Read MMA SHIYYA Mitanie ya varumi 24 Bible Online

Mitanie ya varumi 24 - MMA SHIYYA bible

Mitanie ya varumi 24

¹Numa ya mikonu iraanu nkohani nnini Anania kainama I ariani na vasuṛi kiindi na nreri umwi irina lyamwi nTeritulo. Nawo vakaongoya mwitoṛo uu mboni ta Paulo.

²Nae ili andevaangwa, Teritulo kabooka indiinga eenumbuaa:

³Kwa finya yafo, nndumi Felikisi, tikooya unambwe nnu na kwa ulla lwafo uṛiti lu lweru lwansongosio̱ findo finuru fiingi. Ifi foose tafiwaria na ikwaana nnu na kundo koose.

⁴Kake amu ntakutuṛue mmwasi nakutereva kutiaranye firero feru faangu na uwoo lwafo.

⁵Amu tallolia nndu uu wwa myaandu kava mubooka ikuria myaandu kari ka Vayuda woose isangeń. Lingi ni nrwe wa kyama kya Vanasareti.

⁶Na lingi andeelelia iniinga numba ya Iṛuva nsindaṛa. Llyo tiwwara tikafura imwumisia kisumani na uvavaso lweru.

⁷Kake nshili nnini Lisia kafika-fo kamwuta maakoń eru na finya.

⁸Kavavasa valya vandendiinga vashe kwafo. Iwe ku muni kwa isokodasokoda kumakii ikooya mboni ta findo filya tikee indiingia.

⁹Vayuda nawo vakakaarisa firero famwi veenumbuaa sheeli nkuro da kikai.

¹⁰Neeli mwitoṛo andentukia uko amu arere, Paulo kaaṛua: Fulya niishi sheeli iwe kukee mfukya fikwena fa uṛiti lu kyeeri kya myaka miingi, nkee ikukabania kyakwa shi muni na nrima wa ifura.

¹¹Amu kumakii imanya sheeli nta yamiira mmwasi wa mikonu ikumi na ivili ninrwa Yerusalemu indetereva Iṛuva ndi.

¹²Vandu va nta vashilolia ifo numba ya Iṛuva niireraa na nndu ana niitanaa kindo kya usanduru ifo isyamuń ana nta ifo numba ta iterevia ana ifo muṛiń ndi.

¹³Ana nta vamakii yawutia findo fo vakee ishiṛiinga nafo alli ndi.

¹⁴Kake kirero ki nkee irambua kwafo na baa sheeli shia ilya vakee ivaanga ya kyama yyo yakwa nkee iṛundia nayo Iṛuva wa vaande yeru niikusuraa filya foose fikee fitisiṛe uvavasoń na ifo fitabuń fa vaauya fisuku.

¹⁵Noore ikusura nkusurie nalyo Iṛuva sheeli livaa iṛuka lya vafu lya valya vasumani na lya valya vatakee vasumani, na akwaa ni iwo nawo valiveree.

¹⁶Nkyo kikangio nakwishivisa vve na nrima utawore ilomi mbele ya Iṛuva na mbele ya vandu mikonu yoose.

¹⁷Numa ya myaka miingi namfika nrwaye vandu va uṛiti lwakwa misimbika na miniingie.

¹⁸Vakashilolia numbeń ya Iṛuva niiatarikaa na findo fi nkee mwilise. Nań niiworee kikwena ana nta kiṛoṛongyo ndi.

¹⁹Kake valya vandeshilolia-fo nkinga kya Vayuda vaukie Asia. Iwo wwo kyeewwaraa vave ia mbele yafo na ishiṛiinga, kwakooya vawore kirero kiimba kyakwa.

²⁰Ana vandu va veni vaiyo varere ukasha vandellolia lia nndesalala ifo kikweniń kyawo,

²¹kitaare nkiimba kya ununga ilu lumwi nndelurera ili nselele karikari kawo na inumbua: Kiimba kya iṛuka lya vafu nkyo nkee yumisio̱ mbele yanu nnu.

²²Kyasia Felikisi kavaverisa, fulya eeishii mboni ya shia ilya kisumani deń kanumbua: Lisia nshili ulya nnini wa vasikari ili ainamaa na kunu mfukyaa firero fanu.

²³Kavavasa nshili umwi sheeli Paulo aringwa. Kake ave na mwaanya, ana ataimi nta umwi wa ndoo tamwi veendundiaa.

²⁴Yamiira mikonu kiindi Felikisi kasha ariani na nka wamwi Durusila akee nka Muyuda. Kavaanga Paulo kamwaranya eereraa kya ikusura Kristo Yesu.

²⁵Neeli Paulo eekee yongoya mboni ta usumani na ta iiwukana na milangie na ta uumisio lushaa, Felikisi kasavaa kanumbua: Alli kukwendie, nań nankooya mwaanya nkuvaangaa lingi.

²⁶Andu emwi na ifo eeveree sheeli aniingwa fesa mPaulo amu amboṛomue. Nkyo kiteveto kawaanga keengi kakaba usaṛe nae.

²⁷Ili indesia myaka ivili Porikio Festo kawaria ushili andu a Felikisi. Na Felikisi eekundiee isenya Vayuda karea Paulo kifingioń.