Read MMA SHIYYA Mitanie ya varumi 4 Bible Online

Mitanie ya varumi 4 - MMA SHIYYA bible

Mitanie ya varumi 4

¹Neeli veekireraa na vandu valya, vakohani na nshili wa numba ya Iṛuva na Vasadukayo vakavashea.

²Wo vakatuṛuka, fulya vandelosha vandu na ivakwanisia sheeli vafu vaṛukaa, sheeli Yesu aṛuka.

³Vakavawara vakavarwaa kifingioń kumande ngama, fulya kweewaa ukwawuń.

⁴Kake veengi kari ka iwo vaita kirero kyo vakakusura. Na itaala lya vandu va kiwomi likafika sha fiku firaanu.

⁵Neeli lya ngama vanini na vasuṛi na vaaṛia va mitisine vakakusandia Yerusalemu.

⁶Na Ana nkohani nnini nae na Kayafa na Yohane na Alekisanderi nawo woose veekee va ufwari lwa nkohani nnini.

⁷Vakavaseṛeesa karikari vakavauṛa: Nkwa finya ingai ana nkwa irina lya i mwantana ifi ini?

⁸Llyo Petiro eeshua Mumuyo Nsongori kavaia: Muṛe vanini va vandu na vasuṛi va Isiraeli,

⁹kwakooya tauṛwa nnu mboni ya nndu ulya ntanyari sheeli andekiṛwa,

¹⁰manyiń ini mu woose na vandu woose va Isiraeli, sheeli nkwa irina lya Yesu Kristo wa Nasareti ulya ini mundenkabia nsalabeń, na Iṛuva kanduta kwa vafu. Kwa irina lyo nndu uu aselele na finya mbele yanu.

¹¹Ye yye iwe lia lindelewa watana numba, nalyo lyanrawa live iwe inini lya wembe.

¹²Nta eefo ungi ave i annde ikiṛwa ndi. Fulya liteefo irina lingi kwa si ya iṛuvewu likee iniinge vandu lyantiwara ise ikiṛwa llyo.

¹³Kyasia ili vandelolia ukaṛi lwa Petiro na Yohane na ivamanya sheeli vvandu vataare ufundo na waṛia, vakariika, vakavamanya sheeli veekee andu emwi na Yesu.

¹⁴Neeli vandelolia na nndu ulya andekiṛwa asalele andu emwi nawo, vandekiva na kirero kya yaṛua ndi.

¹⁵Vakavavavasa vasomuke numba ya kikwena.

¹⁶Vakakurera veenumbuaa: Titaniaa ki vandu va? Amu kikwaambie kwa vandu woose vakee Yerusalemu, sheeli kiringisio kiremie kyantanwa wwo, ana timakii ikilea ndi.

¹⁷Kake manya kirero ki kitashe ikwana vanduń, tivaeṛeese amu vatakirere lingi na nndu mboni ta irina li na kava i.

¹⁸Vakavavaanga vakavavavasa vatakirere deń ana ilosha na irina lya Yesu.

¹⁹Petiro na Yohane vakavaaṛua vakavaia: Fukyeń ini mu veni kwakooya nkisumani mbele ya Iṛuva imuirikia ini kita Iṛuva.

²⁰Amu ise timakii itia-wo irera filya tindelolia na ifiita ndi. Nawo ili vandemaa ivaeṛeese lingi vakavaboṛomua vatalolia shia ya ivaumisia kiimba kya vandu. Fulya vandu woose veekee iitikisa Iṛuva kya filya feentanikaa.

²²Amu kiṛengo kya nndu ulya andetanio̱ myorusie ii ya ikiṛa kiikiliee myaka makumi aani.

²³Vammaa iboṛomulwa vakaenda kwa vandu vawo vakavaongoya mboni ta findo filya foose vandeio̱ vvakohani vanini na vasuṛi.

²⁴Neeli vandeita, vakarasia Iṛuva ngyununga tawo na nrima umwi veenumbuaa: Wui Nndumi, ni iwe mutana iṛuvewu na isanga na nruva na findo foose fiifo.

²⁵Nawe kwarera kwa Mumuyo Nsongori na kana ka nde yeru Davidi iketi lyafo: ”Naamu ki ili vayavaṛumu vakee iṛoṛongya na ngyuṛiti ta vandu tikakusaṛa mboni titarie ngo?

²⁶Mamangi a isanga avva kimwi na vaitoṛo vakakwimboyo Nndumi na Kristo wamwi“.

²⁷Amu nkya dede Herode na Pontio Pilato andu emwi na vayavaṛumu na vandu va ngyufwari ta Isiraeli vandekusandya muṛiń uu na ikwimboyo ndundi wafo nsongori Yesu kundemwamba mafura,

²⁸amu vatani foose filya maako afo na mifurie yafo yeenkusaṛiaa kuuka mbele faawukie.

²⁹Kyasia alli Nndumi, lla yeṛeese lyawo! Kwelekie vaṛundi vafo irera kirero kyafo na baa koose.

³⁰Saaṛa uko lwafo lukiṛe vandu! Na firingisio na maṛiikiso fitanike kwa irina lya ndundi wafo nsongori Yesu!

³¹Neeli vandemaa itereva Iṛuva, andu alya veekusandiee akareremiswa vakaishuṛwa woose Mumuyo Nsongori vakaongoya kirero kya Iṛuva na baa.

³²Na kinga kya vandu valya veenkusuriee veekee na ngoo imwi na nrima umwi. Ana eefo nta umwi andenumbua sheeli kindo kyoose awore mmasaa amwi muni, kake vandesandia findo foose andu emwi.

³³Na varumi vakarambua iṛuka lya Nndumi Yesu na utomari unini. Nawo woose vakakunda vvandu.

³⁴Ana nta eefo umwi wawo andetuṛa kindo ndi. Fulya vandu valya woose veeworee nrema ana numba vandefikumba vakannde masaa a findo filya vandefikumba

³⁵vakaaniingia varumi. Na nndu woose kaavio̱ sheeli kisumani nae.

³⁶Na Yosefu ulya varumi veewaangaa Barinaba — misendie yayo ni mwana wa ilembalemba — akee wa kwa Levi na kimia kyamwi eekee nndu wa Kipiro.

³⁷Nae eeworee nrema kaikumba kannde masaa kaarambikia maakoń a varumi.