Read MMA SHIYYA Mitanie ya varumi 21 Bible Online

Mitanie ya varumi 21 - MMA SHIYYA bible

Mitanie ya varumi 21

¹Neeli tindelakana nawo tikaaṛukia ngalaveń tikafika Kosi na ngalava yo. Na nkonu wa kavili wayo tikafika Rodo na yuka ifo tikafika Patara.

²Tikakooya-fo ngalava ikee iṛuka kumande Foinike tikaaṛukia tikaenda.

³Neeli tindelolia uruka lwa Kipiro tikalutia uko umuso. Tikaengeṛia yenda kumande Siria tikaolokia ngalaveń ifo Tiro. Amu ifo mfo ngalava ilya yeru indeolotia fiya fayo.

⁴Neeli tindelolia vanalosho tikakaa-fo mikonu mfungare. Nawo vakaia Paulo kwa finya ya Mumuyo: Manya kutasaame kwende Yerusalemu.

⁵Tikamaa mikonu ilya tikakwimboo tikaenda na vandu woose andu emwi na vaka vawo na vana vawo vakatiṛaṛata kumande wooṛo ya muṛi. Tikafwiṛia nri si mbaai ya nruva tikatereva.

⁶Neeli tindelakana tikaaṛukia ngalaveń, nawo vakauya kyeń.

⁷Tikamarisia kyaaṛo kyeru kuuka Tiro tikafika Pitolemai. Tikaisana vanavamae veru tikakaa kwawo nkonu umwi.

⁸Ngama yayo tikakwimboo tikafika Kaisaria. Tikaaka numba kwa Filipo mukwanisa mboni shisha ya ifura eekee umwi wa valya mfungare tikakaa kwamwi.

⁹Nndu to eeworee vana va kika vaani, nawo veekee filana veekee vaauya.

¹⁰Neeli tindekaa ifo mikonu kiindi, mwauya fisuku umwi irina lyamwi ni Agabo kainama auka Yudaya.

¹¹Katifikia kawara kitati kya Paulo kakwavika nakyo marende na maako. Kanumbua: Mumuyo Nsongori anumbua kuri: Kuro mfo Vayuda va Yerusalemu vafingaa nndu wa kitati ki. Nawo vanrambikiaa maakoń a vayavaṛumu.

¹²Kyasia ili tindeita ifi ise na vandu va andu alya tikantereva, amu atarwe Yerusalemu.

¹³Llyo Paulo aaṛua: Mutanaa ki mwiyaa na ishifukya nrima? Amu niń nta ni ifingwa da ndi, nkudeeṛie na akwaa ni iwaywa Yerusalemu kiimba kya irina lya Nndumi Yesu.

¹⁴Neeli andelea itiita tikasia do tiinumbuaa: Kive kasa Nndumi afurie.

¹⁵Numa ya mikonu ilya tikaimboo fiya feru tikarwa na Yerusalemu.

¹⁶Tikaimio̱ vvanalosho kiindi va Kaisaria, nawo vakanrwaa kwa Nnason akee nndu wa kulya Kipiro. Nae mmwanalosho wa mbele, nae yye ulya tindekaa kwamwi.

¹⁷Ili tindefika Yerusalemu vanavamae va kulya vakatiwaria na ifura.

¹⁸Na ili lya ngama Paulo kaira na kwa Yakobo andu emwi neese, na vasuṛi woose vakakusandia-fo.

¹⁹Ammaa ivaisana kavaongoya findo foose kimwi kimwi Iṛuva andeṛunda kari ka vayavaṛumu kwa uṛundi lwamwi.

²⁰Vamiita ifi foose vakaitikisa Iṛuva vakamwia: Mwanamae weru, kulolie sheeli Vayuda valya vakusurie vakee fiku fiingi, nawo vawore wiiṛi nnu lwa ikabania uvavaso lwa Mose.

²¹Nawo veemiiywaa mboni tafo sheeli kukee ilosha Vayuda woose vakee kari ka vayavaṛumu itia Mose kwivaiaa vatarine vana vawo ana vatasoṛe miṛuumwa ii.

