Read MMA SHIYYA Mitanie ya varumi 14 Bible Online

Mitanie ya varumi 14 - MMA SHIYYA bible

Mitanie ya varumi 14

¹Na kulya Ikonio vakaira na numba ya iterevia ya Vayuda vakaongoya-fo. Na syamu nini ya Vayuda na Vagiriki vakakusura.

²Kake Vayuda valya vatakusurie wo vakafuluta vayavaṛumu na ivaatia fikasha, amu vasue vanavamae.

³Kyasia vakakaa ifo mikonu miingi veekwanisaa na baa vakuvavie na Nndumi. Nae Nndumi karambua kirero kilya kya ililia lyamwi eeveelekiaa amu myorusie ya maṛiikiswa itanike kwa maako awo.

⁴Kake wiingi lwa vandu veekee muṛiń vakakwava kavili. Vengi vakakaa taari ya Vayuda na vengi taari ya varumi.

⁵Kikakwimboo kitari kwa vayavaṛumu na kwa Vayuda na vanini vawo vavatuṛue na ivakaba na mawe.

⁶Ili varumi vandemanya mboni ii vakarishia Lisitira na Deribe ikee miṛi ya Likaonia na ngyuruka tikee miyanuń.

⁷Vakakaa-fo veekwanisaa mboni shinuru ta ikia.

⁸Na ifo Lisitira eeifoo nndu umwi marende amwi eekee manketenkete. Eekee kisaya kuuka ndewuń ya mae, nae eemeendaa kutu ndi.

⁹Nndu to kaaranya Paulo ili eereraa. Nae kamulla koroo kalolia sheeli awore ikusura lya ikiṛwa.

¹⁰Karera na ununga unini kamwia: Salala na marende afo kinsha! Kasalala ree kaṛua.

¹¹Neeli isyamu lindelolia kilya Paulo atana vakarosa ngyununga tawo veereraa na mirerie yawo ya Kilikaonia: Maṛuva ankufananisa na vandu akatiolokia.

¹²Vakavaanga Barinaba Seusi na Paulo vakavvaanga Hermesi, fulya yye eekee nreri.

¹³Na nkohani wa Seusi eeworee numba yamwi ya ivika firaso ikee wooṛo ya muṛi. Kannde numbe na fiṛeto fa fivaṛo ifo mbengeń ya muṛi arie ivikia varumi firaso andu emwi na syamu.

¹⁴Kake varumi valya Barinaba na Paulo ili vandemanya ikyo vakarandaranda miseto yawo vakakwata io isyamuń vakaṛoṛongya

¹⁵veenumbuaa: Muṛe womi, nki ili mukee itana ifi? Neese tikee vandu sheeni. Tikee imukwanisia mboni shinuru ta ikia, amu mwilashike na itia findo fi fa dua na yaṛukia Iṛuva uu eefo na muu, uu atanie iṛuvewu na isanga na nruva na foose fiifo.

¹⁶Nae ni ulya ilyo mbele mikonu yo yaira atia vayavaṛumu woose vasoṛe shia tawo wo veni.

¹⁷Kake andeiwukana neeni ndi, fulya atana na finuru eemuniingaa fua yuka iṛuvewu na feeri fa iilula eemuwuurusaa mirima yanu shoonga na ifura.

¹⁸Nawo ili veereraa kuri vakaima isyamu kwa ngatara vatavarase.

¹⁹Veeifoo Vayuda vandefika-fo vauka Antiokia na Ikonio vakakuria syamu vakakaba Paulo na mawe vakansuṛuya wooṛo ya muṛi veekusaṛaa ammaa ifwa.

²⁰Kake ili vanalosho vandesha vallengetie kakwimboo kaenda kulya muṛiń. Na ili lya ndesi kauka-fo kaenda andu emwi na Barinaba vakafika Deribe.

²¹Ili vandemaa ikwanisa mboni shinuru ta ikia kulya muṛiń ulya na ikooya vanalosho veengi vakauya na kulya Lisitira na Ikonio na Antiokia muṛi wa Pisidia

²²veekaarisaa mirima ya vanalosho, amu vakaa ikusureń lia na ivaikimba sheeli kyatiwara yaka umangiń lwa Iṛuva na ngatara shiingi.

²³Vakavasauya vashili siṛiń yoose vakavarambikia Nndumi to vankusurie veetereviaa-wo na ikootoya.

²⁴Vakaira kari ka Pisidia vakafika urukefi lwa Pamfilia.

²⁵Neeli vandemaa ikwanisa kirero kilya kulya Perige vakainama kumande muṛi wa Atalia.

²⁶Na kuuka ifo vakasaama ngalaveń vakaenda Antiokia. Neefo mfo vaterevio̱ uwoo lwa Iṛuva mashoṛeń alya veemmaa yawutia.

²⁷Vammaa ifika-fo vakasandia siṛi yoose vakavaongoya filya foose Iṛuva andetana andu emwi nawo na sheeli anruya vayavaṛumu mwaango wa ikusura.

²⁸Vakakaa ifo mikonu itakee myaangu andu emwi na vanalosho.