Read MMA SHIYYA Mitanie ya varumi 7 Bible Online

Mitanie ya varumi 7 - MMA SHIYYA bible

Mitanie ya varumi 7

¹Nkohani ulya nnini kanumbua: A le mfo kuro mboni to tikai?

²Nae kanumbua: Muṛe vanavama na vavaava vakwa shaaranyiń! Iṛuva muni unini akworasa vaava weru Abraamu ilyo akee kulya Mesopotamia kitaare eensamiaa Haran.

³Kamwia: Uka urakeń lwafo na ufwariń lwafo kusamie urukeń ilo nkworusaa.

⁴Llyo asama urukeń lua lwa Vakalidayo kakaa Haran. Kauka ifo ndee ammaa ifwa. Iṛuva kansamisa-fo kansamisia uruka lu ini murule alli.

⁵Ana anniinga diṅu kunu nta andu eeṅaniaa uvayo ndi. Kanrekia sheeli anniingaa luve lwa miitoṛio yamwi na lwa ufwari lwamwi lwa numa, nae ataare mwana matika alya.

⁶Iniva karera kuri, sheeli va ufwari lwamwi vavaa veeni urukeń lwa vandu vengi. Nawo vavaaṛuaa vave masinga awo na ivatania fikasha andu a myaka mayana aani.

⁷Na uṛiti lo luvaaṛuaa maketi nniń lluumisiaa, ni Iṛuva arera kuri. Na numa ya ifo vasamaa-fo, nawo vasheshiṛundiaa ia.

⁸Kanniinga mma ya urini. Kyasia Abraamu kaira Isaki kanrina nkonu wa nyaanyi. Isaki kaira Yakobo na Yakobo kaira vasuṛi valya veru valya ikumi na vavili.

⁹Vasuṛi wo veru vakairia Yosefu iriso vakankumba aende Misiri. Iṛuva kava andu emwi nae

¹⁰kamwuta ngatareń tamwi toose kanniinga ikundika na uṛango mbele ya Farao mangi ya Misiri. Nae kamwaṛua nshili wa Misiri na numba yamwi yoose.

¹¹Kyasia soto ikasha urukeń lwa Misiri loose na lwa Kanaan na ngyukiva shiingi. Na vaande yeru vakooya shoonga ivafile ndi.

¹²Neeli Yakobo andeita sheeli kulya Misiri iifo shoonga, karuma-fo vaande yeru lya mbele.

¹³Na kyaaṛo kya kavili Yosefu kakumanyisa kwa vanavamae. Na ufwari lwa Yosefu lukamanyika kwa Farao.

¹⁴Yosefu karuma vandu vandevaanga ndee Yakobo andu emwi na vanavamae woose deń, vvandu makumi mfungare na varaanu.

¹⁵Kyasia Yakobo kainama kumande Misiri kafiya-fo ye na vaande yeru.

¹⁶Vakakurikwa kumande Sikemu vakaṛikwa mbangeń ilya Abraamu aiuṛa na fesa kwa vana va Hemori ifo Sikemu.

¹⁷Kyasia kyeeri kya kirekio kilya Iṛuva arekiana na Abraamu ili kindefika kufui, vandu valya vakafumbuka na ikwengeṛia nnu kulya Misiri,

¹⁸kumande mangi ingi ya Misiri yakwimboo iteeshi kya Yosefu.

¹⁹Mangi yo ikautia ufwari lo lweru ntambwe na itania vaande yeru kikasha eevavavasaa vakumbe vana vawo vannya amu vafwe.

²⁰Kyeeri kyo Mose kairiwa, nae eekee mwana nnuru nnu. Kalelwa andu a miiri iraru ifo numba kwa ndee.

²¹Neeli andekumbwa sambuṛa ya Farao kamwuta-fo kallela sha mwana wamwi.

²²Mose kaloshwa uṛango loose lwa Vamisiri kava mwaṛia wa firero na mitanie.

²³Neeli kiṛengo kyamwi kindefika myaka makumi aani, kaitikwa nrimiń wamwi yenda andella vanavamae vamwi vakee vana va Isiraeli.

²⁴Kalolia umwi eeliswaa ukiva kamweleka kantaya sile kawaa Mmisiri ulya.

²⁵Akusaṛa sheeli vanavamae vamanyaa sheeli Iṛuva akee ivaniinga ikiṛwa kwa uko lwamwi, kake vamanya ndi.

²⁶Ili lya ndesi kashea vengi nawo veekee inaa. Kakunda ivaitanisa eenumbuaa: Muṛe womi vakwa, ini mukee vana va nka. Nkiki ili mukee inaa?

²⁷Kake ulya eekee inaya ito ungi kamburusia kwaasha eenumbuaa: Ni i akwaṛua kuve mwitoṛo na mutishilia?

²⁸A le kufurie ishiwaa niń sha lia kundewaa Mmisiri ulya kwa wu?

²⁹Mose karisha kiimba kya kirero kyo kandekaa sha mwini urukeń lwa Midian kairia-fo vana vavili.

³⁰Neeli indesia myaka makumi aani, malaika wa Nndumi kanshea bateń ya uro lwa Sinai kari ka kibalabala kya muro irumbushuń.

