Read MMA SHIYYA Mitanie ya varumi 22 Bible Online

Mitanie ya varumi 22 - MMA SHIYYA bible

Mitanie ya varumi 22

¹Muṛe womi mukee vanavamae vakwa na vaande vakwa shaaranyiń nrere kyakwa alli ia mbele yanu.

²Ili vandeita eereraa nawo kwa mirerie ya kiebrania vakaengeṛia isia do. Nae kanumbua:

³Niń nkee nndu wa kiyuda, nairiwa Tariso muṛi wa Kilikia. Kake itirishwa natirishio̱ muṛiń uu. Naloshwa uvavaso lwa vaande yeru na usongovisi niiloshwaa ni nsuṛi ulya Gamalieli. Nava nndu mukabania Iṛuva sheeli neeni moose mukee kuri alli.

⁴Natuṛua vandu va shia ii shiya kumande ivawaa. Navafinga navarwaa kifingioń womi na vaka.

⁵Sheeli nkoani nnini amakii irambua andu emwi na vasuṛi va fikwena woose deń. Amu wwo vandeshiniinga barua niirwaye vandu veru neende nayo Damasiko, amu ninnde valya vakee ifo vaende Yerusalemu vakee vafinge, amu vasheumisio̱.

⁶Ili niikikee shień kufui mfike Damasiko kyeeri kya nsanyiń kwibari langa nini ikauka iṛuvewu ikashimulikia taari toose.

⁷Nawa si naita ununga lwishiaa: Saulo uu, Saulo uu, nkiki ili kukee ishituṛua?

⁸Nań naaṛua: Iwe ni iwe i Nndumi? Kashia: Niń nkee Yesu wa Nasareti uu iwe kukee intuṛua.

⁹Na valya variani nań valolia langa ilya, kake wo vandeita ununga lwa ulya anderera nań ndi.

¹⁰Nanumbua: Nndumi, nkiki kyashiwara ntane? Nndumi kashiia: Kwimboo kwende Damasiko, neefo kuio̱o̱ mboni ta findo foose favvavaswa kufitani.

¹¹Na ili nteekiloliee kiimba kya langa ilya nini nawarwa maako vvalya niirianii nawo nafika Damasiko.

¹²Kyasia kulya eeifoo nndu umwi irina lyamwi ni Anania eekee mwindia mavavaso woose kisha, eeishiwaa kinuru vVayuda woose veekee ifo.

¹³Ye kashishea kasalala kufui nań kashiia: Mwanama Saulo lolia! Lia eni namwimboyo miso akwa.

¹⁴Kanumbua: Iṛuva wa vaande yeru ankusaua iwe kukooye imanya lya mifurie yamwi na ilolia ulya awore usumani na iita ununga luukaa kaniń kamwi muni.

¹⁵Amu kuvaa nrambua wamwi kari ka vandu woose wa irambua mboni tilya kwamiita na ilolia.

¹⁶Kyasia alli kuverień ki? Kwimboo kubatiswa kusangywa mareko afo kwisendaa irina lyamwi.

¹⁷Neeli nndemaa yuya Yerusalemu niiterevaa numbeń ya Iṛuva, nakooya nkee kari ka Mumuyo.

¹⁸Nallolia (Yesu) kashiia: Uka kunu Yerusalemu ree, ana nta vairikiaa irambua lyafo lya mboni takwa ndi.

¹⁹Nań nanumbua: Nndumi, wo veni veeshi sheeli niń niikee mufinga valya vakukusurie na ivakaba ifo numba tawo ta iterevia.

²⁰Na usao lwa Stefano nrambua wafo lia lwiritwa, niń shi muni niiselelee io kufui niirikiaa awalwa niiringaa miseto ya valya vawwaa.

²¹Nae kashiia: Kwendie da, amu niń nkurumaa kwende kwaasha kwa vayavaṛumu.

²²Vakamwaranya kumande kirero kyo vakarosa ngyununga tawo veenumbuaa: Uta uu isangeń, amu kisumani akaa na muu ndi.

²³Ili veeṛoṛongyaa na ikumbakumba miseto yawo na ifwala funga na ule ringewu,

²⁴nshili ulya nnini kavavasa anndwa na kunu muṛiń eenumbuaa auṛwa mboni tamwi eekabwaa, amu amanye kiimba kya indoṛongia mikae ii.

²⁵Neeli vandemaa imfinga na nruu Paulo kaia nshili umwi wa vasikari akee kufui: Naare? Nkisumani ini ikaba nndu akee Nrome nae kitaare amaanduywa?

²⁶Ili nshili ulya andeita kuri kaenda kandeongoya nshili ulya nnini eemwiaa: Kurie itana ki? Amu nndu uu ni Nrome.

²⁷Nshili ulya nnini kasha ka-mwuṛa: Shiia kukee Nrome dede? Kanumbua: Ee.

²⁸Nshili nnini kaaṛua: Niń nakooya kimia ki kya Varome kwa fesa shiingi. Paulo kanumbua: Nań nkiwore kuuka iiriwa lyakwa.

²⁹Kyasia valya vee-nkusongosiaa imwuṛa na finya vakakwimboo vakantia-wo. Na nshili ulya nnini nae kaeṛea, ili andemanya sheeli ni Nrome, fulya ee-mmufingaa.

³⁰Ili lya ndesi kafura imanya kisumani nkiteveto ki andeṛiingwa nakyo vVayuda. Kamwoṛomua kavavasa vakohani vanini na vayafikwena woose vakusandie. Kaolota Paulo kanseṛeesa mbele yawo.