Read MMA SHIYYA Mitanie ya varumi 17 Bible Online

Mitanie ya varumi 17 - MMA SHIYYA bible

Mitanie ya varumi 17

¹Neeli vandemaa iira ifo Amfipoli na Apolonia vakafika Tesalonike. Neefo iifoo numba ya iterevia ya Vayuda.

²Na Paulo katana sheeli eeshivie kaaka neefo vakai kauṛana nawo Sabato isaru kya filya fitisiṛie mitisiṛień.

³Kavaorusa na bata na ivaongoya sheeli kyeewwaraa Kristo aliswa ukiva na iṛuka kwa vafu. Kamanda eenumbuaa: Yesu uu nkee imwongoya mboni tamwi yye Kristo.

⁴Kiindi kari kawo vakakusura vakakuwara na Paulo na Sila na Vagiriki veengi veekusuriee Iṛuva na vaka veeworee tikisi nta veekee vaangu ndi.

⁵Na Vayuda valya vakaira iriso vakakurika vandu kiindi kari ka vandu va dua vataare nsendo nnuru. Nawo vakasandia syamu vakaanta kitari muṛiń. Vakalengetia numba ya Yason veeṛuuyaa-wo Paulo na Sila vavarwaa mbele ya vandu va muṛi.

⁶Neeli vandevatuṛa-fo vakasuṛua Yason na kiindi kya vanavamae vakavarwaa kwa vashili va muṛi veeṛoṛongyaa veenumbuaa: Vandu va vafukiye isanga lyoose vansha kunu nafo.

⁷Na Yason kavawaria kwamwi. Na iva woose vakee itana findo fikee mbaai na mavavaso a Kaisari veenumbuaa sheeli iifo mangi ingi avaangwaa Yesu.

⁸Vakaunganisa vandu veengi na akwaa washili va muṛi ili vandeita ifi.

⁹Neeli vandemaa iwaria masaa a nrendeke Yason andevaniingia na vaaroe vamwi vakavaotoṛa.

¹⁰Lia eni vanavamae wo vakaṛaṛata Paulo na Sila kio kilya kumande Beroya. Ili vandefika-fo vakaira na numba ya iterevia ya Vayuda.

¹¹Na vandu va veeworee windi kita valya va Tesalonike vakawaria kirero na warutu. Vakasaṛaana mitisine nkonu woose valle akwaa findo fo nkuro fikai.

¹²Kyasia vandu veengi kari kawo vakakusura na vaka va Kigiriki iwo veeworee tikisi na womi veekee vaangu ndi.

¹³Kake Vayuda va Tesalonike ili vandeita mboni sheeli kirero kyo kikee ikwaniswa mPaulo kulya Beroya vakaenda ifo nafo vakafulutafuluta syamu.

¹⁴Kyeeri kilya kyeni vanavamae valya vakakurika Paulo aende kumande mbaai ya nruva. Kake Sila na Timoteo vakasaa ifo Beroya.

¹⁵Na valya vandeimia Paulo vakamfita muṛiń wa Atene. Neeli vandemaa iwaria ivavaso lya irwaya Sila na Timoteo, sheeli manya vatakyewa insoṛa, vakauya na kwawo.

¹⁶Ili Paulo eevaveree ifo Atene kalolia sheeli muṛi uu wishule fwana ta maṛuva a wongo, nrima wamwi ukafulutwa nnu.

¹⁷Karera na Vayuda na valya vandekuwara nawo ifo numba ya iterevia. Na akwaa nsingiṛeń karera na vandu andekwania-fo nawo.

¹⁸Na vandu kiindi va taari ya Epikuro na ya Sitoa vakavingana nae. Veefo vandenumbua: A nriṅani uu afurie irera ki? Vengi vakanumbua: Alolikie sheeli mmukwanisa mboni ta maṛuva meeni. Mfulya Paulo eekee ikwanisa mboni ta ifura ta Yesu na ta iṛuka lyamwi.

¹⁹Vakawwara vakankurika andu a ireria fikwena kiduruń kya Aresi vakanumbua: Naare? Timakii imanya misendie ya miloshie ii miiya kukee iilosha?

²⁰Amu kukee innde mboni shiiya marwiń eru. Kyasia tifurie imanya misendie ya mboni ti.

²¹Fulya Vaatene na veeni wo veekee ifo veeworee nta mwaanya wa kirero nta kimwi kita iniingia mboni na yaranya mboni ta kindo kiiya.

²²Kyasia Paulo kasalala alya kiduruń kya Aresi karikari kanumbua: Muṛe womi va Atene, llolie mukee vandu muworwa nnu mmasha a iindia maṛuva anu findoń foose.

²³Lia nduaṛua kunu kwanu niillaa andu anu a irasia nakooya kirasioń kitisiṛie-wo: Nkya Iṛuva liteeshiwa. Kyasia ito mumwindiaa mutamwishi yye uu nkee imukwanisia mboni tamwi.

²⁴Iṛuva uu yye atana isanga na findo foose fiifo, amu ye ni Nndumi wa iṛuvewu na isanga. Nta akaa numba ta iterevia tantanwa na maako a vandu ndi.

²⁵Ana nta aṛundio̱o̱ kwa maako a vandu ndi ana nta kindo kintinye, amu yye aniingie woose muu na mumuyo na findo foose.

²⁶Nae yye andemilisa ngyuṛiti toose ta vandu kwa nkuuku umwi kavaniinga mwaanya wa ikaa masangeń koose. Kavarwaya feeri fa muu wawo na miyanu ya firembo fawo.

²⁷Yye uu afurie vaṛuye Iṛuva, na kwakooya vatangatanga vallolie. Lla kasa atakee kwaasha na nndu woose weru,

²⁸Fulya kwamwi tiutaa muu weru na mikae yeru na foose tikee nafo. Sheeli na vaaṛia kiindi va kikwanu vandenumbua: ”Neese tikee va ufwari lwamwi“.

²⁹Kyasiań kwakooya ise tikee va ufwari lwamwi, kivaa ivakanisa Iṛuva na mitanie ya saabu ana ya fesa ana ya mawe findesongosio̱ kwa imakii na uṛango lwa vandu ndi.

³⁰Kyasia Iṛuva ameeṛa feeri filya fa utondo lwa vandu mungo. Kake alli akee iṛaṛika vandu woose na vakava kwi vailashike mirima yawo.

³¹Mfulya andeeṛia nkonu ashaa nato aumisie va isanga na usumani. Na uumisio lu kalurambikia nseṛo ulya andenduta kwa vafu kanrambuya vandu woose vautiewo inkusura.

³²Kyasia ili vandeita mboni ta iṛuka lya vafu, vengi vakamweetia. Vengi vakanumbua: Tikwaranyaa mboni yo nkonu ungi.

³³Nae Paulo kakwimboo kalakana nawo.

³⁴Na womi kiindi vakakuwara nae vakakusura. Kari ka iwo eeifoo nndu wa kikwena kinini kya kiduru kya Aresi yye Dionisio na nka umwi irina lyamwi nDamari na vandu vengi andu emwi nawo.