Read MMA SHIYYA Mitanie ya varumi 8 Bible Online

Mitanie ya varumi 8 - MMA SHIYYA bible

Mitanie ya varumi 8

¹Na Saulo kasenywa ni iwalwa lyamwi. Nkonu to akava ma-tuṛulwa manini a siṛi ilya ikee Yerusalemu. Woose vakanyanyaka ngyurukeń ta Yuda na Samaria. Vandu vandesaa ifo Yerusalemu vvarumi da.

²Kake vandu veekusuriee Iṛuva vakaṛika Stefano vakallilia kiiyo kinini.

³Saulo kaburua siṛi eeakaa numba kwa numba eesuṛuaa womi na vaka na ivarwaa kifingioń.

⁴Kake valya vandetaṛakana vakaenda ifo na ifo veekwanisaa kirero kilya.

⁵Kyasia na Filipo kainama kafika muṛiń umwi wa Samaria kavakwanisia kya Kristo.

⁶Na isyamu likaaranya firero filya farerwa mFilipo kwa nrima umwi, ili vandeita na ilolia maṛiikiso alya eekee itanwa yye.

⁷Amu veengi vatoṛokombie na fisaya vakakiṛwa. Na vandu veengi veeworwaa mmimuyo mikasha ikavauka iishiṛaa na ununga unini.

⁸Likava ifura inini muṛiń ulya.

⁹Eeifoo nndu umwi irina lyamwi nSimon eekee nsavi kuuka mbele muṛiń ito eeunganisaa vandu va Samaria, eenumbuaa sheeli ye ni nndu nnini.

¹⁰Na woose vannya na vanini vakamwaranya veereraa: Nndu uu yye finya ya Iṛuva ilya nini.

¹¹Na kiteveto vakamwaranya mfulya eewaṛiikisaa keengi na usavi lwamwi.

¹²Kake ili vandeirikia Filipo eevakwanisiaa mboni shinuru ta umangi lwa Iṛuva na ta irina lya Yesu Kristo, vakakubatisio̱ womi na vaka.

¹³Nae Simon muni akusura kabatiswa kalungana na Filipo. Ili andelolia firingisio na maṛiikiso manini fitanikaa kaṛiika.

¹⁴Na varumi valya veekee Yerusalemu ili vandeita sheeli Samaria yamiirikia kirero kya Iṛuva vakavarikia Petiro na Yohane.

¹⁵Vakainama vakavaterevia vawarie Mumuyo Nsongori.

¹⁶Amu nta umwi wawo eemmusheaa, kake veembatisio̱o̱ irina lya Nndumi Yesu da.

¹⁷Llyo vavaekeṛia maako nawo vakawaria Mumuyo Nsongori.

¹⁸Neeli Simon andelolia sheeli vandu vaniingwa Mumuyo Nsongori veekeṛio̱o̱ maako a varumi kavaendee fesa kanumbua:

¹⁹Shiniingeń imakii li nań, amu nndu woose mmwekeṛiaa maako akwa awarie Mumuyo Nsongori.

²⁰Petiro kamwia: Fesa tafo fireke andu emwi nawe, fulya kwakusaṛa sheeli miniingie ya Iṛuva ikooikaa kwa fesa.

²¹Kuwore wavi ana fuva ya kindo iki ndi, fulya nrima wafo utasumanikie kisanguń kya Iṛuva.

²²Kyasia kurre ukasha lu lwafo kutereve Nndumi akwaa kivaa kulilio̱ ikusaṛo li lya nrima wafo.

²³Amu nkulolie kuwore kivawwo sha udwa na lingi kukee kifingioń kya ukasha.

²⁴Simon kaaṛua kanumbua: Shiterevień ini kwa Nndumi kaaṛa ifi mwarera kitashifikie nta kimwi.

²⁵Ili vandemaa irambua na ikwanisa kirero kya Nndumi vakauya Yerusalemu veekwanisaa nrumi ya ifura fimiṛiń fiingi fa Vasamaria.

²⁶Malaika wa Nndumi karera na Filipo kamwia: Kwimboo inama kufike shia ilya yukie Yerusalemu ikafika urukeń lwa Gasa ilya itakiiriwa vvandu.

²⁷Kakwimboo kaenda. Lia eni kalolia nndu Mwabashi. Nndu ito eekee nshili wa mangi nka Kandake wa kulya Wabashi eeringaa masaa woose a mangi ilya. Nae eemeendaa Yerusalemu andeterevia-fo Iṛuva.

²⁸Neeli eeuyaa na kyeń kakaa rembo igariń lyamwi kasoma kitabu kya mwauya fisuku Yesaya.

²⁹Mumuyo wa Iṛuva kaia Filipo: Kwimboo saṛikia igari lia!

³⁰Llyo Filipo alisaṛikia kaita nndu ulya eesomaa kitabu kya mwauya fisuku Yesaya. Kamwuṛa: Kwammanya misendie ya firero fo kukee isoma?

³¹Nae kamwia: Mmakii imanya are ntaare nndu ashilosha? Katereva Filipo aaṛukie igariń akaa andu emwi nae.

³²Na firero eekee isoma ifo kitabuń mfo ifi: ”Ankurikwa andu a isikywa sha yaanri. Lingi kavakana na yaanri likee isemwa mafuli mmuni fikasia do. Mfo kuro nae asisiria nta itaṛambua kana kamwi.

³³Ili nndekunyiisa kavinga kakia uumisio lwamwi. Ana ni i ataalaa ufwari lwamwi? Fulya muu wamwi uutwaa kunu isangeń utakiifo.“

³⁴Na nshili kauṛa Filipo kamwia: Nakutereva kushiie, kilya mwauya fisuku ulya arera nkya i? Akurera ye muni ana arera kya nndu ungi?

³⁵Na Filipo kataṛambua kana kamwi kalosha nndu ulya mboni ta Yesu eebookiaa mboniń tilya ta mwauya fisuku ulya.

³⁶Ili vandeenda-enda vakafika mureń. Nshili ulya kaia Filipo: A uuń mura. Kiifo kindo kishiimaa niibatiswaa?

³⁷Filipo kamwia: Kwakooya kukusuraa Nndumi na ngoo yafo yoose kimakii iva. Kamwaṛua kamwia: Nkusurie sheeli Yesu Kristo yye Mwana wa Iṛuva.

³⁸Kasalafisa igari vakaoloka mureń vali vavili Filipo na nshili. Na Filipo kambatisia-fo.

³⁹Ili vandemaa yuka mureń, Mumuyo wa Iṛuva kaveṛuta Filipo nshili ulya nta ikillolia. Kawara shia yamwi kaenda na ifura.

⁴⁰Kake Filipo kalolika Asidodi. Neeli eeiraa kakwanisa nrumi shisha miṛiń yoose andeira kumande afika Kaisaria.