose. Nayo ikasha kyeeri kya Kaisari Kilaudio.

²⁹Na Vakristo valya vakakurera oo nndu aute weleki kisumani na masaa amwi lurikio̱ vanavamae valya vawo vakee kulya Yudaya.

³⁰Vakatana kuro vakarikia vasuṛi va siṛi ilya kwa maako a Barinaba na Saulo.