Read MMA SHIYYA Mitanie ya varumi 16 Bible Online

Mitanie ya varumi 16 - MMA SHIYYA bible

Mitanie ya varumi 16

¹Kyasia kafika Deribe na Lisitira. Na ifo eeifoo mwanalosho umwi irina lyamwi nTimoteo akee mwana wa nka Muyuda akusurie. Na ndee eekee Ngiriki (= muyavaṛumu).

²Nseṛo to eemanyikiee kinuru wanavamae valya vakee kulya Lisitira na Ikonio.

³Paulo kakunda ito aende andu emwi nae kankurika kanrina kiimba kya Vayuda valya veekee taari tilya. Amu woose veeishii sheeli ndee ni Ngiriki.

⁴Kyasia ili veeiraa kulya miṛiń ilya vakavaniingia mavavaso alya a varumi na vasuṛi valya vakee Yerusalemu, amu vaaringe.

⁵Na siṛi tilya tikaniingwa finya ya ikusura tikakwengeṛia ifumbuka oo nkonu.

⁶Vakaira urukeń lwa Firigia na Galatia vakaimwa mMumuyo Nsongori veekwanisaa kirero kilya ifo Asia.

⁷Ili vandefika kufui na Misia vakaelelia yenda Bitinia, kake Mumuyo wa Yesu avaniinga muumu ndi.

⁸Vakaira Misia vakainama Tiroa.

⁹Na ifo Paulo kaoruswa myorusie kio. Kalolia nndu wa kulya Makedonia aselele-wo kantereva na imwia: Ṛuka kushe Makedonia kushetielekia!

¹⁰Neeli andemaa ilolia myorusie yo, lia eni tikafura yenda Makedonia, fulya talolia sheeli ni Iṛuva antivaangia nafo tivakwanisie nrumi shisha ya ikia.

¹¹Kyasia tikaira kyaaṛo kya ngalaveń kuuka Tiroa tikafika Samotirake na nkonu wa kavili tikafika Neapoli.

¹²Na kuuka ifo tikafika Filipi ukee muṛi nnini muungoń ulya wa Makedonia andu Varome vasamia. Tikakaa muṛiń uu mikonu kiindi.

¹³Neeli undefika nkonu wa Sabato tikasomuka wooṛo ya muṛi tikaenda mbaai ya iriko tikakusaṛa sheeli andu wo awore andu a iterevia. Tikakaa rembo tikarera na vaka veekusandiee io.

¹⁴Nka umwi irina lyamwi ni Lidia akee nkumbi wa miseto itondoṛie akee wa muṛi wa Tiatira akusurie Iṛuva kataaranya. Na Nndumi kanrua nrima aware kisha firero filya Andererwa mPaulo.

¹⁵Neeli andemaa ibatiswa andu emwi na va numba yamwi katitereva kanumbua: Kwakooya mwashilolia sheeli nsumanikie kwa Nndumi, oṛeshoń kyeń kwakwa mukaa-fo. Katiitika tikaenda.

¹⁶Neeli tiiendaa andu emwi alya a iterevia, isinga limwi lya kika likakwania neese aworwa mmumuyo wa iringisia, andekooiya nato womi vamwi mbusha shiingi kwa iringisia lyamwi.

¹⁷Kasoṛa Paulo neese eekabaa kiṛoṛongyo eenumbuaa: Vandu va vvaṛundi va Iṛuva akee ule, nawo vakee imukwanisia shia ya ikiṛwa.

¹⁸Katana kuro mikonu miingi. Kake Paulo katuṛuka kainduka kaia mumuyo ulya: Nakuvavasa na irina lya Yesu Kristo, uka nndu uu. Ukamwuka saa ilya sheni.

¹⁹Neeli womi vamwi vandelolia sheeli mbusha ya masaa awo yammaa ivarekia vakawara Paulo na Sila vakavasuṛua mbele ya vanini va muṛi.

²⁰Vakavarwaya vashili vakanumbua: Vandu va vakee ifuluafulua nnu muṛi weru, nawo vVayuda.

²¹Lingi vakee ikwanisa mboni ta mikae itasumani tiiwarie na iisoṛa, amu ise tikee Varome.

²²Isyamu lyoose nalyo likavasua. Na vashili vakavauta miseto yawo na finya vakavavasa vakabwa na mbiiri.

²³Neeli vandemaa ivakaba nnu vakavarwaa kifingioń vakavavasa nringi wa kifingio avaringe nnu.

²⁴Neeli amaa ikooya ivavaso lyo kavarwaa kiṛiń kya kari kavafinga marende awo na makengeto.

²⁵Kake kyeeri kya kio masomukoń Paulo na Sila vakatereva Iṛuva na imwimbia fiimbo fa imwitikisa, na vafinge vengi veekee Vaaranya.

²⁶Lia eni likava irerema inini lya si na kirembo kya kifingio kikasenika. Na lia eni myaango yoose ikaruuka na makengeto a woose akaoṛomuka.

²⁷Nringi ulya wa kifingio kamarukia-fo kalolia myaango ya kifingio iruukie kasomua shombo kafura ikuwaa, amu akusaṛa sheeli vafungwa vanrisha.

²⁸Kake Paulo karosa ununga lwamwi na finya eenumbuaa: Manya ikukasheesa, amu tiiyo ti woose.

²⁹Nae kavavasa taa tinndwa karumbukia kari eereremaa na yeṛea kawa marendeń a Paulo na Sila.

³⁰Kavasomuta wooṛo kanumbua: Womi vakwa, nkiki ntanaa amu nkie?

³¹Vakamwia: Kusure Nndumi Yesu Kristo, nawe kukiaa andu emwi na va numba yafo.

³²Vakamwongoya kirero kya Nndumi ye na va numba yamwi woose.

³³Kavawaria kwamwi saa ilya sheni ya kio kavasangya faasha fawo. Numa kakubatisio̱ ye na vandu vamwi woose kyeeri kyo kyeni.

³⁴Kavarwaa numba kwamwi kavasongosia shoonga. Kafura nnu ye na va numba yamwi, fulya ammaa ikusura Iṛuva.

³⁵Ili kundekya vashili vakaruma vaṛundi vawo veenumbuaa: Otoṛa vandu wo vakwendie!

³⁶Nringi ulya wa kifingio kaia Paulo firero filya eenumbuaa: Vashili vanruma vandu, amu mwoṛomulwa. Kyasia alli somukeń wooṛo mukwendie na unambwe.

³⁷Paulo kavaia: Vantikaba mbele ya vandu woose kitaare vantianduya, neese tikee Varome. Lingi vakatirwaa kifingioń. Na alli vakee itiuta-fo na kiṛisi? Wode nkuro ndi. Vashe wo veni vashetiuta-fo.

³⁸Vaṛundi valya vakandeongoya vashili valya firero fi. Nawo vakaeṛea ili vandeita sheeli wo vVarome.

³⁹Vakasha ivalembalemba vakavasomuta wooṛo vakavatereva vauke muṛiń ulya.

⁴⁰Nawo vakauka kifingioń vakaenda numba kwa Lidia. Neeli vandemaa ikwania na vanavamae vakavawiirṛia muu vakaenda.