Read MMA SHIYYA Mitanie ya varumi 3 Bible Online

Mitanie ya varumi 3 - MMA SHIYYA bible

Mitanie ya varumi 3

¹Kyasia Petiro na Yohane vakarwa andu emwi vaende numba ya Iṛuva kyeeri kya saa kyeenda indetereva.

²Na ifo eeifoo nndu umwi akee kitoṛokombo kuuka ndewuń ya mae. Nae eekurikwaa wandu mikonu yoose vakanrwaa mwaangoń wa numba ya Iṛuva uvaangwaa nnuru, amu aeṛeṛie vandu valya vakee yaka numba ya Iṛuva findo fa illilia.

³Ili nndu uu andelolia Petiro na Yohane veeakaa kavatereva kindo kya imwelekia.

⁴Petiro kamulla koroo andu amwi na Yohane kamwia: Tille ise!

⁵Kavalla eekusuraa aniingwaa kindo wwo.

⁶Petiro kanumba: Niń noore fesa ana nta saabu ndi. Kake kilya wwore nkyo nkuniingaa. Kwa irina lya Yesu Kristo wa Nasareti salala kuṛue!

⁷Kawwara uko usha kanseṛeesa. Lia eni mbayo tamwi na meengo a marende amwi fikaniingwa finya.

⁸Kakwimboo byań kasalala kabooka yenda. Kaaka numba ya Iṛuva andu emwi nawo eeṛuaa kakiliakilia na iitikisa Iṛuva.

⁹Vandu woose vakallolia eeṛuaa na iitikisa Iṛuva.

¹⁰Vakammanya sheeli yye ulya eekaa rembo na itereva findo fa imwelekia alya mwaangoń ulya nnuru wa numba ya Iṛuva. Vakataṛaaka vakaṛiikia findo fo favvia.

¹¹Kyasia ili eekuworee na Petiro na Yohane, vandu woose vakakwitiṛimio̱ ree kiṛiń kiivaangwaa kya Salomon veeṛiikaa kutu.

¹²Ili Petiro andelolia kaia vandu valya: Muṛe womi va Isiraeli, ifi famuṛiikisa are? Ana nkiki ili mukee itilla kuri sheeli ni ise takangia nndu uu na finya teru kaenda ana nkwa usumani lweru?

¹³Ni Iṛuva wa Abraamu akee na wa Isaki na wa Yakobo na wa vaande yeru andeṅinisa Mwanamwi Yesu, ulya ini mundenrambikia na inkana mbele ya Pilato lia andenumbua aotoṛwa.

¹⁴Neeni mundekana ulya akee Nsongori akee na usumani mukafura yotoṛio̱ muwaa.

¹⁵Kake ulya akee mangi ya muu mukawwaa. Na Iṛuva kanduta kwa vafu. Neese tikee varambua vamwi.

¹⁶Neeli nndu uu akusurie irina lyamwi, irina lyamwi Uyo lyanniinga uu mullolie na immanya finya. Na ikusura lyamwi alliniingwa ni Yesu Uyo ly ammuniinga ishia li mulolie ini mu woose.

¹⁷Kyasia vanavama, niishi sheeli mundetana ifi kwa ituṛa imanya, sheeli na vanini vanu vandetana.

¹⁸Kake yyo shia Iṛuva andeawutia nayo filya andefikwanisa mbele kwa kana ka vaauya fisuku woose kya matuṛulwa a Kristo wamwi.

¹⁹Alli kurreń na iilashika mirima yanu, amu fikasha fanu fuutwa fimuuke!

²⁰Llyo mikonu imufikiaa ya iwiiṛio̱ muu yukie kwa Nndumi. Nae amurumie Kristo ulya andekwaniswa kwanu kuuka mbele yye Yesu.

²¹Nae kyawara awario̱ iṛuvewu kumande kishaa kyeeri findo foose fiwiiṛio̱o̱ wiya. Amu Iṛuva eenreraa kuuka mbele kwa kana ka vaauya fisuku vamwi.

²²Fulya Mose arera sheeli: ”Nndumi Iṛuva weru amwimboyoo mwauya fisuku aukaa kari ka vanavamae vanu avakani shań. Mwaranyiń ye kya filya foose amuongoyaa.

²³Na nndu woose ataaranyaa mwauya uu amamisio̱o̱ na ilakaniswa na vandu vamwi“.

²⁴Na vaauya fisuku woose kuuka Samweli na valya vandensoṛa woose vandevakana vakakwanisa mboni ta feeri ifi.

²⁵Ini mukee vana va vaauya wo na vana va mma ilya Iṛuva anderekiana na vaande yanu, lia aia Abraamu: ”Ufwariń lwafo mfo amiliaa ulya ngyufari toose ta isangeń tiniingwa mboṛa yye“.

²⁶Ili Iṛuva andemaa iṛuta Mwanamwi Yesu, kanruma kwanu lya mbele, amu amuniinge mboṛa na nndu woose wanu autie-wo iiwukana na fikasha famwi.