Read MMA SHIYYA Mitanie ya varumi 27 Bible Online

Mitanie ya varumi 27 - MMA SHIYYA bible

Mitanie ya varumi 27

¹Kyasia ili kindevavaswa kyaaṛo kyeeni kya yenda Italia vakarambikia Paulo na vafingwa vengi maakoń a nshili umwi irina lyamwi ni Yulio wa kyama kya Kaisari.

²Tikaaṛukia ngalaveń ya Adaramiti yeemmaa ikusongosia yende kumande miṛiń ya mbaai ya Asia. Tikakwimboo, na Aristariko wa Tesalonike kulya Makedonia kalungana neese.

³Ili lya ndesi tikafika Sidon. Yulio kaawutia Paulo kisha nnu kanniinga muumu aende kwa ndoo tamwi amu vamulle.

⁴Ili tindeuka ifo tikaira kwa itate ya Kipiro, amu tiiwuke mburaato ikee ituuka na mbele yeru.

⁵Ili tindeira nruveń ya taari ya Kilikia na Pamfilia tikafika Mira muṛi wa Likia.

⁶Na ifo nshili ulya kakooya-fo ngalava yukie Alekisanderia, nayo iiriee kyaaṛo yende Italia, katisaamisa-fo.

⁷Tikaenda kyaaṛo kya mbuṅwambuṅwa ikaira mikonu miingi. Tikafika kufui na Kinido kwa ngatara. Na fulya mburaato indetiima toolokiaa-fo tikaira kwa itate ya Kireta tiiraa muṛi wa Salimone.

⁸Tikaira-wo kwa ngatara mbaambaa ya nruva tikafika kundo kuvaangwaa Kyovioń kisha. Na kufui na kulya wifo muṛi uvaangwaa Lasaya.

⁹Mikonu miingi yamiira na kyeeri kyo kyaaṛo kya nruveń kiikee kya kitani nnu, amu mikonu ya ikootoya yeemmaa iira, Paulo kavaikimba.

¹⁰Kavaia: Muṛe womi, llolie sheeli kyaaṛo ki kivaa na kitani na ngatara shiingi nta nkya fiya fa ngalaveń na ngalava sheni da ndi, na akwaa nkya muu weru.

¹¹Kake nshili ulya kairikia nnini wa ngalava kita filya farerwa mPaulo.

¹²Na fulya kundo kulya kutakee iva ikaa kyeeri kya mbioo, kinga kyawo vakanumbua, llyo ṅwana yuka kunu vakwatare vafike Foinika kwakooya kivaa vakaa-fo kyeeri kya mbioo. Nafo nkiimuyoń kya Kireta, nakyo kisikaa mburaato ya taari ya ukwawuń.

¹³Ili mburaato ya itate indebooka ivivita kinnya vakamanya vallolia kilya veekusaṛiee vakabooka kyaaṛo veeitaa ngalava kufui na mbaai ya Kireta.

¹⁴Numa ya kyeeri kyaangu ikasha mburaato nini ya mikae ya uniale, irina lyayo ivaangwaa kiimboo mavia.

¹⁵Ili ngalava indewarwa nta imakii ivingana na mburaato tikaiotoṛa tikakurikwa.

¹⁶Tikakurikwa mmburaato tikafika kufui na kyuruka kinnya kivaangwaa Kilauda. Io tikakuniinga finya deń, amu timakii iimboo-fo kingalava kilya kya mbaai kiseere kinnya da tiilemwaa.

¹⁷Ili vandemaa ikirosa ngalaveń vakaṛunda kya iringa ngalava yawo nini vakaifinga na ngoye shiingi veeitaa ngoye to kwa si yayo. Nawo vakaeṛea kundo ngalava irawaa kumande nruva ya Sirite. Kwa ikyo vakaolota fiya fa yendisa ngalava vakakurikwa kuri.

¹⁸Na kiimba kya mburaato ilya indetilisa ukiva deń ili lya ndesi vakabooka ikumba kyeenga kya fiya fa ngalava nruveń.

¹⁹Nkonu wa kararu vakakumba na fiya fingi na maako awo meni.