³¹Ili Mose andeulolia kaṛiikia myorusie ilya. Neeli andeserikia amu aulle, ununga lwa Nndumi lukanshea lwireraa:

³²Niń nkee Iṛuva wa vaande yafo, nkee Iṛuva wa Abraamu na Iṛuva wa Isaki na Iṛuva wa Yakobo. Mose karerema nta ikaṛia illa-wo.

³³Nndumi kamwia: Uta faaru marendeń afo, amu ia kuselele ni andu asongori.

³⁴Dede nallolia matuṛulwa a vandu vakwa vakee kulya Misiri, namiita ivavio lyawo, nań namooloka nshevauta-fo. Kyasia alli nkurumaa kumande Misiri.

³⁵Mose to vallea veenumbuaa: Ni i akwaṛua kuve mwitoṛo na mutishilia, yye arumwa ni Iṛuva ave nnini na nkiṛa kwa uko lwa malaika ulya anshea alya irumbushuń lia.

³⁶Ito yye avauta-fo urukeń eetanaa myorusie na firingisio kulya urukeń lwa Misiri na kulya nruveń ya masasangya na kulya bateń andu a myaka makumi aani.

³⁷Mose to yye aia vandu va Isiraeli: Iṛuva amuseṛeesiaa mwauya kisuku shań kari ka vanavamae vanu.

³⁸Ye yye eekee ikusandioń lya siṛi kulya bateń andu emwi na malaika ulya anderera nae kulya uroń lwa Sinai na andu emwi na vaande yeru. Yye awaria firero foore muu atiniingie ise.

³⁹Nndu to vaande yeru vakunda imwindia ndi, kake vamburusia kwaasha na mirima yawo vakaiwiiṛa Misiri.

⁴⁰Vakaia Aron: Tisongosie maṛuva atiiriaa mbele. Amu Mose to andetiuta urukeń lwa Misiri tiishi kindo kindewia ndi. Vakasongosia fwana ya kyaashe mikonu ilya vakakyutia nsimbika vakakyesia mashoṛa a maako awo.

⁴¹

⁴²Kyasia Iṛuva kailasha makusaṛo kavatia vatereve nyinyiri ta iṛuvewu, sheeli kikee kitisiṛe kitabuń kya vaauya fisuku: ”Ini va numba ya Isiraeli, mwashuutia kirasio na nsimbika myaka ilya makumi aani kulya bateń?

⁴³Wode, mwakurika yeema lya Moloki na nyinyiri ya iṛuva lyanu Refani, mfwana mundetisongosia mu veni amu mutitereve. Nań mmusamisaa mwende kwaasha kita Babeli“.

⁴⁴Kyeeri kilya vaande yeru veekee kulya bateń veeriee yeema lia lya mirambuye, sheeli avavasa ito arera na Mose alisongosie livakani na lia yeni andelolia.

⁴⁵Nalyo llia vaande yeru valya veekee na Yosua vandetaṛana vakalyata urukeń lua lwa vayavaṛumu Iṛuva andevaumbuta kisanguń kya vaande yeru. Kikakaa kuri kumande kyeeri kya Davidi.

⁴⁶Ito eenkooyaa ikundio̱ mbele ya Iṛuva. Nae kantereva amu akooiye Iṛuva wa Yakobo kirembo.

⁴⁷Kake Salomon yye andentania numba.

⁴⁸Kake ito akee ule ya foose akaa numba tantanwa na maako a vandu ndi, sheeli mwauya arerie:

⁴⁹”Iṛuvewu nkifumbi kyakwa kya unini na isanga ni andu a yekeṛia marende akwa. Nnumba ingai ini mushitaniaa? Ana ni andu angaa niń niimuyaa?

⁵⁰Ni uko lwakwa se lwatana ifi foose?“

⁵¹Ini muwore nra mutakee varini mirima ana marwi, nkonu woose muleaa Mumuyo Nsongori sha lia vaande yanu vatana, neeni mfo kuro da.

⁵²Ni ungau umwi kari ka vaauya fisuku kitaare vaande yanu vantuṛua? Nawo iwaa vakawaa valya varingisia mboni ta isha lya ulya nsumani ulya ini alli mwammutuṛua na iwwaa.

⁵³Ini mundewaria mavavaso mwielekio̱o̱ vvamalaika nta yawara.

⁵⁴Kyasia ili vandeita firero fo, fikavailika mirimiń vakanrafunia mayoo.

⁵⁵Nae kaishua Mumuyo Nsongori kalla na ule iṛuvewu kalolia unini lwa Iṛuva na Yesu aselele uko usha lwa Iṛuva.

⁵⁶Kanumbua: Lla te, llolie iṛuvewu liruukie na Mwana wa nndu aselele uko usha lwa Iṛuva.

⁵⁷Vakaṛoṛongya na ununga unini vakaraya marwi a wo vakanrumbukia kwa limwi.

⁵⁸Vakansomuta wooṛo ya muṛi vakankaba na mawe. Na vaṛiingi valya vamwi vakarwaa miseto yawo marendeń a nkoo umwi eevaangwaa Saulo.

⁵⁹Vakakaba Stefano na mawe, nae katereva kanumbua: Wui Nndumi Yesu, waria nrima wakwa!

⁶⁰Kafwiria nri kaia na ununga unini: Wui Nndumi, manya kutavataalie ireko li! Neeli andemaa irera firero fi kanutuka.