Read MMA SHIYYA Mitanie ya varumi 12 Bible Online

Mitanie ya varumi 12 - MMA SHIYYA bible

Mitanie ya varumi 12

¹Feeri filya feni mangi Herode kawara kiindi kya Vakristo kavatuṛua.

²Kawaa Yakobo mwanamae wa Yohane na shombo.

³Ili andelolia sheeli kikee isenya Vayuda kawara na Petiro. Na mikonu yo ikee mikonu ya mikate itadookie.

⁴Ammuwara kanrwaa kifingioń kanrambikia maakoń a vasikari vaani vaani vanringe. Kafura ansomute anrwaa mbele ya vandu Pasaka ikamiira amwumisie-fo.

⁵Kyasia Petiro karingwa kifingioń na siṛi ikalunga itereva Iṛuva kiimba kyamwi.

⁶Na kyeeri Herode andefura insomuta, na kio kilya kyeni Petiro eelelee karikari ka vasikari vavili afingie na mise ivili. Na kiwooṛo veeiyoo varingi va iringa kifingio.

⁷Lia eni malaika wa Nndumi kasalala kufui nae, langa ikamulika kulya kiṛiń kilya. Malaika ulya kakaba Petiro io mbari eemwiaa: Kwimboo alli kuri! Na mise ikaangaria si yuka maakoń.

⁸Malaika kamwia: Kufinge, ṛaa faaru fafo! Katana kuro. Numa kamwia: Raa nseto wafo kushisoṛe!

⁹Nae kasomuka wooṛo kansoṛa, nta imanya sheeli mmboni ya dede yaṛundwa mmalaika. Kakusaṛa sheeli yyoria da.

¹⁰Vakaira iringioń lya mbele na lya kavili. Vakasha kumande mwaangoń wa minya wa yaka muṛiń ukavaruukia to muni. Vakasomuka wooṛo vakaira shień imwi. Kwibari malaika kantia-wo.

¹¹Neeli Petiro andeṛukio̱ kanumbua: Alli nammanya dede sheeli ni Iṛuva aruma malaika wamwi asheshuuta ukoń lwa Herode na iverea lya vandu va Vayuda.

¹²Ili eekusaṛaa ifi kafika numba ya Maria akee mae wa Yohane ulya avaangwa na irina lyamwi lya kavili Mariko. Na vandu veengi vee-kusandii-wo veeterevaa Iṛuva.

¹³Nae ili eekabakabaa yoondi iketi lya kika irina lyamwi ni Rode kasha yaranya.

¹⁴Ili andemanya ununga lwa Petiro nta irua mwaango kiimba kya ifura. Karisha kaaka na kulya kari kavaia sheeli Petiro aselele mwaangoń.

¹⁵Vakamwia: Koorwa ni uketo. Kake ye kakaarisa nnu kanumbua sheeli mfo kuro kikai. Wo vakanumbua: Mmalaika wamwi.

¹⁶Petiro kaengeṛia ikabakaba. Ili vandemaa inruya vakallolia vakariika deń.

¹⁷Nae kavatukia uko vasie do kavaongoya kasa Nndumi amwuta kifingioń. Kavaia: Endoongoyeń Yakobo na vanavamae veru mboni ti. Kakwimboo kaenda kundo kungi.

¹⁸Ili kundekya vasikari vakaṛiika nnu, nkwi Petiro aira.

¹⁹Ili Herode andenduya nta illolia kauṛa varingi valya kavavasa vawalwa. Numa kainama auka Yudaya kaenda Kaisaria kakaa-fo.

²⁰Na kyeeri kilya Herode eetuṛukiee nnu vandu va Tiro na Sidon. Nawo vakarera kikwena vakanrumia vandu va intereva. Vakawara undoo na Bilasito akee mulla wa numba ya mangi vakatereva unambwe, fulya uruka lwawo lwikooyaa shoonga urukeń lwa mangi ilya.

²¹Kyasia nkonu umwi weenrekio̱o̱ Herode kaṛaa miseto ya kimangi kakaya kifumbi kyamwi kya witoṛo kareria vandu.

²²Vandu vakaṛoṛongya veenumbuaa: Ni ununga lwa Iṛuva, nta ni ununga lwa nndu ndi.

²³Lia eni malaika wa Nndumi kankaba, fulya kitaare andeniinga Iṛuva tikisi. Kaliwa mmakuru akee na muu kafwa.

²⁴Na kirero kya Iṛuva kikafumbuka na ikwana.

²⁵Na Barinaba na Saulo ili vandemaa yawutia uṛundi lwawo vakauya Antiokia vauka Yerusalemu vakakurika na Yohane eevaangwaa Mariko.