Read MMA SHIYYA Mitanie ya varumi 15 Bible Online

Mitanie ya varumi 15 - MMA SHIYYA bible

Mitanie ya varumi 15

¹Vakainama vandu kiindi Antiokia vauka Yudaya vakalosha vanavamae sheeli: Mukara mutarinwa musoṛe mikae ya Mose, mumakii ikia ndi.

²Kikava kitari ifo siṛiń. Na Paulo na Barinaba vakavingana na vandu wo na yaṛuyana nawo nnu. Lya ifurumia vandu va siṛi vakavavasa Paulo na Barinaba varwe vaende Yerusalemu andu emwi na vengi kari kawo varwaa-fo mwaandu uu kwa varumi na vasuṛi.

³Kyasia vakaṛaṛatwa nsiṛi vakaira kari ka uruka lwa Foinike na Samaria veekwanisaa mboni ta iilashika lya vayavaṛumu. Kikaniinga vanavamae ifura inini.

⁴Neeli vandefika Yerusalemu vakawario̱ nsiṛi na varumi na vasuṛi. Nawo vakavaongoya findo foose Iṛuva andeṛunda andu emwi nawo.

⁵Kake kiindi kya taari ya Vafarisayo valya veekusuriee vakasalala vakanumbua: Kyawara varinwa na ivavavasa vaware ivavaso lya Mose.

⁶Varumi na vasuṛi vakakusandia amu vakusaṛe kerero kyo.

⁷Na numa ya yaṛuyana iingi Petiro kakwimboo kavaia: Muṛe vanavama, ini mwishi sheeli kuuka mbooko Iṛuva ashisaua kari kanu amu vayavaṛumu vaite kirero kya nrumi ya ifura ya ikia kwa kana kakwa na ikikusura.

⁸Na Iṛuva uu eeshi mirima ya vandu kavarambua eevaniingaa Mumuyo Nsongori sheeli atiniinga neese.

⁹Ana nta arwaa mwavanu kari kawo neese ndi kavasangya mirima yawo na ikusura.

¹⁰Nki iliń mukee yelelia Iṛuva na irika vanalosho myanda sungoń kitaare vaande yeru ana ise tammakii ikurika.

¹¹Kake tikusurie sheeli ni uwoo lwa Nndumi Yesu lo weni lutikiṛaa neese shawo.

¹²Kyasia isyamu lyoose likasia do likaaranya Barinaba na Paulo veevaongoyaa mboni ta myorusie na maṛiikiso lya Iṛuva andeatana kwa urumi lwawo kari ka vayavaṛumu.

¹³Nawo ifi vandemaa Yakobo kaaṛua eenumbuaa: Muṛe womi na vamwanama, shaaranyiń!

¹⁴Petiro antoongoya sheeli Iṛuva muni andebooka illa vayavaṛumu, amu asaue vandu kari kawo vaindie irina lyamwi.

¹⁵Na firero fa vaauya fisuku fivakani na firero fo, sheeli kyatisiṛwa:

¹⁶”Ifo fikammaa iira nuuyaa, nań nsongosiaa fingi numba ya Davidi yeewwaa. Nsongosiaa fingi iwa lyayo, nań niiseṛeesaa,

¹⁷amu vandu valya vakiseere vaṛuye Nndumi andu emwi na vayavaṛumu woose. Amu nawo vakee nkula wakwa. Nkuro Nndumi arera atana ifi foose.

¹⁸Nakyo kyammanyika kuuka mbooko ya isanga.“

¹⁹Kiimba kya ikyo niń nkee ifukya kuri: Manya titatuṛue valya vandeaṛukia Iṛuva vauka ifo kwa vayavaṛumu.

²⁰Kake tivati-siṛie barua na ivaia vaiwukani na irasia vaṛumu na iiwukana na waaisi na ilya nyama ta findo fakuṛwa na inwa usao.

²¹Amu kuuka ilyo kala Mose awore vandu va ikwanisa mboni tamwi muṛiń woose tiisomwaa nkonu woose wa Sabato ifo numbeń ta iterevia.

²²Kyasia kikasenya varumi na vasuṛi na siṛi yoose vasaue vandu kari kawo na ivaruma Antiokia andu emwi na Paulo na Barinaba. Nawo wwo iva: Yuda eevaangwaa Barisaba na Sila veekee vandu vanini kari ka vanavamae vawo. Vakatisiṛa barua na ivarikia kwa maako awo. Nayo irerie kuri:

²³Ise varumi na vasuṛi tamwisana ini vanavamae veru mukee ifo Antiokia na Siria na Kilikia muukie kwa vayavaṛumu.

²⁴Tamiita sheeli vandu vandeuka kweru vakasha na kwanu kitaare vanderumwa ni ise. Nawo vakamutuṛua na firero fawo na ifulua mirima yanu.

²⁵Kiimba kya iki tamiirikiana na nrima umwi tisaue vandu na ivaruma kwanu andu emwi na Barinaba na Paulo vakunde veru.

²⁶Nawo vavili wwomi vandereta muu wawo kiimba kya irina lya Nndumi weru Yesu Kristo.

²⁷Kyasia tanruma Yuda na Sila wwo vamuiaa wo veni firero fo na kana kawo.

²⁸Amu tindefukya teelekio̱o̱ mMumuyo Nsongori manya titamurike myanda kitaare mfilya fawara.

²⁹Mfo ifi: Mwiwukani na findo fa misimbika ya firasio ya fwana na usao na nyama takuṛwa na waaisi. Mukakwima ifo mutanaa kisha. Kaańń na kibua!

³⁰Ili iwo vandemaa iṛaṛatwa vakainama Antiokia. Vakasandia siṛi yoose vakaniingia barua ilya.

³¹Nawo vakaisoma vakafura kiimba kya ilembwalembwa lia.

³²Yuda na Sila nawo wo veni veekee vaauya vakaikimba vanavamae na firero fiingi vakavakaarisa.

³³Neeli vandekaa ifo kyeeri kiindi vakavikio̱ muumu wanavamae vauye na unambwe kwa valya vandevaruma.

³⁴Kake Sila kalolia nkisha ikaa ifo.

³⁵Na Paulo na Barinaba vakakaa ifo Antiokia veeloshaa na ikwanisa nrumi shisha ya Nndumi andu emwi na vandu vengi veengi.

³⁶Numa ya mikonu myaangu Paulo kaia Barinaba: Sie! Tuuye alli tindella vanavamae wo miṛiń yoose kulya tindekwanisia kirero kya Nndumi timanyi kasa veefo.

³⁷Kyasia Barinaba kafura ikurika Yohane ulya eevaangwaa Mariko aende ariani nawo.

³⁸Kake Paulo kalolia nkisha ikurika ito andevarea ifo Pamfilia ataende nawo mashoṛeń ndi.

³⁹Kyasia tikasha-wo ngani kari kawo kumande valakana. Barinaba kakurika Mariko vakaaṛukia ngalaveń vakaenda Kipiro.

⁴⁰Na Paulo kasaua Sila kaimboo kyaaṛo eeterevio̱o̱ wanavamae Iṛuva avakurike na uwoo.

⁴¹Kaira kari ka Siria na Kilikia eekaarisaa siṛi tilya.