²⁰Ili mikonu miingi indesia, saa italolike ana nyinyiri na mburaato itaangue tikauta ba ya ikia.

²¹Nawo ili veenkaa mikonu miingi vatalya shoonga, Paulo kasalala kari kawo kanumbua: Muṛe vaseṛo, kikoo mwasoṛa kirero kyakwa mure mutakwimboo Kireta, mwikooyaa ukiva lu ndi.

²²Na alli nkee imuia kirero: Uywań mmuu, amu kari kanu eefo nta umwi arekaa ndi kita ngalava sheni da.

²³Amu kio ki kya nnu malaika wa Iṛuva to niń nkee wamwi, nae yye nkee indundia andeshishea.

²⁴Kashiia: Manya kuteeṛee Paulo! Kyankuwara kusalale mbele ya Kaisari. Lingi lla te Iṛuva ankuniinga vandu woose variani nawe.

²⁵Kyasia womi, kutomariseń! Amu nkusurie Iṛuva sheeli kivaa kuro da sheeli nndeio̱.

²⁶Kake na tikatana ki toolotwa kyurukeń kimwi.

²⁷Ili kio kya ikumi na kaani kindefika tiirungutwaa ifo na ifo kari ka nruva ya Adiria, kio kya masomukoń vakurika ngalava vakakusaṛa vamfika kufui na uruka uumu.

²⁸Ili vandeolota kyelelio vakakooya kifikie makumi avili. Ili vandeenda kinnya vakaolota kyelilio lingi vakakooya kifikie ikumi na firaanu.

²⁹Vakaeṛea kundo tituulwaa kundo kuwore mbamba vakaolota fiirisha ngalava fiini fa numa vakavera nnu kukye.

³⁰Na vakurika ngalava veeriee irisha na itia-fo ngalava. Vakaolota kingalava kilya nruveń veevakanaa sheeli vakee yolota na fiirisha ngalava fa mbele.

³¹Paulo kaia nshili ulya na vasikari: Kwakooya iva vatakaa kunu ngalaveń nta mukiaa ndi.

³²Kyasia vasikari vakaminya nruu ta kingalava vakakiotoṛa kikawa nruveń.

³³Ili kundekya Paulo kavalembalemba woose valye shoonga eenumbuaa: Nnu ni nkonu wa ikumi na kaani mwiveraa na ikootoya mutalya shoonga.

³⁴Kyasia namulembalemba mulye shoonga, amu Uyo livaa ikia lyanu. Amu nta ifuli lya nrwe lya umwi wanu lirekaa.

³⁵Neeli andemaa irera kuro kaimboo nkate kaana Iṛuva mbele yawo woose kaufukya kabooka ilya.

³⁶Woose vakauywa mmuu vakalya shoonga veni.

³⁷Neese toose tiikee ngalaveń tikee vandu mayana avili na makumi mfungare na varindaru.

³⁸Ili vandemaa iwuura vakaangusa ngalava vaeeṛaa ngano ifo nruveń.

³⁹Ili kundekya nta vamanya uruka lua ndi, kake valolia andu mwaanya wa iṛuka ukai. Vakareriana iita ngalava io akwaa kivaa.

⁴⁰Vakaminya ngoye ta fiirisha ngalava vakatirea nruveń. Vakarosa itanga lia innya na iliaṛuya taari ya mburaato vakasumanisa ngalava na mwaanya ulya.

⁴¹Kake kitaare ngalava indefika mbaai ikakooya andu a misanga isikie mmura ikakutotia-wo kwaasha. Ifo mbele ngalava ikawarwa tabu mmisanga nta isenika, kake ifo numa ikafukywafukywa ni ikoola lya nruva.

⁴²Kikwena kya vasikari ni iwaa mifungwa, amu vatakweeṛe nruveń varishe.

⁴³Kake nshili ulya ili eekundiee ikiṛa Paulo kavaima veetanaa sheeli veemaaliaa. Kavavasa valya veeshi iira kwa ule ya mura vakweeṛe nruveń vaaṛukie urukeń.

⁴⁴Na iva vasaa vakukiṛe veekuwaraa na mbau ana findo fingi fa ngalava. Na kuro vandu woose vakafikia uruka na kibua.