Read MMA SHIYYA Mitanie ya varumi 28 Bible Online

Mitanie ya varumi 28 - MMA SHIYYA bible

Mitanie ya varumi 28

¹Ili findemaa ikia Uyo timanya sheeli kisanga kilya kivaangwaa Melita.

²Veni uruka lu vakatitania finuru fitavaa isenda. Amu vaata muro vakatiwaria ti woose kiimba kya fua na mbioo.

³Ili Paulo andeenda isana iṛio lya ngwi na itirwaa muroń, shoka ikasomuka-fo kiimba kya muro ulya ikankwiṛinia ukoń.

⁴Ili veni uruka vandelolia shoka ilya iikusheluasheluaa ukoń vakakurera: Kikafura nndu uu ni wwaa vandu. Amu lla kasa andekia nruveń, udede lua lusumani na muwaa lukee imwotoṛa akaa na muu ndi.

⁵Kake ye kaitukia kulya muroń atakooye kitani.

⁶Wo vakakusaṛa sheeli afumbaa ana afwe kwa tiń. Neeli vandemaa imulla nnu na ilolia sheeli nta kitani akooya, vakailasha firero fawo vakanumbua: Uu ni Iṛuva.

⁷Kufui na andu alya kiiyoo kivasha kya nnini wa kyuruka kilya, irina lyamwi ni Pubilio. Nndu uu katiwaria na nrima wa undoo katiaṛua veeni vamwi andu a mikonu iraru.

⁸Na ndee wa Pubilio eelolee iseṅu na nsoru. Paulo kaaka numba kwamwi kanterevia kwa Iṛuva kamwekeṛia maako kankiṛa.

⁹Ili ifo findemaa iva na vengi veelolee kulya kyurukeń kilya vakasha vakakiṛwa.

¹⁰Nawo vakatiindia kwa windi wiingi. Neese ili tindeaṛukia ngalaveń vakatisaamisia na findo filya fititinye.

¹¹Ili indesia miiri iraru tikaenda kyaaṛo na ngalava yukie Alekisanderia. Nayo iikee alya kyurukeń kilya kyeeri kya mbioo. Na myorusie yayo mfwana ya yaasa.

¹²Tikafika Sirakusa tikakaa-fo mikonu iraru.

¹³Kuuka ifo tikalengetia tikafika Regio. Numa ya nkonu umwi mburaato ya itate ikavivita na nkonu wa kavili tikafika Puteoli.

¹⁴Ifo tikakooya-fo vanavamae vakatilembalemba tikaa nawo mikonu mfungare. Na kuro llyo tifika Rome.

¹⁵Ili vanavamae veefo kulya vandeita mboni teru vakasha ikwania neese singiṛeń ya Apio na kundo kuvaangwaa Trestaberne. Ili Paulo andevalolia kaana Iṛuva kawiiṛio̱ muu.

¹⁶Ili tindefika Rome nshili ulya karambikia vafinge maakoń a nshili wa varingi va Kaisari. Kake Paulo kaniingwa muumu wa ikaa kyaanya ye muni andu emwi na nsikari ulya eenringiee.

¹⁷Kyasia yamiira mikonu iraru Paulo kavaanga vanini va Vayuda vashe ikusandioń. Nawo ili vandemaa isha kavaia: Muṛe womi na vamwanama, na akwaa kitaare nndetana kikasha kya isulwa vvandu veru ana kirero kya ivingana na mikae ya vakuuku veru, nnderambikio̱ maakoń a Varome nava mfinge kuuka Yerusalemu.

¹⁸Nawo ili vandemaa ishiuṛauṛa vakafura ishiawua, amu kiifo kiteveto kwakwa kyeewaraa wwalwa ndi.

¹⁹Kake ili Vayuda vanderera nnu ifo mwaanduń ulya kikashiwara naaṛuye kikwena ki kwa Kaisari. Ana nta niikai niiworee kya kirero kya iṛiinga vandu va uruka lwakwa ndi.

²⁰Kiimba kya ikyo nkyo namuvaangia musheshilla na irera nań. Amu namfingwa na nse uu kiimba kya ikusura lya Isiraeli.

²¹Nawo vakamwia: Nta ise tankooya barua yoore mboni tafo yuka Yudaya ndi. Ana nta eefo mwanamae weru umwi anshe na itiongoya mboni ana irera kirero kyafo kikasha ndi.

²²Kake tifurie iita kwafo kilya kulolie iwe. Amu kari ka mboni ta siṛi iyo yammanyika sheeli ikee irerwa kikasha andu woose.

²³Ili vandemaa irekiana nae nkonu vakanshea numbeń ilya eekaii vandu veengi. Kavaongoya kwa walio na irambua umangi lwa Iṛuva eevaikimbaa mboni ta Yesu na firero fa uvavaso lwa Mose na fa vaauya kuuka ngama kumande ukwa-wuń.

²⁴Vengi vakakusura filya findererwa na vengi vakalea ifikusura.

²⁵Neeli vandelemana ikwirikiana wo veni na veni vakataṛa-kana, ili Paulo andemaa irera kirero ki kimwi sheeli: Mumuyo Nsongori arera kisha na vaande yanu kwa kana ka mwauya Yesaya eenumbuaa:

²⁶”Enda kwa vandu va kuvaie: Iita mwitaa, kake mumanyaa ndi. Na illa mullaa, kake muloliaa ndi.

²⁷Amu ngoo ta vandu va tanriṅana na marwi awo mmemeri iita na miso awo vammaa iraya, kaaṛa vatalolie na miso awo ana iita na marwi awo ana imanya misendie na ngoo tawo na iilasha makusaṛo awo wakiṛe.“

²⁸Kyasia iki kimanyike kwanu sheeli ikiṛwa li lya Iṛuva lyanrikwa kwa vayavaṛumu, nawo valiaranyaa.

²⁹Ili andemaa irera ifo Vayuda vakaenda veeuṛanaa fiingi wo veni na veni.

³⁰Paulo kakaa kiṛengo kya myaka ivili iishule numba yo yamwi eekaii kawaria vandu woose valya veekee inshea

³¹eekwanisaa mboni ta umangi lwa Iṛuva na ilosha mboni ta Nndumi Yesu Kristo kwa utomari wiingi ataimwa ni nndu.