Read MMA SHIYYA Mitanie ya varumi 23 Bible Online

Mitanie ya varumi 23 - MMA SHIYYA bible

Mitanie ya varumi 23

¹Paulo kalla vandu valya va kikwena kanumbua: Muṛe womi vanavama, niń kumande nkonu wa nnu nandundia Iṛuva na nrima mweelwa na usha lwakwa liteefo ilomi.

²Nkohani nnini Anania kavavasa valya veeselelee kufui nae vankabe kana kamwi.

³Llyo Paulo amwia: Iṛuva akukabaa iwe usuṛumate waambe mboṛongo (= iwe makavili), kukee rembo ishuumisia kisumani na mavavaso, nawe kwavavasa nkabwa kitasumani na mavavaso?

⁴Valya veeselelee kufui vakanumbua: Naare kukee iruma nkohani nnini wa Iṛuva?

⁵Paulo kanumbua: Nammanya sheeli ni nkohani nnini ndi, vanavama. Amu nkitisiṛe: Manya kutarere nnini wa vandu vafo kikasha.

⁶Neeli Paulo andemanya sheeli kyeenga kimwi kya kikwena ki vVasadukayo na kyeenga kya kavili vVafarisayo karosa ununga lwamwi kikweniń kilya: Vanavama, niń nkee Mfarisayo, nkee na mwana wa Mfarisayo! Niń nkee iṛiingwa kiimba kya ikusurana na iṛuka lya vafu.

⁷Ili andemaa irera ifo likakaa-fo ivingana lya Vafarisayo na Vasadukayo, kikwena kikataṛakana.

⁸Amu Vasadukayo vareraa sheeli liifo iṛuka ana malaika ana Mumuyo ndi. Kake Vafarisayo wo vairikie ifi foose.

⁹Kikava kiṛoṛongyo kinini. Vaaṛia kiindi va taari ya Vafarisayo vakasalala vakarera nnu veenumbuaa: Nta ukasha tilolie lwa nndu uu kitakooye mmumuyo ana mmalaika anrera nae.

¹⁰Neeli mwaandu nnini undekwimboo nshili ulya kaeṛea kundo vasambuasambua Paulo. Kavavasa vasikari vaoloke vamwute maakoń awo na finya vamwate muṛiń.

¹¹Kio kilya Nndumi kasalala kufui nae kanumbua: Va na ngoo shuumu Paulo! Amu sheeli kundeshirambua mboni takwa kunu Yerusalemu, kyakuwara ishirambua kuro kulya Rome nafo.

¹²Ili kundetaṛakana Vayuda vakakusaṅiṛia vakarekiana vakakufisa na kirekio veenumbuaa: Tilyaa ana tinwaa ndi kumande tamaa iwaa Paulo.

¹³Na iwo valiana ikite kuro veekee vandu makumi aani na mmwasi.

¹⁴Nawo vakaenda kwa vakohani vanini na vasuṛi vakanumbua: Tankufinga na ilya ikite manya titakombe nta kindo kumande tiwaa Paulo.

¹⁵Kyasia alli ini andu emwi na vasuṛi va kikwena ień nshili ulya nnini amwolote kwanu kivakani sheeli mufurie imanya mboni tamwi kisha kya mmwasi. Neese tammaa ikudeeṛia deń iwwaa kitaare ammufikia.

¹⁶Mwana wa mfwamae wa Paulo ili andeita kyama kyo kaenda kaira na kulya muṛiń kaongoya Paulo mboni tilya.

¹⁷Paulo kavaanga nshili umwi kamwia: Rwaa nkoo uu kwa nshili nnini, amu awore kirero amwiaa.

¹⁸Kyasia kankurika kanrwaa kwa nshili nnini kamwia: Paulo ulya afingie ashivaanga kafura nkwendie nkoo uu, amu awore kirero kya ikuia vai.

¹⁹Nshili ulya nnini kawwara uko kaenda nae kyaanya kamwuṛa kya kiṛisi: Nkirero ki kufurie ishiia?

²⁰Kamwia: Vayuda vanrekiana ikutereva kwolote Paulo si ndesi kunrwaa mbele ya kikwena kyawo, kive sheeli vafurie imanya mboni tamwi kisumani mmwasi.

²¹Kyasia iwe manya kutairikie! Amu vandu mmwasi wa makumi aani valleye si, vankufinga na ilya ikite vatalye ana inwa kitaare vammuwaa. Nawo alli vakudeeṛie veevereaa kyaasa kyafo.

²²Kyasia nnini ulya kaotoṛa nkoo ulya aende eewavasaa: Manya kutaie nndu na kava i sheeli kwanshiia ifi.

²³Kavaanga vashili vavili kanumbua: Deeṛień vasikari mayana avili vaende Kaisaria na vasikari vakaya farasi makumi mfungare na vasikari va mafumu mayana avili andu a saa isaru ta kio.

²⁴Kavavasa vasongosie na mishungu ya isaamisa Paulo vankurike kibua vamfite kwa Felikisi mwitoṛo wa uruka.

²⁵Katisiṛa barua irerie kuri:

²⁶Niń Kilaudio Lisia nakwisana iwe Felikisi kukee mwitoṛo nnini wa uruka.

²⁷Nndu uu andewarwa vVayuda veekee kufui na iwwaa. Llyo nndeenda na mbumbu ya vasikari namwuta, fulya nndeita sheeli ye ni Nrome.

²⁸Neeli niifuriee imanya kiteveto kya indiinga namwolota si na inrwaa mbele ya kikwena kyawo.

²⁹Nalolia sheeli andeṛiingwa kiimba kya myuṛie ya mavavaso awo. Ana nta andiingwa na kirero kyawara awalwa ana ifingwa ndi.

³⁰Neeli nndeniingwa mboni sheeli wifo ntambwe mwoke vVayuda wa iwwaa nanrika kwafo. Navavasa na iwo vandendiinga varere mboni tamwi mbele yafo. Kaa na kibua.

³¹Kyasia vasikari valya vakakurika Paulo sheeli vandevavaswa vakamfita kumande muṛiń wa Antipatiri na kio.

³²Ili kundekya vakatia vasikari valya vakaya farasi vaende kimwi nae, nawo vengi vakauya muṛiń wawo.

³³Neeli valya vandefika Kaisaria na iniingia mwitoṛo ulya barua ilya vakaseṛeesa na Paulo mbele yamwi.

³⁴Ammaa isoma barua kamwuṛa: Iwe wwa taari ingai? Ili andemanyiswa sheeli ni nndu wa Kilikia,

³⁵kanumbua: Naaranyaa mwaandu wafo ili na valya vandekuṛiinga vashaa. Kavavasa aringwa akaa ifo numba ya witoṛo lwa Herode.