Read MMA SHIYYA Mitanie ya varumi 5 Bible Online

Mitanie ya varumi 5 - MMA SHIYYA bible

Mitanie ya varumi 5

¹Kake eeifoo nndu umwi irina lyamwi eevaangwaa Anania na nka wamwi nSafira. Nndu to kakumba nrema yamwi.

²Kafisa kyeenga kya uuru lwayo kwa kiṛisi, na nka wamwi eeshi. Kannde kyeenga kimwi kyayo karambikia.

³Petiro kamwia: Iwe Anania, naamu ki ili Satana ankukaba nrwe kulembe Mumuyo Nsongori na ifisa kyeenga kya uuru lua lwa nrema yafo kwa kiṛisi?

⁴Ilyo kwikee na nrema ilya nayo ikee masaa afo se? Na akwaa kweemmaa ikumba, masaa wo akee maakoń afo da se? Naare kindevaań kwarwaa kirero ki ngooń yafo? Nta ni nndu kundellemba ndi kita Iṛuva muni.

⁵Neeli Anania andeita firero fi kawa boto kakumba muu. Valya woose vandeita mboni to vakaeṛea nnu.

⁶Vakakwimbo vakoo vakamwiṛina na miseto vakansomuta wooṛo vakandika.

⁷Numa ya kiṛengo kya saa isaru nka wamwi nae kasha ateeshi kilya kyantanika.

⁸Petiro kamwuṛa: Shiia mwakumba kivasha kwa maaru wo? Nae kanumbua: Ee nkwa uuru lo.

⁹Petiro kamwia: Kindeva are mukairikiana muli vavili kwa nrima umwi kumande mwalemba Mumuyo wa Nndumi? Lla te marende a iwo vandefika mmi wafo akee mwaangoń, nawe vakukurikaa wooṛo.

¹⁰Lia eni kawa si marendeń amwi kafwa. Vakoo valya vakaaka vakakooya amfwa. Vakankurika wooṛo vakandika andu emwi na mmi wamwi.

¹¹Weṛei unini lukawara siṛi yoose andu emwi na woose vandeita mboni ti.

¹²Kwa maako a varumi ikatanika myorusie na maṛiikiso meengi vanduń. Na woose vakakusandia ifo kiṛiń kya Salomon vakee na nrima umwi.

¹³Na kari ka vengi woose eefo nta umwi andekaṛia ilungana nawo ndi, fulya vandu vandevaitikisa nnu.

¹⁴Na valya vandekusura Nndumi vakaengeṛia ifumbuka womi na vaka.

¹⁵Neefo shień nini vakannde valole na ivarwaa findoń fa ilaya, amu ili Petiro eeiraa kiṛishwe kyamwi kikamfikia umwi wawo kinkiṛe.

¹⁶Na isyamu lya vandu va miri ilya ilengetie Yerusalemu likakusandia veenndee valole na vakee ituṛulwa mmimuyo mikasha. Na woose vakakiṛwa.

¹⁷Nkohani nnini kakwimboo na woose veekee kimwi nae, iwo wwo veekee va kyama kya Vasadukayo vaṅinio̱ ni iiria iriso.

¹⁸Vakawara varumi vakavarwaa kifingioń.

¹⁹Kake malaika wa Nndumi karua myaango ya kifingio kio kavasomuta kavaia:

²⁰Endeń mundesalala numba ya Iṛuva muie vandu mboni toose ta muu uu.

²¹Nawo ili vandeita vakaenda kulya numba ya Iṛuva isomukoń vakabooka ilosha. Nkohani nnini kasha andu emwi na valya veekee andu emwi nae vakasandia vandu va kikwena na vasuṛi woose va Isiraeli. Vakaruma vandu kifingioń amu vandevannde.

²²Neeli vaṛundi vandefika-fo nta ivalolia ifo kifingioń vakauya vakannde mboni

²³veenumbuaa: Takooya kifingio nkiraye siń na varingi vaselele mwaangoń. Kake ili tarua nta nndu eefo ifo kari.

²⁴Kyasia nshili wa numba ya Iṛuva na vakohani vanini ili vandeita ifi, vakawara manunua kiimba kyawo vakanumbua: Kivaa kirie iki:

²⁵Lia eni nndu umwi kasha kavaongoya mboni sheeli: Vandu valya mundevarwaa kifingioń vakee numbeń ya Iṛuva vaselele veeloshaa vandu.

²⁶Llyo nshili aende andu emwi na vaṛundi vakavannde, kake nkwa finya ndi, amu vaeṛea vandu, kaaṛa vatavaeeṛe mawe.

²⁷Vakavannde vakavarwaa kikweniń. Nkohani nnini kavauṛa

²⁸eenumbuaa: A le tammuvavasa se na imwikimba mutakiloshe mwisendaa irina li? Neeni lleń te mwammaa iishuṛa Yerusalemu miloshie yanu. Neeni mufurie innde usao lwa nndu to kweru.

²⁹Petiro na varumi vengi vakaaṛua vakanumbua: Kyatiwara iirikia Iṛuva kita vandu.

³⁰Iṛuva wa vaande yeru aṛuta Yesu ulya mwankabia nsalabeń mukawwaa.

³¹Nndu to Iṛuva andeṅṅinisa na uko lwamwi usha ave nnini na nkiṛa vandu, aniinge Vaisiraeli iilashika na itio̱ lya mareko.

³²Neese tikee varambua va mboni ti andu emwi na Mumuyo Nsongori ito Iṛuva aniingie valya vankusurie.

³³Nawo ili vandeita kuro kikavakoṛa ngoo tawo vakakusaṛa kya ivawaa.

³⁴Kakwimboo nndu umwi wa Vafarisayo irina lyamwi nGamalieli, akee llosha wa mavavaso, awore nsendo kwa vandu woose. Kasalala kari ka kikwena kavavasa varumi vasomutwa wooṛo kinnya.

³⁵Kavaia: Muṛe womi va Isiraeli, kulleń kasa mutaniaa vandu va.

³⁶Amu mbele ya mikonu ii akwimboo Teuda kakwaṛua sheeli ye ni nndu nnini, na vandu sha mayana aani vakakulunga nae. Neeli andewalwa, valya woose veenkusuriee vakanyanyaka vakamamiswa.

³⁷Numa ya nndu to kakwimboo Yuda ulya Ngalilaya mikonu ilya ya itisiṛwa kyaalo kaomua kinga kya vandu vallatie ye. Na akwaa yye kamamia na valya woose veenkusuriee vakanyanyaka.

³⁸Kyasiań alli namuia: Kusembekeń vandu va, vaotoṛeń vaende. Amu kwakooya mashoṛa a vandu wo aukie na vanduń avaa a ruu.

³⁹Kake kwakooya amilie kwa Iṛuva mumakii yafukya ndi. Kaaṛa mutalolike sheeli mukee ikabana na Iṛuva.

⁴⁰Nawo vakairikia firero fo famwi. Vakavaanga varumi valya vakavakaba. Vakavavavasa manya vatakirere lingi na irina lya Yesu vakavaotoṛa.

⁴¹Nawo vakasomuka kikweniń kilya na ifura, fulya vallolika sheeli vandesisiria isutwa kiimba kya irina lyo.

⁴²Na nkonu woose ifo numba ya Iṛuva na kyeń kwa vandu vandetia-wo ilosha na ikwanisa mboni shinuru ta Yesu sheeli nKristo ndi.