²²Titanaań are? Amu vaitaa woose sheeli kwansha.

²³Kyasia ṛunda kirero ki tikee ikuia: Kunu kweru veefo vaseṛo vaani vafingio̱ nkyaasa varekie Iṛuva.

²⁴Kurike vandu wo kukwilise andu emwi nawo na ivataya, amu vaute mirwe yawo. Llyo vandu woose vamanyaa sheeli mboni tilya vandeiywa tafo nkindo ndi, kake iwe ku muni kukee yenda kisha na iwara uvavaso lu.

²⁵Na kya mboni ta vayavaṛumu valya vandekusura teentisiṛiaa na iniingia uumisio lweru sheeli wo vakuringe mirima yawo na findo faniingio̱ fa irasia vaṛumu na usao na kindo kyatumulwa na waaisi.

²⁶Llyo Paulo akurika vaseṛo valya, na ili lya ngama kakwilisa andu emwi nawo. Kaaka numba ya Iṛuva eekwanisaa mboni yaa-wutia mikonu ya iiliswa na akwaa ni nsimbika uniingio̱ kiimba kya nndu woose umwi wawo.

²⁷Kyasia mikonu ilya mfungare ili ikee kufui yawutio̱ Vayuda valya veeukiee Asia vakalolia Paulo kulya numba ya Iṛuva vakaaya vandu woose. Vakawwara vakaṛoṛongya veereraa:

²⁸Muṛe womi va Isiraeli teelekień! Uu yye nndu ulya aloshaa vandu woose kundo koose na ifuluta uṛiti lweru na mavavaso na andu a asongori. Na lingi kilanya ya ifi amaata Vagiriki numbeń ya Iṛuva kannde ukasha ia andu asongori.

²⁹Mfulya veeloliaa Tirofimo wa kulya Efeso andu emwi nae ifo muṛiń vakakusaṛa sheeli mPaulo amwata numba ya Iṛuva.

³⁰Muṛi woose ukataṛakaniswa. Vandu vakakwania ree ree vakawara Paulo vakansuṛua vakamwuta io numba ya Iṛuva. Na myaango ikaraywa ilyo yeni.

³¹Neeli veeṛuyaa mwaanya wa iwwaa mboni ikafikia nshili nnini wa mbumbu ya vasikari, sheeli muṛi woose wa Yerusalemu wawa ifulufulu.

³²Lia eni kakurika vasikari na vashili vawo kainama ree. Neeli vandelolia nshili ulya nnini na vasikari vakatia-wo ikaba Paulo.

³³Numa nshili nnini kaserikia kawwara kavavasa avikwa na mise ivili. Kauṛa: Ni i uu? Lingi: Antana ki?

³⁴Vengi kari ka isyamu vakarera kuri na vengi kuri. Kyasia ili andelolia sheeli atakee ikooya udede lwa mboni kiimba kya fiṛoṛongyo filya, kaniingia ivavaso arawa muṛiń wa vasikari.

³⁵Neeli andefika kitaṛikoń kakurikwa vvasikari vanringe iraanga lya vandu.

³⁶Amu kinga kya vandu veengi nnu vansoṛa veeroṛo-ngyaa veenumbuaa: Uta nndu uu!

³⁷Nae Paulo ili eeatwaa muṛiń kaia nnini wa vasikari: Noore muumu nkuie kirero? Nae kanumbua: A kwishi kigiriki?

³⁸Iwe ni iwe mMisiri ulya se andeaya mikonu ii vandu valya fiku fiini vandevaangwa vawaa kavakurika ṅṅaloń?

³⁹Paulo kanumbua: Niń nkee nndu Muyuda nuukie Tariso muṛi wa Kilikia, nkee muni kivasha muṛiń ulya utakee ntanyari. Nakutereva shiniinga muumu nrere na vandu va.

⁴⁰Kyasia ili andenniinga muumu Paulo kasalala kitaṛikoń katukia vandu valya uko. Neeli vandesia do karera nawo kwa mirerie ya kiebrania eereraa: