Read MMA SHIYYA Mitanie ya varumi 20 Bible Online

Mitanie ya varumi 20 - MMA SHIYYA bible

Mitanie ya varumi 20

¹Ili kitari kilya kindewolia, Paulo kavaanga vanalosho kavaikimba kalakana nawo. Numa kakwimboo aende Makedonia.

²Neeli andemaa iira taari tilya na iwiiṛia vakristo va kulya muu na firero fiingi kafika Ugiriki.

³Ili andemaa ikaa ifo miiri iraru Vayuda vakalliya kyama, ili eeriee yenda Siria kwa shia ya nruva. Kyasia kauya kasoṛa shia ilya ya iira Makedonia.

⁴Na vandu valya vandemwimia kyaaṛoń kyo kumande Asia ni: Sopateri mwana wa Puro wa Beroya, na Aristariko na Sekundo vandu va Tesalonike, na Gayo nndu wa Deribe, na Timoteo na Tikiko na Tirofimo vakee va Asia.

⁵Vandu wo veemiiraa mbele vakandetiverea ifo Tiroa.

⁶Neese tikaimboo̱ kyaaṛo kya nruveń numa ya kisuku kya Pasaka tikauka Filipi. Tikavakooya Tiroa kyaaṛo kya mikonu iraanu tikakaa-fo mikonu mfungare.

⁷Na nkonu wa mbele usoṛie nkonu wa Sabato ili tikusandie tiifukyaa nkate Paulo kavaongoya sheeli aimboo kyaaṛo ili lya ngama. Kaengeṛia irera kumande isomukoń lya kari.

⁸Tiifoo na taa shiingi ifo kai kalya tiikusandiee.

⁹Nseṛo umwi nkoo irina lyamwi Eutiko eekee rembo idirisheń karoywa nruo nnu, fulya Paulo andeomuya nnu irera, kawa auka kai ka kararu kaimbolo ammaa ifwa.

¹⁰Paulo kaoloka kallaya kankwiṛinia kanumbua: Manya mutataṛaake, amu muu wamwi wifo kari kamwi.

¹¹Karwa lingi kai kafukya nkate kalya kaengeṛia irera nawo kumande ngama kio, Uyo aende.

¹²Vakannde nseṛo ulya nkoo akee na muu vakauywa mmuu kinini nnu.

¹³Kake ise tikaira mbele yenda ngalaveń tikaenda kumande Aso. Neese tiikundiee iimboo Paulo ifo, amu nkuro eevvavasaa, fulya ye muni eemmaa ifukya sheeli aendaa na marende.

¹⁴Neeli andetikooya ifo Aso tikansaamisa ngalaveń. Numa tikafika Mitilene.

¹⁵Tikauka ifo, na nkonu wa kavili tikafika andu akee mbaai na Kio. Nkonu wa kararu tikafika Samo na nkonu wa kaani tikafika Mileto.

¹⁶Amu Paulo eenrekiaa sheeli airaaa Efeso akee ngalaveń, amu atasinde ifo Asia. Amu eeworee uvini eefuriee ifika Yerusalemu nkonu wa Pentekoste kwakooya kivaa.

¹⁷Ifo Mileto Paulo karuma vandu vaende Efeso kavaanga vasuṛi va siṛi ilya.

¹⁸Neeli vandefika kwamwi kavaia: Ini mwishi mu veni weendo lwakwa nndekuwara nalo kyeeri kyoose niikee kwanu kuuka nkonu ulya nndefika Asia

¹⁹niiṛundiaa Nndumi na ikunyiisa lyoose na masoru na maelelio andeshishea a mitambwe ya Vayuda valya.

²⁰Na lingi mwishi sheeli nta nndemufisa kirero kimwi kya imwelekia ndi. Kake nndemworusa na imulosha na baa na ifo numba ta vandu.

²¹Nnderambuya Vayuda na Vagiriki vaaṛukie Iṛuva na ikusura Nndumi weru Yesu Kristo.

²²Kyasia alli lleń nkee iwara shia neende Yerusalemu nammaa ifingwa nrimiń ntamanye kindo kindeshikooyaa,

²³kita Mumuyo Nsongori akee ishirambuya muṛi kwa muṛi eenumbuaa: Fifingio na ngyukiva fishiveree.

²⁴Kake ifi fishieṛeesie ndi. Na akwaa mmuu wakwa nkindo kya uuru kwakwa ndi. Kindo llangie ni imarisia weendo lwakwa na miṛundie ilya nndeniingio̱ ni Nndumi Yesu ya irambua mboni shisha ya uwoo lwa Iṛuva.

²⁵Na alli lleń niń niishi sheeli ini moose nndemukwanisia umangi lwa Iṛuva niiendaa ifo na ifo mukishiloliaa lingi kisangu ndi.

²⁶Kwa ikyo namurambuya ini mu woose nkonu uu wa nnu, sheeli kwakooya umwi wanu na kava i atuṛaa ikiṛwa lyamwi nkonu ulya wa uumisio, niń noore ilomi kwamwi ndi.

²⁷Amu nalea imukwanisia mifurie yoose ya Iṛuva ndi.

²⁸Kuringeńń mu veni na shoo yoose, amu Mumuyo Nsongori amurambikia mwisalalie, mumakii itumbana siṛi ya Iṛuva andeiuṛa na usao lwamwi weni.

²⁹Niń niishi sheeli nammaa yenda sui shivave tishaa kwanu titaliliaa shoo ii.

³⁰Lingi kari kanu mu veni vakwimboo-fo vandu veereraa fikasha vaomue vanalosho vavasoṛe wo.

³¹Kwa ikyo kaań kya umbuura mwikumbuaa sheeli myaka iraru kio na nsanyiń nare ntaikimba nndu woose wanu na masoru ndi.

³²Kyasia alli namurambikiań Iṛuva mukukaarise na kirero kyo kya ililia lyamwi. Ye amakii imusongovisa na imuniinga diṅu andu emwi na valya woose vamiiliswa.

³³Nndelanga fesa ana saabu ana nta isaṛa lya nndu ndi.

³⁴Ini mu veni mwishi sheeli maako va akwa wwo andeshiṛundia kilya kishifile andu emwi na vaaroe vakwa.

³⁵Niń nndemworusa foose sheeli kyatiwara ikwataria mashoṛa kuro da, amu timakii yelekia vatanyari tiikumbuaa firero filya fa Nndumi Yesu andefirera ye muni: Llyo ṅwana iniinga kita iwaria,

³⁶Ammaa irera ifi kafwiṛia nri si katereva andu emwi nawo woose.

³⁷Woose vakaiya nnu vakakulingilia Paulo sungoń vakamwonga mimo

³⁸veenaṛiaa nnu kiimba kya kirero kilya arera sheeli vatakilloliaa lingi kisangu. Vakandaṛata kumande ngalaveń.