Read MMA SHIYYA Mitanie ya varumi 13 Bible Online

Mitanie ya varumi 13 - MMA SHIYYA bible

Mitanie ya varumi 13

¹Neefo siṛiń ilya ikee Antiokia veeifoo vaauya na valosha, nawo ni Barinaba na Simeon eevaangwaa Nigeri na Lukio wa kulya Kirene na Manaen ulya eekee uroe wa mangi Herode, na Saulo.

²Kyasia iva ili veeterevaa Nndumi na ikootoya Mumuyo Nsongori kanumbua: Shisauyeń Barinaba na Saulo vaende mashoṛeń alya nndevavaangia.

³Ili vandemaa ikootoya na itereva vakavaekeṛia maako vakavaotoṛa vaende.

⁴Kyasiań vandu wo ili vandemaa irumwa Mmumuyo Nsongori vakainama Seloikia. Na kuuka ifo vakaira nruveń vakafika Kipiro.

⁵Na ili veekee kulya Salami vakakwanisa kirero kya Iṛuva numbeń ta isomia ta Vayuda. Nawo veerianii na Yohane kava ndundi wawo.

⁶Ili vandemaa iira karikari ka uruka loose lwa Kipiro kumande muṛi wa Pafo, vakalolia nndu nsavi akee mwauya wa wongo. Nae ni nndu Muyuda irina lyamwi mBar-Yesu.

⁷Nndu uu eekuworee na nshili wa kulya Serigio Paulo akee nndu ndango. Nshili to kavaanga Barinaba na Saulo vashe kwamwi kafura yaranya kirero kya Iṛuva.

⁸Kake mwaanga ulya Elima — amu yo yyo misendie ya irina lyamwi — kavingana nawo kafura iroongia nshili ulya nrima wa ilea ikusura.

⁹Kake Saulo ulya avaangwa na Paulo eeshue Mumuyo Nsongori kamulla koroo kanumbua:

¹⁰Iwe kwishue ntambwe na ukasha loose kukee mwana wa Satana, kukee nkituva wa udede loose, kutiaa-wo se yotuaotua shia ta Nndumi tiseṛeekie?

¹¹Kyasia lla uko lwa Nndumi lukuwaraa, nawe kuvaa ndoń kutakiloliaa saa kyeeri kilive. Lia eni nruve ukawwoya na llema kalengetialengetia eeṛuyaa nndu wa iwwara uko amworuse shia.

¹²Na ili nshili ulya andelolia filya findetanika kakusura eṛiikaa kya miloshie ya Nndumi.

¹³Numa Paulo na vaaroe vakasaama ngalaveń vakauka kulya Pafo vakafika muṛiń wa Perige urukeń lwa Pamfilia. Mfo Yohane andelakana nawo kauya Yerusalemu.

¹⁴Kake wo vakakwimboo kulya Perige vakaira kari ka uruka vakafika Antiokia muṛi wa Pisidia. Vakaira na numba ya iterevia nkonu wa Sabato vakakaa rembo.

¹⁵Kyasia ili mavavaso andemaa isomwa na mboni ta vaauya fisuku, vanini va numba ya iterevia vakavarumia nndu avaie: Muṛe vanavama, kwakooya moore kirero kya yeleka vandu va, kirereń.

¹⁶Paulo kakwimboo kavatukia uko kanumbua: Muṛe womi va Isiraeli neeni mweṛee Iṛuva, shaaranyiń!

¹⁷Iṛuva wa ufwari lu lweru lwa Isiraeli yye asaua vaande yeru kafumbuta vandu wo ilyo veekee sha veeni urukeń lwa Misiri. Kasaaṛa uko lwamwi kavauta-fo.

¹⁸Kavasisiria andu a myaka makumi aani kulya bateń.

¹⁹Na ili andemaa ireta ngyuṛiti mfungare kulya urukeń lwa Kanaan kavaniinga uruka lo luve diṅu yawo.

²⁰Ikaira myaka mayana aani na makumi araanu. Numa yayo kavaniinga vashili kumande kyeeri kya mwauya fisuku ulya Samweli.

²¹Numa yayo vakatereva vaniingwa mangi. Iṛuva kavaniinga Sauli mwana wa Kisi akee nndu wa ufwari lwa kwa Benyamin kwa kiṛengo kya myaka makumi aani.

²²Neeli andemaa imwuta-fo ito, kaseṛeesa Davidi ave mangi yawo ulya andenrambua eenumbuaa: ”Nallolia Davidi mwana wa Isai, ni nndu asenye nrima wakwa, atanaa mifurie yakwa yoose“.

²³Ifo uṛitiń lwa nndu to Iṛuva andeendee vandu va Isiraeli nkiṛa, yye Yesu sheeli arekia.

²⁴Nae kitaare andesha, Yohane eemoongoyaa vandu woose va Isiraeli mboni ta ubatiso lwa iilashika.

