Read MMA SHIYYA Mitanie ya varumi 25 Bible Online

Mitanie ya varumi 25 - MMA SHIYYA bible

Mitanie ya varumi 25

¹Kyasia ili Festo andemaa iwaria ushili ikaira mikonu iraru karwa Yerusalemu auka Kaisaria.

²Vakohani vanini na vanini va Vayuda vakanshea veeimboo mwaandu wa Paulo vakallembalemba

³vakantereva ikunda lyamwi, naamu avavase anndwa Yerusalemu. Fulya veeriee illaya si shień na iwwaa.

⁴Festo kaaṛua sheeli Paulo akee iringwa kulya Kaisaria, nae muni eemmaa ikusongosia aende ifo.

⁵Kanumbua: Kyasia valya vawore miitoṛio kwanu vainame andu emwi nań vandendiinga, akwaa kiifo kindo kikasha kwa nndu uu.

⁶Ili andemaa mikonu nyaanyi kwawo ana ikumi kainama Kaisaria. Ili lya ngama kakaa rembo kifumbiń kya yanduya kavavasa Paulo anndwa.

⁷Ili andesha, Vayuda valya vandeinama vauka Yerusalemu vakalengetia vakannde ngyuṛiingi shiingi sheemeri kiimba kyamwi vatakee imakii ifisongovisa.

⁸Paulo karera eekukabaniaa: Niń nta kirero nkasheesie kya uvavaso lwa Vayuda ana kya numba ya Iṛuva ana kya Kaisari.

⁹Kake Festo kakunda ikushiisa kwa Vayuda kauṛa Paulo: A le kufurie yenda Yerusalemu, amu kundeumisio̱-fo kisanguń kyakwa kiimba kya mboni ito?

¹⁰Paulo kanumbua: Niń nselele ia mbele ya kifumbi kya uumisio kya Kaisari. Wwo kyashiwara niń nuumisio̱. Noore kindo nrekio̱ kwa Vayuda va sheeli kwishi ndi.

¹¹Kwakooya nanrekio̱ ana nantana kindo kyawara wwalwa, lleye ifwa ndi. Kake kwakooya kirero kyo vandeshiṛiinga nakyo kitakee kya dede, nta eefo amakii ishirwaa maakoń awo, amu avasenye ndi. Mwaandu wakwa urawa kwa Kaisari!

¹²Kyasia ili Festo andemaa irera na vandu va fikwena kaaṛua: Kwankunda mwaandu wafo wende kwa Kaisari, kyasia kwendaa kwa Kaisari.

¹³Ili mikonu myaangu indemaa iira mangi Agiripa na Berenike akee mfwamae vakafika Kaisaria indeisana Festo.

¹⁴Nawo vankaa ifo mikonu kiindi Festo kaongoya mangi mboni ta Paulo kamwia: Ia aiyo nndu atio̱ kifingioń mFelikisi.

¹⁵Neeli niikee Yerusalemu vakohani vanini na vasuṛi va Vayuda vakashoongoya mboni yamwi vakashitereva aumisio̱.

¹⁶Nań navaaṛua sheeli kitaare mmikae ya Varome irambikia nndu na kava i awalwa kitaare nndu to ankwania na vaṛiingi vamwi kisangu kwa kisangu na iniingwa mwaanya wa ikukabania ifo miṛiingień yamwi ndi.

¹⁷Kyasia ili vandekwania ia nta nndesinda ndi. Kake nkonu wa kavili nakaa rembo kifumbiń kya kikwena navavasa nndu to anndwa.

¹⁸Na valya vandendiinga vakasalala, nta vandendiingia kirero kikasha sheeli niikusaṛiee ndi.

¹⁹Kake kiteveto vakandiinga mfindo fa mikusurie yawo wo veni na fa mboni ta nndu umwi avaangwa Yesu, nae eemmaa ifwa, kake Paulo anumbua sheeli akee na muu.

²⁰Nań nava na manunua kasa nduyaa udede lwa mboni ti namwuṛa akwaa afurie yenda Yerusalemu andeanduywa-fo kya mboni ti.

²¹Kake ili Paulo andetiṅwa itio̱ kunu, amu aanduywa nKaisari, navavasa aringwa kumande ninrwaa kwa Kaisari.

²²Agiripa kaia Festo: Nań niifuraa yaranya nndu uu. Kanumbua: Kumwaranyaa ndesi.

²³Kyasia ili lya ndesi Agiripa vakasha na Berenike na utoṛe wiingi vakaira na numba ya kikwena andu emwi na vashili na vasuṛi vanini va muṛi. Festo kavavasa Paulo anndwa.

²⁴Festo kanumbua: Mangi Agiripa neeni mu woose mukee ia andu emwi neese, mulolie nndu uu, kiimba kyamwi ikinga lyoose lya Vayuda kulya Yerusalemu na kunu valangie weelekie veeṛoṛongyaa sheeli kitasumani aengeṛie ikaa na muu.

²⁵Nań ili nndelolia sheeli atantana kirero kyawara awalwa, nae muni ili andefura yanduywa nKaisari, nafukya ninrike kwamwi.

²⁶Nań kari ka mboni yamwi noore kindo kya kifile kya kisiria Nndumi ndi. Nkyo kiteveto namunnde ia mbele yanu, kilanya mbele yafo iwe, mangi Agiripa, amu ili amaa yuṛwauṛwa mboni tamwi nkooye kirero kya itisiṛa.

²⁷Fulya llolie nkirero kitavaa irika mfungwa kitaare kwaorusa miningie ilya aṛiingwa nayo.