²⁵Na Yohane ili eekee imarisia uṛundi lwamwi kanumbua: Mukusaṛie niń nkee i? Nniń ye ndi. Kake lleń akee isha umwi numa yakwa ito ntakaṛiaa iboṛomua faaru fa marende amwi.

²⁶Muṛe vanavama, mukee vana va ufwari lwa Abraamu na iwo vakee kari kanu vakusurie Iṛuva, nkweru ise kirero ki kya ikiṛwa kinderikwa.

²⁷Amu iwo vakee Yerusalemu na vanini vawo vandemanya Yesu uu ndi vakamwumisia. Na kuro vandeawutia firero filya fa vaauya fisuku fikee isomwa nkonu woose wa Sabato.

²⁸Lla kasa vandetuṛa kiteveto kya iwwaa vakatereva Pilato awalwa.

²⁹Neeli vandemarisia foose eentisiṛio̱o̱, vakamwolota kiriń vakandika mbangeń.

³⁰Kake Iṛuva kanduta kwa vafu.

³¹Kalolika mikonu miingi kwa valya vanderwa nae vauka Galilaya vakafika Yerusalemu. Wwo vakee varambua vamwi alli mbele ya vandu.

³²Neese tikee imukwanisia nrumi shisha ya kirekio kilya kinde-niingio̱ vaande yeru sheeli:

³³Iṛuva antifitia ise tikee vana vawo kirekio kyo, ili andeṛuta Yesu kwa vafu. Mfo kuro kyeentisiṛwaa na akwaa nkitabuń kya kavili kya fiimbo fa Davidi: ”Iwe ni iwe mwana wakwa nniń nakwira nnu“.

³⁴Lingi sheeli andenduta amu atabwaa, Ilyo anderera sheeli: ”Mmuniingaa ini findo fisongori fa Davidi fiiya fitavaa iilashika“.

³⁵Kwa ikyo na andu engi akee irera: ”Kureaa nsongori wafo abwaa ndi“.

³⁶Amu ili Davidi andemaa iṛundia mifurie ya Iṛuva kyeeri kyamwi kafwa kaṛikwa kifuń kya vaandee yamwi kabwaa.

³⁷Kake ulya andeṛutwa ni Iṛuva ye abwaa ndi.

³⁸Kyasia vanavama, kimanyike kwanu sheeli kiimba kya uu mukee ikwanisio̱ itio̱ lya mareko

³⁹Na kwa kiimba kyamwi ulya woose amwirikiaa ataalio̱o̱ usumani lutavaa itaa ifo uvavasoń lwa Mose.

⁴⁰Kyasia kulleń mutafikio̱ nkirero kilya kyarerwa wauya fisuku sheeli:

⁴¹”Lleń ini muwore wilo muṛiike na ireka mureke! Fulya niń nkee itana kindo kyeeri ki kyanu kindo mutakiirikiaa deń, na akwaa nndu amwongoya are.“

⁴²Neeli veesomukaa vakavatereva vaongoywa lingi firero fi nkonu ungi wa Sabato.

⁴³Ili kisomio kindesomuka, Vayuda na vandu vasongori va siṛi vakakulunga na Paulo na Barinaba. Nawo vakarera na vandu valya vakavakaarisa nrimiń vakaa vakuwore na uwoo lwa Iṛuva.

⁴⁴Na nkonu to wa Sabato undesoṛa vandu veengi kufui va muṛi woose vakakusandia vaaranye kirero kya Iṛuva.

⁴⁵Kake ili Vayuda vandelolia isyamu vakaira iriso vakakana firero findererwa mPaulo veefiiriaa ngani na iruma.

⁴⁶Paulo na Barinaba vakarera na baa veenumbuaa: Kyeewwaraa kirero kya Iṛuva kirerwa kwanu mukee Vayuda lya mbele. Kake fulya mukee ikiumbutia kwaasha na ikulolia mirimiń yanu sheeli mutatinywa muu wa miṛeṛe, Heń te tikiongoyaa vayavaṛumu.

⁴⁷Amu nkuro tikee vavavase ni Nndumi: ”Nankurwaa kuve langa ya vayavaṛumu, kuve mukiṛa kumande mmando wa isanga“.

⁴⁸Ili vayavaṛumu vandeita ifo vakafura vakaitikisa kirero kya Nndumi. Na woose veemmaa ideeṛio̱ muu wa miṛeṛe vakakusura.

⁴⁹Na kirero kya Nndumi kikakwana urukeń lua loose.

⁵⁰Kake Vayuda vakaaya vaka vanini vandekuwara na Vayuda na vanini va muṛi vakakuria vandu, amu vasue Paulo na Barinaba vakavaumbuta miyanuń yawo.

⁵¹Nawo vakavaangatia funga ya marende awo vakaenda Ikonio.

⁵²Na vanalosho valya vakaishua ifura na Mumuyo Nsongori.